ក្រសួងសាធារណការ និងដឹកជញ្ជូនរៀបចំសិក្ខាសាលាស្តីពីនីតិវិធីអនុវត្តន៍ និងទូទាត់ចំណាយការងារជួស ជុលអន្តរាគមន៍ ផ្លូវថ្នល់ ស្ពាន និងលូ ដើម្បីឱ្យអង្គភាពអនុវត្តគម្រោង និងមន្ត្រីអ្នកអនុវត្តការងារមានការ យល់ដឹងច្បាស់ និងអនុវត្តត្រូវចំគោលការណ៍ប្រកបដោយប្រសិទ្ធភាព --- ថ្ងៃព្រហស្បតិ៍ ០៤រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែតុលា ឆ្នាំ២០១៩ ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីបើកសិក្ខាសាលាស្តីពី៖ នីតិវិធីអនុវត្ត និងទូទាត់ចំណាយការងារជួសជុលអន្តរាគមន៍ ផ្លូវថ្នល់ ស្ពាន និងលូ ដែលបានប្រព្រឹត្តទៅនៅខេត្តក្រចេះ ដោយមានការចូលរួមពីមន្ត្រីអង្គភាពអនុវត្តគម្រោង និងមន្ត្រីអ្នកអនុវត្តការងារប្រមាណ១០០នាក់។ សិក្ខាសាលានេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួង សេដ្ឋកិច្ច និងហិរញ្ញវត្ថុក្នុងគោលបំណងបង្កើនការយល់ដឹងអំពីនីតិវិធីអនុវត្តន៍ និងទូទាត់ចំណាយការងារជួសជុលអន្តរាគមន៍ ផ្លូវថ្នល់ ស្ពាននិងលូ និងអាចអនុវត្តត្រូវចំគោលការណ៍ និងប្រកបដោយប្រសិទ្ធភាព ដល់អង្គភាពអនុវត្តគម្រោងក្រោមឱវាទក្រសួងសាធារណការ និងដឹកជញ្ជូន ជាពិសេសមន្ត្រីអ្នកអនុវត្តន៍ការងារផ្ទាល់ឱ្យមានការយល់ដឹងកាន់តែច្បាស់បន្ថែមទៀត។ សិក្ខាសាលានេះផ្តោតជាសំខាន់ទៅលើគោលការណ៍ និងនិតិវិធីនៃការអនុវត្តទាក់ទងនឹងអន្តរាគមន៍ជួសជុលបន្ទាន់ ការទូទាត់ចំណាយ ការស្នើសុំបំពេញឡើងវិញថវិការបម្រុង ទូទាត់ចំណាយថវិកាបុរេប្រទាន លំហូរការងារចំពោះគម្រោងជួសជុលបន្ទាន់។ ថ្លែងក្នុងសន្ទរកថាបើក ឯកឧត្តមអនុរដ្ឋលេខាធិការ បានគូសបញ្ជាក់អំពីសារសំខាន់ផ្លូវថ្នល់ ស្ពាន ដែល ជាមធ្យោបាយមិនអាចខ្វះបានក្នុងការជំរុញកំណើនសេដ្ឋកិច្ច ការអភិវឌ្ឍធនធានមនុស្ស និងការអភិឌ្ឍសង្គមជាតិ ព្រមទាំងលើកស្ទួយជីវភាពរស់នៅរបស់ប្រជាពលរដ្ឋ ដោយហេតុថា ផ្លូវថ្នល់ និងស្ពានល្អ អាចជួយសម្រួលដល់ការធ្វើចរាចរណ៍ឆ្លងកាត់ទៅវិញទៅមក ការដឹកជញ្ជូនកសិផល និងផលិតផល ផ្លាស់ប្តូរទំនិញបានទាន់ពេលវេលានៅគ្រប់ទីកន្លែង ស្របតាមទិសស្លោករបស់រាជរដ្ឋាភិបាលកម្ពុជា “មានផ្លូវ មានស្ពាន មានក្តីសង្ឃឹម”។ ឯកឧត្តមអនុរដ្ឋលេខាធិការ បានជំរុញលើកទឹកចិត្តឱ្យសិក្ខាកាមទាំងអស់លើកជាសំណួរល្អៗផ្តល់ជាមតិយោបល់ផ្សេងៗ និងផ្លាស់ប្តូរបទពិសោធន៍គ្នាទៅវិញទៅមក ដើម្បីបំពេញចំនុចខ្វះខាតដែលកើតមានក្នុង ពេលអនុវត្តជាក់ស្តែង ក្នុងគោលបំណងឱ្យការងារអនុវត្តនីតិវិធីអនុវត្តន៍ និងទូទាត់ចំណាយការងារជួសជុលអន្តរាគមន៍បន្ទាន់ផ្លូវថ្នល់ ស្ពាន និងលូ កាន់តែមានប្រសិទ្ធភាពខ្ពស់ និងទទួលបានជោគជ័យបន្ថែមទៀត៕