[Rasmei Kampuchea Daily News] - “ដើមឆ្នាំ២០២០មន្ទីរធ្វើផ្លូវភ្លោះមានសួនច្បារកណ្តាលកែលម្អសោភ័ណភាពក្រុងឈានដណ្តើមបានផ្ការំដួល”
ព្រះវិហារៈអាជ្ញាធរខេត្តព្រះវិហារខិតខំប្រឹងប្រែងកែលម្អសោភ័ណភាពសណ្ដាប់ធ្នាប់និងអនាម័យបរិស្ថាននៅជុំវិញក្រុងដើម្បីបង្កើនការលើកកម្ពស់សោភ័ណភាពទីក្រុងនេះឱ្យកាន់តែស្រស់ស្អាតឈានទៅដណ្តើមបានផ្ការំដួល៣ទងដែលជាទីក្រុងស្អាតជាងគេនៅកម្ពុជា។
លោកសំលាងទ្រីប្រធានមន្ទីរសាធារណការនិងដឹកជញ្ជូនខេត្តព្រះវិហារបានឱ្យដឹងថានៅដើមឆ្នាំ២០២០ខាងមុខនេះមន្ទីរបានលើកផែនការពង្រីកផ្លូវម្លូព្រៃនៅក្នុងទីរួមខេត្តឱ្យក្លាយជាផ្លូវភ្លោះមានសួនច្បារនៅកណ្តាលពង្រីកគម្រោងផ្លូវអ៊ុតកៅស៊ូនិងផ្លូវបេតុងឆ្អឹងដែកនៅជុំវិញទីរួមខេត្តដើម្បីធានាគុណភាពផ្លូវថ្នល់អាចប្រើប្រាស់យូវអង្វែង និងធានាសុវត្ថិភាពក្នុងការធ្វើចរាចរណ៍។
លោកប្រធានមន្ទីរបានបន្តថាមន្ទីរក៏បានសម្រេចកែលម្អសួនច្បារចាស់ៗនិងបង្កើតសួនច្បារថ្មីៗបន្ថែមនៅក្នុងក្រុងព្រះវិហារដើម្បីលើកកម្ពស់សោភ័ណភាពទីក្រុងនេះឱ្យកាន់តែស្រស់ស្អាតសម្រាប់បង្អួតភ្ញៀវទេសចរផងនិងដណ្តើមពានរង្វាន់ជាទីក្រុងស្អាត។«យើងមានផែនការប្រែក្លាយទីរួមខេត្តព្រះវិហារឱ្យមានសោភ័ណភាពស្រស់ស្អាតបរិស្ថានល្អ។ពិសេសទិសដៅរបស់អាជ្ញាធរខេត្តចង់ប្រឡងប្រណាំងទីក្រុងស្អាតដណ្តើមបានផ្ការំដួល១ទង២ទងឬ៣ទង។ទន្ទឹមនឹងនោះយើងកែលម្អរសួនច្បារនិងបង្កើតសួនច្បារថ្មីនៅក្នុងទីរួមខេត្តជាច្រើនទៀតនៅចុងឆ្នាំនេះដែលព្យាយាមធ្វើយ៉ាងណាឱ្យទីក្រុងរបស់យើងបានល្អ ស្រស់បំព្រង»។
លោកប្រធានមន្ទីរសាធារណការខេត្តព្រះវិហារបន្តថាមន្ទីរនឹងអនុវត្តយុទ្ធនាការដូចភ្លៀងរលឹមដើម្បីបញ្ជ្រាបការយល់ដឹងដល់ប្រជាពលរដ្ឋឲ្យរួមគ្នាថែរក្សាផ្លូវថ្នល់សណ្ដាប់ធ្នាប់និងអនាម័យនៅតាមដងផ្លូវដោយមិនត្រឹមតែធានាបានសុវត្ថិភាពសុខភាពរបស់ប្រជាពលរដ្ឋនិងអ្នកដំណើរប៉ុណ្ណោះទេថែមទាំងធ្វើឱ្យទីក្រុងមានសោភ័ណភាពស្រស់បំព្រងថែមទៀតផង។
សូមបញ្ជាក់ថាក្នុងទិវាជាតិទីក្រុងស្អាតលើកទី៧ឆ្នាំ២០១៩ក្រោមប្រធានបទទីក្រុងស្អាតទីក្រុងផ្តល់ភាពកក់ក្តៅកាលពីថ្ងៃទី២៥កុម្ភៈឆ្នាំ២០១៩ខេត្តព្រះវិហារទទួលបាន៥ជ័យលាភីដែលប្រគល់ជូនដោយសម្តេចតេជោហ៊ុនសែន។ដូចជាពានរង្វាន់ធុរកិច្ចបៃតងក្នងវិស័យទេសចរណ៍ជ័យលាភីបង្គន់សាធារណៈកម្ពុជានូវស្នាមញញឹមនិងទីក្រុងស្អាតជាដើម៕
