[Kampuchea Thmey] - ផ្អាកចរាចរណ៍បណ្ដោះអាសន្ន លើកំណាត់ផ្លូវខេត្តលេខ២៦៨អា ពីផ្លូវជាតិលេខ៦ ព្រៃមាន់ ភ្នំស្រុក អាងត្រពាំងថ្ម ដោយសារទឹកជំនន់
2019-10-01
Go to the website published Kampuchea Thmey
បន្ទាយមានជ័យ ៖ ផ្អាកចរាចរណ៍រថយន្តធុនធ្ងន់ជាបណ្ដោះអាសន្នលើកំណាត់ផ្លូវខេត្តលេខ២៦៨អាក្រាលកៅស៊ូ និងក្រាលក្រួស ពីផ្លូវជាតិលេខ៦ ព្រៃមាន់ ភ្នំស្រុក អាងត្រពាំងថ្មដោយសារជំនន់ទឹកភ្លៀង និងទឹកហៀរប្រព័ន្ធប្រឡាយអាងត្រពាំងថ្ម។
លោកគឹម សុវណ្ណ ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យប្រាប់អ្នកយកព័ត៌មានឲ្យដឹងថា ថ្ងៃទី៣០ ខែកញ្ញា ឆ្នាំ២០១៩នេះ ជាថ្ងៃដែលមន្ទីរសាធារណការចេញសេចក្ដីជូនដំណឹងឲ្យលោកជំទាវ លោកស្រី លោក និងក្រុមហ៊ុនដឹកជញ្ជូនរថយន្តធុនធ្ងន់ ថ្ម ខ្សាច់ ស្រូវ អង្ករ ដំឡូងមី ដែលដឹកទំនិញទាំងឡាយចាប់ពីផ្លូវជាតិលេខ៦ ត្រង់ចំណុចចូលទៅស្រុកភ្នំស្រុកក្នុងភូមិសាស្ត្រឃុំស្រះជីក និងឃុំប៉ោយចារ សូមជ្រាបថា ដោយយោងស្ថានភាពទឹកជំនន់ជាក់ស្តែងនាពេលបច្ចុប្បន្ន មន្ទីរសូមផ្អាកចរាចរណ៍បណ្ដោះអាសន្ន ចាប់ពីថ្ងៃទី៣០ ខែកញ្ញា ឆ្នាំ២០១៩ តទៅ រហូតដល់ទឹកស្រកសម្រាប់រថយន្តធុនធ្ងន់ចន្លោះចាប់ពីគីឡូម៉ែត្រដូចខាងក្រោម ៖ ១-PK 8+500 ដល់ PK 9+000 ប្រវែង៥០០ម៉ែត្រ, ២-ចន្លោះ PK 14+ 800 ដល់ PK 14+850 ប្រវែង៥០ម៉ែត្រ ,៣-ចន្លោះ PK 15+ 000 ដល់ PK 15+ 500 ប្រវែង៥០០ម៉ែត្រ,និង ៤- ចន្លោះ PK 16+ 800ដល់ PK 17+ 100 ប្រវែង៣០០ម៉ែត្រ។ ដោយសារទឹកជំនន់ធ្លាក់មកពីផ្នែកខាងលើ មានស្រុកភ្នំស្រុក ស្រុកថ្មពួកស្វាយចេក ក្រុងប៉ោយប៉ែត ក្រុងសិរីសោភ័ណ ស្រុកអូរជ្រៅកន្លងមក។
ដោយឡែកនៅស្រុកភ្នំស្រុកនេះ ទឹកជំនន់បង្កពីភ្លៀងធ្លាក់ខ្លាំង និងពីទឹកធ្លាក់ពីលើ នៃភូមិសាស្ត្រខេត្តឧត្តរមានជ័យមកតាមស្ទឹងស្រែង និងតាមប្រព័ន្ធប្រឡាយ នៃអាងត្រពាំងថ្ម អាងស្ពានស្រែង ប្រព័ន្ធប្រឡាយអន្សងនាវជាដើម បានបង្កជាទឹកជំនន់លិចលង់ខូចខាតធ្ងន់ធ្ងរកំណាត់ផ្លូវខេត្តលេខ២៦៨អា ព្រៃមាន់ ភ្នំស្រុក អាងត្រពាំងថ្មនេះ៤កំណាត់ដូចខាងលើ មានប្រវែង១.៣៥០ម៉ែត្រ លើ២.៨០០ម៉ែត្រ។
លោកគឹម សុវណ្ណ បន្តថា ការផ្អាកនេះ លើកលែងរថយន្ត យានយន្តផ្សេងទៀតដែលធុនស្រាល ម៉ូតូនិងថ្មើរជើង ហើយមន្ទីរ នឹងបើកឲ្យចរាចរណ៍ឡើងវិញនៅពេលណា ទឹកជំនន់ស្រក ដីផ្លូវស្ងួត រឹងមាំ ។ ដោយឡែកលោកវរសេនីយ៍យ៉ត សុផល អធិការនគរបាលស្រុកភ្នំស្រុក និងជាសមាជិកគណៈបញ្ជាការឯកភាពរដ្ឋបាលស្រុកបានឲ្យដឹងថា គ្រោះទឹកជំនន់ពីថ្ងៃទី១៤កញ្ញា មកទល់ថ្ងៃទី៣០ ខែកញ្ញា ឆ្នាំ២០១៩ នេះ នៅភូមិសាស្ត្រស្រុកភ្នំស្រុកបានប៉ះពាល់ដំណាំស្រូវ និងខូចខាតផ្លូវថ្នល់មួយចំនួន គឺផ្លូវថ្នល់ខេត្ត ផ្លូវលំនៅឃុំពន្លៃ ភ្នំដី ស្រះជីក ប៉ោយចារ និងឃុំណាំតៅ ប្រវែង៧.១៤៤ម៉ែត្រ លិចសាលារៀន៤កន្លែងនៅ៣ឃុំ ខូចខាតប្រឡាយមេ ៣ខ្សែ ប្រឡាយរង១៦ខ្សែ និងប្រឡាយជើងក្អែប ៥១ខ្សែនៅ៥ឃុំ ប៉ះពាល់ដំណាំស្រូវ៩.៤៤៦ហិកតា នៅ៥ឃុំ ដំឡូងមី២៥១ហិកតា នៅ៤ឃុំ និងផ្ទះ៤០៨ខ្នងនៅ២ឃុំ មកទល់ពេលនេះ ស្ថានភាពទឹកបានស្រកខ្លះនៅផ្នែកខាងលើ តែបានស្រុងចុះមកលិចនៅផ្នែកខាងក្រោមវិញ៕
