ថ្ងៃព្រហស្បតិ៍ ៨កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៨ ខែសីហា ឆ្នាំ២០១៩ លោក ចៅ សុភៈភិបាល ប្រធាននាយកដ្ឋានសំណង់ប្រព័ន្ឋចម្រោះទឹកកខ្វក់ តំណាងឯកឧត្តម ហេង រត្នពិសិដ្ឋ អគ្គនាយកសាធារណការ នៃក្រសួងសាធារណការ និងដឹកជញ្ជូន បានចូលរួមកិច្ចប្រជុំគណៈកម្មាធិការប្រតិបត្តិ (AWaP Operations Committee) នៃបណ្តាប្រទេសជាដៃគូលើការគ្រប់គ្រងទឹកកខ្វក់ក្នុងតំបន់អាស៊ី នៅទីក្រុងយូកូហាម៉ា ប្រទេសជប៉ុន រយៈពេលពីរថ្ងៃ គឺថ្ងៃទី៧-៨ ខែសីហា ឆ្នាំ២០១៩ នៅទីក្រុងយូកូហាម៉ា ប្រទេសជប៉ុន។ កិច្ចប្រជុំរៀបចំគាំទ្ររួមគ្នាដោយក្រសួងគ្រប់គ្រងដែនដី ហេដ្ឋារចនាសម្ព័ន្ឋ និងដឹកជញ្ជូនជប៉ុន និងក្រសួងបរិស្ថានជប៉ុន (MLIT and MOE of Japan) មានការចូលរួមពីបណ្តាប្រទេសជាដៃគូរួមមាន ប្រទេសជប៉ុន ប្រទេសវៀតណាម ប្រទេសភូមា ប្រទេសឥណ្ឌូនេស៊ី និងប្រទេសកម្ពុជា ប្រទេសហ្វីលីពីនអវត្តមាន ព្រមទាំងចូលរួមពីបណ្តាក្រុមហ៊ុនជប៉ុនធំៗមួយចំនួន ដែលមានជំនាញលើវិស័យទឹកកខ្វក់។ កិច្ចប្រជុំផ្តោតលើរបៀបវារៈដូចខាងក្រោម៖ 1) ការពន្យល់ និងចូលរួមផ្តល់មតិយោបល់លើទម្រង់នៃរបាយការណ៍ប្រចាំលើការគ្រប់គ្រងទឹកកខ្វក់ដោយលេខាដ្ឋានរបស់គណៈកម្មាធិការប្រតិបត្តិ (AWaP Secretariat) និងបទបង្ហាញពីប្រទេសជាសមាជិករបស់ AWaP 2) ការណែនាំ និងបទបង្ហាញបច្ចេកទេសពីបណ្តាក្រុមហ៊ុនជប៉ុនចំនួន០៦ លើវិស័យទឹកកខ្វក់ 3) ការចុះពិនិត្យទីតាំងស្ថានីយប្រព្រឹត្តកម្មទឹកកខ្វក់ដោយប្រើប្រាស់ប្រព័ន្ឋចូការស្យូ(Johkasou System) ទស្សនៈកិច្ចមជ្ឈមណ្ឌលអ៊ីរីសាគី សម្អាតកាកសំណល់ភក់ (Sludge Treatment Plant at Iriezaki Clean Center) នៅទីក្រុងកាវ៉ាសាគី (Kawasaki City) 4) ទស្សនៈកិច្ចមើលការតាំងពិព័ណ៌ បង្ហាញពីការងារទឹកកខ្វក់ ក្រោយបទបង្ហាញ និងការពិភាក្សា កិច្ចប្រជុំគណៈកម្មាធិការប្រតិបត្តិ (AWaP Operations Committee) បានសង្ខេបលទ្ឋផលដូចខាងក្រោម៖ - យោងតាមគោលដៅអភិវឌ្ឍប្រកបដោយចីរភាពរបស់អង្គការសហប្រជាជាតិ (SDGs by 2030) ត្រង់ចំនុចទិសដៅ ៦.៣ បានលើកឡើងថា គ្រប់ប្រទេសជាសមាជិក ត្រូវធ្វើការគ្រប់គ្រងទឹកកខ្វក់ និងច្រោះសម្អាតទឹកកខ្វក់អោយបានស្អាតយ៉ាងតិច ៥០% មុនឆ្នាំ២០៣០ ។ - ការគ្រប់គ្រងទឹកកខ្វក់មិនទាន់ទទួលបានការផ្តល់អាទិភាពខ្ពស់នៅឡើយ ។ - ខ្វះចំណេះដឹង ខ្វះព័ត៌មាន ខ្វះថវិកា និងបច្ចេកវិទ្យាសមស្រប ។ - ដើម្បីដោះស្រាយនៅបញ្ហាខាងលើកិច្ចប្រជុំគណៈកម្មាធិការប្រតិបត្តិបានកំណត់នូវគោលបំណង០៣គឺ៖ ១/ ផ្សព្វផ្សាយលើកកម្ពស់សាធារណៈការយលើដឹងលើការគ្រប់គ្រងទឹកកខ្វក់ ២/ ពិនិត្យ និងតាមដានការគ្រប់គ្រងទឹកកខ្វក់ ៣/ ដោះស្រាយបញ្ហាប្រឈមរួម ។ - គ្រោងនឹងរៀបចំកិច្ចប្រជុំគណៈកម្មាការប្រតិបត្តិនៃបណ្តាប្រទេសជាដៃគូលើការគ្រប់គ្រងទឹកកខ្វក់ក្នុងតំបន់អាស៊ី លើកទី២ (2nd AWaP General Meeting) និងរៀបចំកិច្ចប្រជុំកំពូលលើកទី៤ ស្តីពី ទឹកតំបន់អាស៊ី-ប៉ាស៊ីហ្វិក (the 4th Asia-Pacific Water Summit, APWS) នៅខែតុលា ឆ្នាំ២០២០ ក្នុងទីក្រុងកូម៉ាម៉ូតូ ប្រទេសជប៉ុន ។