ថ្ងៃចន្ទ ៥កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៥ ខែសីហា ឆ្នាំ២០១៩ លោក ចៅ សុភ:ភិបាល ប្រធាននាយកដ្ឋានសំណង់ប្រព័ន្ឋចម្រោះទឹកកខ្វក់ តំណាងឯកឧត្តម ហេង រត្នពិសិដ្ឋ អគ្គនាយកសាធារណការនៃក្រសួងសាធារណការ និងដឹកជញ្ជូន បានដឹកនាំបើកកិច្ចប្រជុំបឋមរួមគ្នាជាមួយឯកឧត្តម ខូយ រីដា អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្តមអភិបាលខេត្តនៃគណ:អភិបាលខេត្តពោធិ៍សាត់ និងមានការចូលរួមពីមន្ទីរខេត្តពាក់ព័ន្ឋ នាយករដ្ឋបាលខេត្ត នាយកទីចាត់ការអន្តរវិស័យ អភិបាលរងក្រុង ចៅសង្កាត់ និងមន្ត្រីពាក់ព័ន្ឋ។ គោលបំណងកិច្ចប្រជុំបឋមគឺណែនាំក្រុមការងារ ”សិក្សាលទ្ឋភាព និងសិក្សាគម្រោងកែលម្អប្រព័ន្ឋលូរំដោះទឹកកខ្វក់ក្នុងក្រុងពោធិ៍សាត់ ខេត្តពោធិ៍សាត់” ដែលខ្លឹមសារកិច្ចប្រជុំមានដូចខាងក្រោម៖ ១. បទបង្ហាញគម្រោងសិក្សា និងកិច្ចពិភាក្សាពិគ្រោះយោបល់ ២. ការចុះពិនិត្យ ៖ - ទីតាំងដីសម្រាប់សាងសង់ស្ថានីយប្រព្រឹត្តកម្មទឹកកខ្វក់ និង ទីតាំងដីបម្រុងសម្រាប់សាងសង់ស្ថានីយបូម (ករណីមាន) - ទីតាំងបណ្តាញលូមួយចំនួន និងប្រភពបំពុល - អង្គភាពរដ្ឋាករទឹកស្អាត - ស្នើបង្ហោះដ្រោនលើទីតាំងជាក់ស្តែងមួយចំនួន ក្រោយបទបង្ហាញ និងការពិភាក្សាទទួលបានលទ្ឋផលដូចខាងក្រោម៖ -ការសិក្សាមានរយៈពេល ០៥ខែ និងមានអ្នកជំនាញជប៉ុនប្រចាំក្រសួងជាជំនួយការ ។ -អង្គប្រជុំបានស្នើសុំជាគោលការណ៍ទៅឯកឧត្តមអភិបាលខេត្តសុំបង្កើតក្រុមការងារផ្លូវការមួយដែលមាន ឯកឧត្តមអភិបាលរង ទទួលបន្ទុកម្នាក់ ជាប្រធាន អនុប្រធាន ជាប្រធានមន្ទីរសាធារណការ និងដឹកជញ្ជូន និងមានសមាជិក ពីតំណាងមន្ទីរខេត្តពាក់ព័ន្ធ អភិបាលរងក្រុង និងចៅសង្កាត់ ដែលពាក់ព័ន្ធផងដែរ។ -ស្នើដល់ក្រុមការងារ នាយកដ្ឋានសំណង់ប្រព័ន្ធចម្រោះទឹកកខ្វក់ សិក្សានៅផែ្នកខាងកើតស្ទឹងពោធិ៍សាត់ ៕