[Phnom Penh Times] - ឯឧ. ទេស. ស៊ុន ចាន់ថុល អនុញ្ញាតឲ្យពិនិត្យលទ្ធភាព សាងសង់ស្ថានីយ៍ ថ្លឹងរថយន្ត ដឹកលើសទម្ងន់កម្រិតកំណត់ ក្នុងខេត្តព្រះវិហារ
2019-07-23
Go to the website published Phnom Penh Times
ព្រះវិហារ៖ នៅថ្ងៃអង្គារ ០៧រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៣ ខែកក្កដា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិង ដឹកជញ្ជូន បានអញ្ជើញជា អធិបតីក្នុងពិធីសំណេះសំណាលជាមួយមន្ត្រីរាជការ នៃមន្ទីរសាធារណការ និងដឹកជញ្ជូនខេត្តព្រះវិហារ ដោយមានការចូលរួមពីមន្ត្រីជាន់ខ្ពស់ក្រសួង ឯកឧត្តមអភិបាលនៃគណៈអភិបាលខេត្តព្រះវិហារ និងមន្ត្រីរាជការមកពីមន្ទីរសរុបប្រមាណ៩៩នាក់។
ថ្លែងទៅកាន់អង្គពិធីទាំងមូល ឯកឧត្តមទេសរដ្ឋមន្ត្រី បានក្រើនរំលឹកមន្ត្រីដែលជាអ្នកផ្តល់សេវាទាំងអស់ ត្រូវខិតខំប្រឹងប្រែងកែលម្អការផ្តល់សេវាសាធារណៈជូនប្រជាពលរដ្ឋឱ្យបានឆាប់រហ័ស ទាន់ពេលវេលា ប្រកបដោយប្រសិទ្ធភាព និងតម្លាភាព ខិតខំអប់រំផ្សព្វផ្សាយការយល់ដឹងជាសាធារណៈ និងបញ្ជ្រាបការយល់ដឹងច្បាប់ និងបទដ្ឋាននានា ដើម្បីលុបបំបាត់ការដឹកជញ្ជូនលើសទម្ងន់កម្រិតកំណត់ និងការកែច្នៃរថយន្ត ខុសលក្ខណៈបច្ចេកទេស។
តាមសំណេីររបស់មន្ទីរ ឯកឧត្តមទេសរដ្ឋមន្ត្រី បានអនុញ្ញាតឲ្យឯឧ រដ្ឋលេខាធិការ សេង ឈួន ពិនិត្យលទ្ធភាព សាងសង់ស្ថានីយ៍ ថ្លឹងរថយន្ត ដឹកទំនិញ ដេីម្បីចូលរួមកាត់បន្ថយការដឹកជញ្ជូន លេីសទម្ងន់ ដែលនាំអោយខូចខាតផ្លូវ និង បង្កជាគ្រោះថ្នាក់ចរាចរណ៍ នៅក្នុងខេត្តមួយនេះ។
លើសពីនេះទៅទៀត ឯកឧត្តមទេសរដ្ឋមន្ត្រី បានណែនាំឱ្យថ្នាក់ដឹកនាំមន្ទីរ និងមន្ត្រីរាជការក្រោមឱវាទ ទាំងអស់ ធ្វើយុទ្ធនាការផ្សព្វផ្សាយពីច្បាប់ចរាចរណ៍ផ្លូវគោក បណ្ដុះបណ្ដាល ពង្រឹងការអនុវត្តច្បាប់ យុទ្ធនាការពាក់មួកសុវត្ថិភាព ការអប់រំតាមសាលារៀន ការបំពាក់ផ្លាកសញ្ញា ភ្លើងសញ្ញា គំនូសសញ្ញាចរាចរណ៍ និងចំណាំងផ្លាតជាដើម និងជួសជុលផ្លូវត្រង់ចំណុចគ្រោះថ្នាក់ Black Spots ឱ្យបានទាន់ពេលវេលា ដើម្បី កាត់បន្ថយគ្រោះចរាចរណ៍។
ឯកឧត្តមទេសរដ្ឋមន្ត្រី ក៏បានជំរុញលើកទឹកចិត្តឱ្យថ្នាក់ដឹកនាំមន្ទីរ និងមន្ត្រីរាជការក្រោមឱវាទទាំងអស់ចូលរួមប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីរាយការណ៍ពីជង្ហុកសំបុកមាន់ និងត្រូវខិតខំប្រឹងប្រែង កសាងហេដ្ឋារចនាសម្ព័ន្ធក្នុងខេត្តប្រកបដោយគុណភាព ប្រសិទ្ធភាព និងការទទួលខុសត្រូវខ្ពស់ ស្របតាមផែនការយុទ្ធសាស្ត្រ និងការណែនាំរបស់ថ្នាក់ដឹកនាំក្រសួងសាធារណការ និងដឹកជញ្ជូន។
ជាទីបញ្ចប់ ឯកឧត្តមទេសរដ្ឋមន្ត្រី បានថ្លែងអំណរគុណ និងការកោតសរសើរដោយស្មោះចំពោះថ្នាក់ ដឹកនាំមន្ទីរ និងមន្ត្រីរាជការក្រោមឱវាទមន្ទីរសាធារណការ និងដឹកជញ្ជូនទាំងអស់ ដែលបានខិតខំប្រឹងប្រែងអនុវត្តការងារប្រកបដោយជោគជ័យកន្លងមក និងបានជំរុញលើកទឹកចិត្តឱ្យពួកគាត់ខិតខំប្រឹងប្រែង ការងារ បន្តទៀតដើម្បីបម្រើប្រជាពលរដ្ឋយើងឱ្យបានល្អ៕
