[Thmey Thmey] - រដ្ឋមន្ត្រីសាធារណការ៖ «យើងនឹងយកមេរៀនពីខេត្តព្រះសីហនុ ទៅអនុវត្តនៅកំពត កែប និងកោះកុង…»
2019-05-01
Go to the website published Thmey Thmey
ភ្នំពេញ៖ ការអភិវឌ្ឍយ៉ាងឆាប់រហ័ស នៅក្នុងខេត្តព្រះសីហនុ បានធ្វើឲ្យតំបន់ទេសចរណ៍មួយនេះ ប្រឈមមុខនឹងបញ្ហាបរិស្ថាន ទាក់ទងនឹងការបង្ហូរទឹកកខ្វក់ចូលក្នុងសមុទ្រ។ អន្តរក្រសួង កំពុងមមាញឹកដោះស្រាយបញ្ហាទឹកកខ្វក់នេះ ហើយថែមទាំងសន្យាយកមេរៀនពីខេត្តព្រះសីហនុ ទៅអនុវត្តនៅតំបន់ខេត្តទេសចរណ៍ផ្សេងទៀតផង។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ទទួលស្គាល់ថា បញ្ហាដោះស្រាយរឿងទឹកកខ្វក់ គឺជាកំហុសរបស់ក្រសួងសាធារណការ និងក្រសួងពាក់ព័ន្ធផ្សេងទៀត ដែលខ្វះចន្លោះការរៀបចំផែនមេទុកជាមុន ស្របពេលដែលតំបន់ខេត្តព្រះសីហនុ មានការរីកចម្រើន និងអភិវឌ្ឍន៍យ៉ាងឆាប់រហ័ស លើសការរំពឹងទុក។ ក្រោយទទួលពីចំណុចខ្វះរបស់ក្រសួងហើយ លោក ស៊ុន ចាន់ថុល អះអាងថា ក្រសួងពាក់ព័ន្ធទាំងអស់ កំពុងយកចិត្តទុកដាក់ទទួលខុសត្រូវលើបញ្ហានេះ ហើយចេញមុខដោះស្រាយបន្តបន្ទាប់ ដើម្បីកុំឲ្យប៉ះពាល់ដល់ផលប្រយោជន៍ប្រជាពលរដ្ឋ។
លោក ស៊ុន ចាន់ថុល ចាត់ទុកបញ្ហាទឹកកខ្វក់ខេត្តព្រះសីហនុនេះ គឺជាមេរៀនមួយ សម្រាប់ក្រសួង និងស្ថាប័នពាក់ព័ន្ធផ្សេងទៀត យកធ្វើជាបទពិសោធន៍ ក្នុងការរៀបចំទីតាំងកំពុងអភិវឌ្ឍន៍ នៅតាមតំបន់មាត់សមុទ្រផ្សេងទៀតផង។
ថ្លែងក្រោយចុះត្រួតពិនិត្យអាងប្រព្រឹត្តិកម្មទឹកកខ្វក់ក្រុងព្រះសីហនុ ជាមួយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និងខាងក្រសួងបរិស្ថាន រួមទាំងអភិបាលខេត្តព្រះសីហនុ កាលពីថ្ងៃទី៣០ មេសានោះ រដ្ឋមន្ត្រីក្រសួងសាធារណការរូបនេះ បាននិយាយដូច្នេះថា៖«យើងយកមេរៀនពីក្រុងព្រះសីហនុនេះ ទៅអនុវត្តនៅកំពត នៅកែប នៅកោះកុង ។ល។ ខ្ញុំឲ្យធ្វើផែនការមេហើយ។ ទីក្រុងធំ បាត់ដំបង កំពង់ចាម កំពង់ស្ពឺ បានធ្វើ(ផែនការមេ) ហើយ។ល។ ចៀសវាងការខូចខាតបរិស្ថាន ដោយយើងមិនបានគិតគូរពីការចម្រោះទឹកកខ្វក់នេះឯង»។
ដោយសារតែមានការហូរចូលនូវវិនិយោគចម្រុះ និងពហុបំណងតាមរយៈការសាងសង់អគារ ខុនដូរ រមណីយដ្ឋាន និងអគារពាណិជ្ជកម្ម ព្រមទាំងរោងចក្រកាត់ដេរជាច្រើន ទើបធ្វើឲ្យខេត្តព្រះសីហនុ ជួបប្រទះបញ្ហាទឹកកខ្វក់បែបនេះ។ នេះជាការលើកឡើងរបស់លោក ស៊ុន ចាន់ថុល ដែលហាមម្ចាស់អាជីវកម្មទាំងអស់ បង្ហូរទឹកខ្វក់ចូលក្នុងទឹកសមុទ្រ ពោលគឺត្រូវតែរៀបចំប្រព័ន្ធចម្រោះទឹកចូលមកប្រព័ន្ធមេរបស់ខេត្តដែលកំពុងរៀបចំនេះ ដើម្បីធានាគុណភាពទឹកសមុទ្រ និងបរិស្ថានកម្ពុជា។ ហើយបើម្ចាស់អាជីវកម្មណា ប្រព្រឹត្តិខុសបម្រាមនោះ នឹងប្រឈមមុខផ្លូវច្បាប់។
បើតាមលោក ស៊ុន ចាន់ថុល ការរៀបចំអាងប្រព្រឹត្តិកម្មទឹកកខ្វក់នេះ គឺចំណាយថវិកាប្រមាណ២០០លានដុល្លារអាមេរិក ដែលជាជំនួយរបស់ធនាគារអភិវឌ្ឍន៍អាស៊ី (ADB) និងភ្នាក់ងារអភិវឌ្ឍបារាំង (AFD) រួមទាំងប្រាក់បដិភាគរបស់រដ្ឋាភិបាលផងដែរ។
តាមរយៈការរៀបចំបច្ចេកទេសថ្មី អាងប្រព្រឹត្តិកម្មទឹកកខ្វក់នេះ អាចមានលទ្ធភាពចម្រោះទឹកស្អាតបានយ៉ាងតិចជាង៤ម៉ឺនម៉ែត្រគូបក្នុងមួយថ្ងៃ ខណៈបច្ចុប្បន្នទឹកស្អាតប្រើប្រាស់ទូទាំងខេត្តព្រះសីហនុ មានជាង៥ម៉ឺនមែត្រគូប។ ចំណែកអាងចម្រោះទឹកកខ្វក់មួយទៀត គ្រោងធ្វើនៅក្រោមដីបឹងព្រែកទប់ ដែលអាចមានលទ្ធភាពចម្រោះទឹកបាន២ម៉ឺនម៉ែត្រគូប។ ក្រសួងគ្រោងរៀបចំអាងចម្រោះទឹកស្អាតឲ្យបានជាង៦ម៉ឺនម៉ែត្រគូប និងឈានដល់៨ម៉ឺនម៉ែត្រគូប នៅឆ្នាំ២០៣០ ដែលអាចធានាដល់ការប្រើប្រាស់ទឹកស្អាតប្រជាពលរដ្ឋ។ នេះបើតាមរដ្ឋមន្ត្រីក្រសួងសាធារណការ និងដឹកជញ្ជូន។
បច្ចុប្បន្នអាជ្ញាធរខេត្តព្រះសីហនុ កំពុងសាងសងស្ថានីយ៍បូមទឹកកខ្វក់៤កន្លែង ដើម្បីបូមទឹកសំណល់រាវបញ្ចូលទៅអាងចម្រោះ មុននឹងបង្ហូរចូលទៅសមុទ្រ។ ស្ថានីយ៍បូមទាំង៤នេះ រួមមានទី១ នៅក្បែរអគារសណ្ឋាគារអេម៉ារីយ៉ូ ស្ថិតក្នុងសង្កាត់លេខ៣ ។ ទី២ ស្ថិតនៅជាប់បរិវេណសណ្ឋាគារសុខា។ ទី៣ ស្ថិតនៅក្បែរអូរ នៃអគា ឌី ស៊ីហ៊ូ និងទី៤ ស្ថិតនៅម្តុំទីតាំងផ្លូចុះទៅផែអូប័រទៅកោះរ៉ុង ដើមឆ្នេរអូរឈើទាល ៕
