ភ្នំពេញ៖សម្ដេចតេជោ ហ៊ុន សែននាយករដ្ឋមន្រ្តីនៃកម្ពុជា បានថ្លែងបញ្ជាក់ថា ការសាងសង់ស្ពានមិត្តភាពកម្ពុជា-ថៃ តភ្ជាប់ច្រកព្រំដែនអន្តរជាតិ ស្ទឹងបត់-បានណងអៀង គឺជាការបើកនូវទំព័រប្រវត្តិសាស្រ្តថ្មីមួយទៀត រវាងប្រទេសកម្ពុជា និងប្រទេសថៃ ដោយអាចជួយសម្រួល ដល់ការធ្វើដំណើរ រវាងប្រជាពលរដ្ឋប្រទេសទាំងពីរ និងជួយសម្រួលដល់ការធ្វើពាណិជ្ជកម្ម ឆ្លង់កាត់ព្រំដែន រវាងប្រទេសទាំងពីរផងដែរ។ ក្នុងពិធីចាក់បេតុង តភ្ជាប់មុខតំណស្ពានមិត្តភាពកម្ពុជា-ថៃ (ច្រកព្រំដែនស្ទឹងបត់-បានណងអៀន)សម្ដេចតេជោបានថ្លែងថា “ការសាងសង់ស្ពាននេះ គឺជាការបើកនូវទំព័រប្រវត្តិសាស្រ្ត រវាងប្រទេសយើងទាំងពីរ សំដៅធ្វើឲ្យប្រសើរឡើង នូវការធ្វើពាណិជ្ជកម្មឆ្លងកាត់ព្រំដែន កម្ពុជា-ថៃ ហើយបានប្រទេសយើងទាំងពីរ បានបានប្រសិទ្ធនាមស្ពាននេះថា ស្ពានមិត្តភាពកម្ពុជា-ថៃ (ស្ទឹងបត់-បានណងអៀង) ជាស្ពានភ្ជាប់វិស័យ រវាងប្រជាជនខេត្តបន្ទាយមានជ័យ និងខេត្តស្រះកែវ ជាពិសេសផ្សារភ្ជាប់វិស័យ រវាងប្រជាជនកម្ពុជានិងប្រជាជនថៃ ដែលត្រូវបានកត់ត្រាទុក ក្នុងប្រវត្តិសាស្រ្តនៃប្រទេសយើងទាំងពីរ”។ សូមបញ្ជាក់ថា ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ដែលចាក់បេតុងតភ្ជាប់នៅថ្ងៃនេះ បានសាងសង់ដោយកងវិស្វកម្ម នៃកងទ័ពភូមិន្ទរថៃ ហើយសិក្សា និងត្រួតពិនិត្យបច្ចេកទេស ដោយនាយកដ្ឋានហាយវ៉េ (DOH) ក្រសួងដឹកជញ្ជូននៃប្រទេសថៃ ក្រោមជំនួយឥតសំណង ពីរាជរដ្ឋាភិបាលថៃជាង ១៩លានដុល្លារ។ ស្ពាននេះមានប្រវែង ៦២០ម៉ែត្រ មានទទឹង ១៧ម៉ែត្រ ដោយនៅផ្នែកកម្ពុជា មានប្រវែង ២១៥ម៉ែត្រ ចំណែកនៅផ្នែកខាងថៃវិញ មានប្រវែង ៤០៥ម៉ែត្រ៕ដោយ៖ធី លីថូ