[Khmer Home] - កម្ពុជានឹងមានស្ពានមិត្តភាពកម្ពុជា-កូរ៉េឆ្លងកាត់ទន្លេមេគង្គមួយទៀតនាពេលខាងមុខ
2019-04-01
Go to the website published Khmer Home
ភ្នំពេញ៖ រដ្ឋមន្ត្រីក្រសួងសាធារណៈការ និងដឹកជញ្ជូនបានអះអាងថា សម្តេចតេជោ ហ៊ុន សែននាយករដ្ឋមន្ត្រីនៃប្រទេសកម្ពុជា បានសម្រេចស្នើសុំភាគីកូរ៉េឱ្យជួយសាងសង់ស្ពានមិត្តភាពកម្ពុជា-កូរ៉េឆ្លងកាត់ទន្លេឆ្លងកាត់ទន្លេងមេគង្គរួចហើយ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន បានថ្លែងប្រាប់ក្រុមអ្នកសារព័ត៌មាននៅក្នុងពិធីចុះត្រួតពិនិត្យស្ពានមិត្តភាពកម្ពុជា-ជប៉ុន នៅថ្ងៃទី ៣១ ខែមីនា ឆ្នាំ ២០១៩ កន្លងមកថា នាពេលខាងមុខនេះ ប្រជាពលរដ្ឋកម្ពុជានឹងបានឆ្លងស្ពានមិត្តភាពកម្ពុជា-កូរ៉េមួយទៀត តបតាមសំណើរបស់សម្តេចតេជោ ខណៈសំណើនេះ ត្រូវបានទទួលរួចហើយពីភាគីកូរ៉េ តែយ៉ាងណាក៏ដោយលោករដ្ឋមន្ត្រីមិនបានបញ្ជាក់ថា ស្ពាននេះបានសិក្សារួចហើយ ឬសាងសង់ទីតាំងណា និងចំណាយអស់តម្លៃប៉ុន្មាននោះទេ។
លោករដ្ឋមន្ត្រីបន្តថា “យើងឃើញតែស្ពានមិត្តភាពកម្ពុជា-ជប៉ុន និងស្ពានមិត្តភាពកម្ពុជា-ចិន តែមិនទាន់ឃើញស្ពានមិត្តភាពកម្ពុជា-កូរ់េនៅភ្នំពេញ ចឹងសម្តេចតេជោ បានស្នើសុំរួចហើយ ហើយបន្តិចទៀត ក្រែងមានស្ពានមិត្តភាពកម្ពុជា-កូរ៉េមួយទៀត”។
រដ្ឋមន្ត្រីរូបនេះ បានបន្ថែមថា ប្រទេសកម្ពុជាស្វាគមន៍រាល់គម្រោងសាងសង់ស្ពានមិត្តភាពរវាងប្រទេនានាឱ្យតែមានការស្នើសុំ សម្តេចតេជោ ហ៊ុន សែន មិនដែលបដិសេធចំពោះការជួយពីសំណាក់ប្រទេសដែលជាមិត្តទាំងនោះឡើយ និងមិនរើសអើងចំពោះប្រទេសទាំងនោះទេ ឱ្យតែប្រទេសទាំងនោះគោរពអធិបតេយ្យភាព ឯករាជ្យរបស់ប្រទេសកម្ពុជា។
យោងតាមសេចក្ដីប្រកាសព័ត៌មានផ្លូវការរបស់ក្រសួងការបរទេស និងសហប្រតិបត្តិការអន្ដរជាតិកាលពីកន្លងមកនេះ បានឱ្យដឹងថា នៅក្នុងជំនួបសម្ដែងការគួរសមរបស់ លោក Oh Nak-young ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា កាលពីថ្ងៃទី០៩ ខែមីនា លោកទេសរដ្ឋមន្ដ្រី ប្រាក់ សុខុន បានសម្តែងកតញ្ញូតាចំពោះជំនួយឧបត្ថម្ភលើគ្រប់វិស័យ ដែលរដ្ឋាភិបាលកូរ៉េបានផ្តល់ជូនកម្ពុជា និងបានវាយតម្លៃខ្ពស់ចំពោះការឆ្លើយតប របស់រដ្ឋាភិបាលកូរ៉េទទួលយកសំណើសម្តេចតេជោ ហ៊ុន សែន ជួយសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គ៕
