(ភ្នំពេញ)៖ រដ្ឋមន្ត្រីក្រសួង​សាធារណការ​ និង​ដឹក​ជញ្ជូន ឯកឧត្តម ស៊ុន ចាន់ថុល បាន​ស្នើ​វិស័យឯកជនចាប់អារម្មណ៍ខេត្តកំពង់ឆ្នាំង ដែលមានសក្កានុពលដ៏សំខាន់ ពោលគឺមានផ្លូវទឹក ផ្លូវដែក ផ្លូវនិងស្ពានថ្មីកាត់បឹងទន្លេសា​ប និងមាន​ព្រលាន​យន្តហោះ​ដែល​មិនទាន់​វិនិយោគ។ នៅក្នុងពិធីចុះហត្ថលេខាលើអនុស្សរណៈយោគយល់ និងកិច្ចព្រមព្រៀងសហហិរញ្ញប្បទាន រវាង UNDP ជាមួយក្រុមហ៊ុនចិន 4PX Express លើ​គម្រោង​ ផ្សារភ្ជាប់ប្រទេសកម្ពុជា៖ រួមគ្នាឆ្ពោះទៅរកសេដ្ឋកិច្ចឌីជីថល នៅថ្ងៃទី​១៩ មីនា ឯកឧត្តម ស៊ុន ចាន់ថុល បាន​ឱ្យដឹងថា ខេត្តកំពង់ឆ្នាំងមានព្រលានហោះស្រាប់ ប៉ុន្តែបច្ចុប្បន្ន ព្រលាននេះមិនត្រូវបានប្រើប្រាស់ ឬអភិវឌ្ឍនោះទេ។ ជាមួយគ្នានេះ រដ្ឋមន្ត្រីក្រសួងសាធារណការ បានស្នើឲ្យមានការអភិវឌ្ឍ​ព្រលានយន្តហោះក្នុងខេត្ត​កំពង់ឆ្នាំងឡើងវិញ ហើយឯកឧត្តមអះអាង​ថា ​រាជ​រដ្ឋាភិបាល​កម្ពុជា​នឹង​​សម្រួល​​ ​ឲ្យអ្នកវិយោគទាំងឡាយទទួល​បាន​កិច្ចសន្យា​វិនិយោគ ជា​ពិសេស សក្ដានុពល​សាងសង់​ព្រលាន​យន្ដហោះនេះ​តែ​​ម្តង​៕