(ភ្នំពេញ)៖ សាលារាជធានីភ្នំពេញ កាលពីរសៀលថ្ងៃទី០៦ ខែតុលា ឆ្នាំ២០១៧នេះ បានចេញសេចក្តីជូនដំណឹងអំពីការឈប់យកលុយជាផ្លូវការពីរថយន្តឆ្លងកាត់ស្ពានព្រែកព្នៅ នៅក្នុងខណ្ឌព្រែកព្នៅ រាជធានីភ្នំពេញ ដោយចាប់ផ្តើមអនុវត្តនៅពាក់កណ្ដាលខែនេះតែម្តង។ ការចេញប្រកាសអំពីការឈប់យកលុយពីរថយន្តបើកបរលើស្ពានឆ្លងកាត់ទន្លេសាបនេះ ធ្វើឡើងបន្ទាប់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីម្សិលមិញ បានប្រកាសថា រាជរដ្ឋាភិបាលសម្រេចទិញយកមកគ្រប់គ្រងវិញ នូវស្ពាន និងផ្លូវ ដែលសាងសង់ឡើង ដោយក្រុមហ៊ុន លី យ៉ុងផាត់ ក្នុងទឹកប្រាក់វិនិយោគ៤៣លានដុល្លារអាមេរិកនេះ។ លិខិតជូនដំណឹងរបស់សាលារាជធានីភ្នំពេញ បានសរសេរថា «ដើម្បីដោះស្រាយនូវការលំបាក និងជួយលើកកម្ពស់ជីវភាពរស់នៅរបសប្រជាពលរដ្ឋ ពិសេសេសម្រួលដល់ការធ្វើដំណើរទៅមក និងដើម្បីបញ្ចៀសការកកស្ទះចរាចរណ៍ក្នុងអំឡុងពេលជួសជុលស្ពានមិត្តភាព កម្ពុជា-ជប៉ុន (ស្ពានជ្រោយចង្វារចាស់) រាជរដ្ឋាភិបាលក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចទិញយកស្ពាន និងផ្លូវ លី យុងផាត់ (ស្ពាន និងផ្លូវតភ្ជាប់ផ្លូវជាតិលេខ៦ ទៅផ្លូវជាតិលេខ៥) ស្ថិតនៅខណ្ឌព្រែកព្នៅ មកធ្វើការគ្រប់គ្រងវិញ ដោយអនុញ្ញាតឲ្យប្រជាពលរដ្ឋធ្វើចរាចរតាមផ្លូវ និងស្ពាននេះដោយឥតបង់ថ្លៃ។ «ក្នុងន័យនេះ ចាប់ពីវេលាម៉ោង០០:០០នាទី ថ្ងៃទី១៥ ខែតុលា ឆ្នាំ២០១៧ នេះតទៅ ការធ្វើដំណើរឆ្លងកាត់ស្ពាន និងផ្លូវ លី យុងផាត់ ព្រែកព្នៅ នឹងមិនតម្រូវឲ្យបង់ថ្លៃឆ្លងកាត់ទៀតឡើយ»៕