ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញចុះសួរសុខទុក្ខ និងជួបសំណេះសំណាលជាមួយ មន្ត្រីរាជការ បុគ្គលិក និងកម្មករនៃមន្ទីរសាធារណការ និងដឹកជញ្ជូនខេត្តកំពង់ចាម ---- រសៀលថ្ងៃព្រហស្បតិ៍ ៩កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែមីនា ឆ្នាំ២០១៩ នៅមន្ទីរសាធារណការ និងដឹកជញ្ជូនខេត្តកំពង់ចាម ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការ បុគ្គលិក និងកម្មករ នៃមន្ទីរសាធារណការ និងដឹកជញ្ជូន ដោយមានការចូលរួមពីឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលនៃគណៈអភិបាលខេត្ត និងថ្នាក់ដឹកនាំមន្ត្រីរាជការ បុគ្គលិក និងកម្មក នៃមន្ទីរសាធារណការ និងដឹកជញ្ជូន ប្រមាណ១០០នាក់។ ឯកឧត្ដមទេសរដ្ឋមន្ត្រី បានមានប្រសាសន៍ថា៖ ហេដ្ឋារចនាសម្ព័ន្ធដឹកជញ្ជូនគឺជាឆ្អឹងខ្នងសេដ្ឋកិច្ចជាតិ យ៉ាងសំខាន់ ជាពិសេសប្រព័ន្ធហេដ្ឋារចនាសម្ព័ន្ធដឹកជញ្ជូនល្អអាចឱ្យបងប្អូនប្រជាពលរដ្ឋដឹកជញ្ជូន កសិផលផ្សេងៗបានច្រើន ទាន់ពេលវេលា ចំណាយតិច និងអាចទាក់ទាញវិនិយោគិនជាតិ និង អន្តរជាតិមកបង្កើតការងារធ្វើ ដើម្បីបង្កើនប្រាក់ចំណូលគ្រួសារផងដែរ។ ជាមួយគ្នានោះផងដែរ ឯកឧត្ដមទេសរដ្ឋមន្ត្រីបានជម្រាបជូនអំពីគម្រោងកំពុងបន្ត និងគម្រោងដែលនឹងត្រូវអនុវត្តលើហេដ្ឋារចនាសម្ព័ន្ធដឹកជញ្ជូនសំខាន់ៗមួយចំនួនដូចជា៖ គម្រោងសាងសង់កំពង់ផែទឹកជ្រៅខេត្តព្រះសីហនុ គម្រោងដឹកជញ្ជូនតាមទន្លេ និងគម្រោងអភិវឌ្ឍហេដ្ឋារចនាសម្ព័ន្ធដឹកជញ្ជូនផ្សេងៗទៀតជាច្រើន ដោយហេតុថាយើងជាប្រទេសឋិតក្នុងតំបន់មហាអនុតំបន់មេគង្គ ដែលនាពេលថ្មីៗកន្លងទៅនេះបណ្ដាប្រទេសក្នុងតំបន់នេះបានព្រមព្រៀងគ្នាបើកច្រកទ្វារព្រំដែន និងដាក់ខ្សែផ្លូវដឹកជញ្ជូនឆ្លងកាត់ប្រទេសនីមួយៗបន្ថែមទៀត ធ្វើឱ្យសេដ្ឋកិច្ចគ្រួសារ និងសេដ្ឋកិច្ចសង្គមជាតិកាន់តែរីកចម្រើនថែមទៀត ។ ឯកឧត្ដមទេសរដ្ឋមន្ត្រី ក៏បានជម្រាបផងដែរអំពីសមិទ្ធផលនានា ដែលកើតចេញពីផែនការ១០០ថ្ងៃ ជាពិសេសកម្មវិធីថែទាំផ្លូវ (ROAD CARE Mobile App) ដែលអាចឱ្យប្រជាពលរដ្ឋចូលរួមរាយការណ៍ពីព័ត៌មានផ្លូវជង្ហុកសំបុកមាន់ ជូនក្រុមការងារជួសជុល និងថែទាំ បានទាន់ពេលវេលា ដើម្បីកុំឱ្យផ្លូវខូចកាន់តែធំ។ ឯកឧត្ដមទេសរដ្ឋមន្ត្រីក៏បានថ្លែងអំណរគុណ និងកោតសរសើរយ៉ាងជ្រាលជ្រៅដល់ថ្នាក់ដឹកនាំមន្ទីរ និងមន្ត្រីទាំងអស់ ដែលខិតខំប្រឹងប្រែងអស់ពីកម្លាំងកាយចិត្តក្នុងបុព្វហេតុជាតិមាតុភូមិ និងនិងបន្តធ្វើការបម្រើប្រជាពលរដ្ឋឱ្យបានកាន់តែប្រសើរមួយកម្រិតទៀត ស្របតាមប្រសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺធ្វើឱ្យបានលឿន ធ្វើឱ្យមាន ប្រសិទ្ធភាព និងធ្វើឱ្យមានតម្លាភាព។ ឆ្លៀតក្នុងឱកាសនោះផងដែរ ឯកឧត្ដមទេសរដ្ឋមន្ត្រីក៏បានផ្ដល់កិត្តិយសបំពាក់គ្រឿងឥស្សរិយយស ថ្នាក់អស្សរិទ្ធិ មេដាយមាស និងមេដាយប្រាក់ ជូនមន្ត្រីឆ្នើមនៃមន្ទីរសាធារណការ និងដឹកជញ្ជូនខេត្ត កំពង់ចាម ព្រមទាំងជូនថវិកាក្នុងម្នាក់ៗចំនួន៥ម៉ឺនរៀលផងដែរ។ 14/03/2019-