[Rasmei Kampuchea Daily News] - ស្ពានជ្រោយចង្វារទី១នឹងដាក់ឱ្យដំណើរការជាបណ្តោះអាសន្នមុនបុណ្យចូលឆ្នាំខ្មែរ
ភ្នំពេញ៖តាមប្រភពពីមន្ត្រីក្រសួងសាធារណការនិងដឹកជញ្ជូនបានឱ្យដឹងថាស្ពានជ្រោយចង្វារទីមួយនឹងដាក់ឱ្យដំណើរការជាបណ្តោះអាសន្នមុនបុណ្យចូលឆ្នាំខ្មែរដើម្បីសម្រួលចរាចរណ៍ឱ្យមានលក្ខណៈងាយស្រួល។
កាលពីថ្ងៃទី២៧ខែកុម្ភៈឆ្នាំ២០១៩លោកតូចចាន់កុសលរដ្ឋមន្ត្រីស្តីទីក្រសួងសាធារណការ និងដឹកជញ្ជូន បានចុះត្រួតពិនិត្យវឌ្ឍនភាពការងារនៃគម្រោងស្តារឡើងវិញស្ពានមិត្តភាពកម្ពុជា-ជប៉ុន(ស្ពានជ្រោយចង្វារទី១)ដើម្បីធានាថាស្ពាននេះអាចដាក់ឱ្យសាធារណៈជនប្រើប្រាស់បានមុនថ្ងៃបុណ្យចូលឆ្នាំខ្មែរខាងមុខនេះ។ជាលទ្ធផលគម្រោងនេះប្រព្រឹត្តទៅយ៉ាងរលូនដោយសម្រេចបាន៩៧ភាគរយលឿនជាងការគ្រោងទុកចំនួន១១ភាគរយ។
ក្រសួងសាធារណការនិងដឹកជញ្ជូនក្រុមហ៊ុនសាងសង់និងក្រុមហ៊ុនទីប្រឹក្សាបច្ចេកទេសជប៉ុនប្តេជ្ញាចិត្តបញ្ចប់ការងារដែលនៅសេសសល់ដើម្បីដាក់ស្ពាននេះឱ្យដំណើរការក្នុងគោលបំណងសម្រួលដល់ការធ្វើចរាចររបស់ប្រជាពលរដ្ឋក្នុងកំឡុងពេលបុណ្យចូលឆ្នាំខ្មែរខាងមុខនេះ។មន្ត្រីក្រសួងសាធារណការនិងដឹកជញ្ជូនបានអះអាងផងដែរថាដំណើរការជួសជុលស្ពានអាចនឹងបញ្ចប់ទាំងស្រុងនៅអំឡុងខែមិថុនា។
សូមបញ្ជាក់ស្ពានជ្រោយចង្វារទី១ត្រូវបានផ្អាកដំណើរឆ្លងកាត់និងជួសជុលឡើងវិញកាលពីកំឡុងខែតុលាឆ្នាំ២០១៧បន្ទាប់ពីស្ពានដែលសាងសង់ឡើងក្រោមជំនួយរដ្ឋាភិបាលជប៉ុននាអំឡុងឆ្នាំ១៩៦៦មួយនេះមានសភាពទ្រុធទ្រោមខ្លាំង។ការជួសជុលស្តារទ្បើងវិញនេះត្រូវបានគាំទ្រដោយហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងទឹកប្រាក់ប្រមាណជា ៣៣លានដុល្លារអាមេរិក៕
