ព្រះសីហនុ ថ្ងៃទី១៤ ខែកុម្ភៈ ឆ្នាំ២០១៩ -នៅរសៀលថ្ងៃពុធ ៩កើត ខែមាឃ ឆ្នាំច សំរឹទ្ធិស័កព.ស ២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ២០១៩ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញចុះពិនិត្យដំណើរការធ្វើអាងច្រោះទឹកកខ្វក់ នៅចុងឆ្នេរអូរឈើទាល ស្ថិតក្នុងសង្កាត់លេខ៤ ក្រុង ខេត្តព្រះសីហនុ ខណៈពេលដែលក្រុមការងារបច្ចេកទេសកំពុងដំណើរការសាងសង់យ៉ាងមមាញិក ដើម្បីទប់ស្កាត់សំណល់រឹង រាវដែលកំពុងប្រឈមដល់បរិស្ថានតំបន់ឆ្នេរ និងទឹកសមុទ្រ ។ ឯកឧត្តមទេសរដ្ឋមន្ត្រី ស៊ុន ចាន់ថុល មានប្រសាសន៍ថា ខេត្តព្រះសីហនុមានការអភិវឌ្ឍយ៉ាងលឿនក្នុងឆ្នាំ២០១៨កន្លងមក មានអគារពាណិជ្ជកម្ម សណ្ឋាគារតូច ធំ ខុនដូ ផ្ទះសំណាក់ កំពុងកើតឡើងជាបន្តបន្ទាប់ បញ្ហាសំណល់រឹង រាវក៏មានការកើនឡើងផងដែរ ទាមទារឱ្យរាជរដ្ឋាភិបាលគិតគូរដោះស្រាយជាចាំបាច់នូវប្រព័ន្ធអាងច្រោះទឹកកខ្វក់ ដើម្បីបញ្ចៀសនឹងកាត់ បន្ថយការបំពុលបរិស្ថានទឹកសមុទ្រ និងឆ្នេរខ្សាច់ ។ ឯកឧត្តមបានបញ្ជាក់ថា បញ្ហាទឹកកខ្វក់ហូរចូលសមុទ្រនេះ រដ្ឋាភិបាលបានឱ្យមន្រ្តីជំនាញសិក្សារៀបចំផែនការមេ សាងសង់កែសម្រួលអាងច្រោះទឹកកខ្វក់នៅក្នុងទីប្រជុំជនក្រុងព្រះសីហនុ ៤កន្លែង ដើម្បីទប់ស្កាត់សំណល់រឹង រាវកុំឱ្យហូរចូលសមុទ្រ ដើម្បីរក្សាសោភណភាពឆ្នេរ ប្រសិនបើឆ្នេរខ្សាច់នឹងទឹកសមុទ្រខូច ភ្ញៀវទេសចរក៏គេឈប់មកលេងកម្សាន្តខេត្តតំបន់ឆ្នេររបស់យើង ដូច្នេះយើងត្រូវរួមគ្នាដោះស្រាយ ថែរក្សាសោភណភាពឆ្នេរ ។ រាជរដ្ឋាភិបាលកំពុងជំរុញឱ្យគណៈកម្មាធិការអភិវឌ្ឍន៍តំបន់ឆ្នេរសមុទ្រកម្ពុជា រៀបចំធ្វើអាងចម្រោះទឹកកខ្វក់នេះ ក្នុងគោលបំណងបញ្ចៀសផលប៉ះពាល់ដល់បរិស្ថានតំបន់ឆ្នេរ ។ ឯកឧត្តមបានបញ្ជាក់ថា ដោយមានកិច្ចសហការ និងគាំទ្រពីគណ:កម្មាធិការថ្នាក់ជាតិគ្រប់គ្រងនិងអភិវឌ្ឍន៍តំបន់ឆ្នេរ សហការជាមួយរដ្ឋបាលខេត្តព្រះសីហនុ ធ្វើស្ថានីយបូមទឹកកខ្វក់ចំនួន ៤កន្លែងផ្សេងគ្នា ហើយស្ថានីយបូមទាំង៤នេះ នឹងបូមទឹកកខ្វក់បញ្ចូលទៅស្ថានីយច្រោះទឹកកខ្វក់នៅចុងឆ្នេរអូរឈើទាល ដែលមានទំហំជាង ១៦ហិកតា កំពុងតែត្រូវបានកែលម្អ ដើម្បីច្រោះទឹកកខ្វក់មុននឹងបង្ហូរចូលទៅសមុទ្រ ចៀសវាងការប៉ះពាល់ឆ្នេរខ្សាច់ និងទឹកសមុទ្រ ចូលរួមចំណែកកាត់បន្ថយ ទប់ស្កាត់ការបំពុលទឹកសមុទ្រ និងឆ្នេរខ្សាច់ក្នុងខេត្តព្រះសីហនុ ។ ឯកឧត្តមទេសរដ្ឋមន្ត្រីសង្ឃឹមថា បញ្ហាទឹកកខ្វក់ហូរចូលសមុទ្រនៅខេត្តព្រះសីហនុ នឹងត្រូវដោះស្រាយបាននូវពេលខាង មុខឆាប់ៗនេះជាការគ្រោងទុកជាក់ជាមិនខាន៕