ជំរុញ ពង្រឹង និងបង្ខិតសេវាសាធារណៈទៅជិតប្រជាពលរដ្ឋ ឲ្យបានលឿន មានប្រសិទ្ធភាព និងតម្លាភាព តាមរយៈប្រព័ន្ធបច្ចេកវិទ្យាព័ត៌មាន និងទីតាំងផ្តល់សេវាសាធារណៈ --- ថ្ងៃព្រហស្បតិ៍ ៣កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៧ ខែកុម្ភៈ ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ឯកឧត្ដមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំលើកដំបូងរបស់គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការនៃក្រសួងសាធារណការ និងដឹកជញ្ជូន ដោយមានការចូលរួមពីសំណាក់ថ្នាក់ដឹកនាំសំខាន់ៗ និងមន្ត្រីរាជការរបស់ក្រសួង។ កកិច្ចប្រជុំនេះមានគោលបំណងពិភាក្សាលើលទ្ធភាពពង្រឹងការជួយជ្រោមជ្រែងផ្នែកបណ្ដុះបណ្ដាលធនធានមនុស្សថ្នាក់ក្រោមជាតិ ឱ្យមានសមត្ថភាពគ្រប់គ្រាន់ ក្នុងការបម្រើសេវាសាធារណៈឱ្យមានប្រសិទ្ធភាពខ្ពស់បំផុត ព្រមទាំងការប្រកាសសុពលភាពសមាសភាពរបស់គណៈកម្មការ និងលេខាធិការដ្ឋានរបស់ក្រសួងផងដែរ។ ថ្លែងនៅក្នុងអង្គពិធីទាំងមូល ឯកឧត្ដមទេសរដ្ឋមន្ត្រីបានបង្ហាញការគាំទ្រយ៉ាងពេញទំហឹងក្នុងការជំរុញការផ្តល់សេវាសាធារណៈទៅជិតប្រជាពលរដ្ឋ តាមរយៈមន្ទីរសាធារណការ និងដឹកជញ្ជូន មណ្ឌលសេវារបស់ក្រសួង ហាងលក់យានជំនិះ អង្គភាពច្រកចេញចូលតែមួយ ការិយាល័យច្រកចេញចូលតែមួយ និងយន្តការច្រកចេញចូលតែមួយ ជំរុញឱ្យមានអភិបាលកិច្ចល្អ ពង្រឹងគុណភាពសេវាសាធារណៈ បណ្ដុះស្មារតីភាពជាម្ចាស់ លើកកម្ពស់ការចូលរួមរបស់ប្រជាពលរដ្ឋ និងឆ្លើយតបតាមតម្រូវការរបស់ប្រជាពលរដ្ឋ។ លើសពីនេះទៅទៀត ក្រសួងសាធារណការ និងដឹកជញ្ជូនក៏បានបើកឱ្យមានមណ្ឌលប្ដូរ និងពន្យារបណ្ណបើកបរនៅតាមផ្សារទំនើបអ៊ីអន១ និងអ៊ីអន២ ឈៀកចល័ត និងការដាក់ពាក្យទទួលសេវាដោយខ្លួនឯងតាម ប្រព័ន្ធស្វ័យប្រវត្តិកម្មចុះបញ្ជីយានយន្ត ត្រួតពិនិត្យលក្ខណៈបច្ចេកទេសយានជំនិះ ដាក់ពាក្យប្រឡងយកបណ្ណបើកបរ និងអាជីវកម្មដឹកជញ្ជូនផ្លូវគោក ដែលអាចឱ្យប្រជាពលរដ្ឋប្រើប្រាស់សេវានេះបានគ្រប់ទីកន្លែង និងគ្រប់ពេលវេលា ទោះបីនៅក្រៅប្រទេសក្ដី ក៏អាចប្រើសេវាទាំងនេះបានដែរ។