[Khmer share] - ក្រុមហ៊ុនចិន ប្រកាសវិនិយោគ សាងសង់ផ្លូវលឿនបំផុត ពីភ្នំពេញ-បាវិត
2019-01-23
Go to the website published Khmer share
ក្រុមហ៊ុនសាជីវកម្មស្ពានថ្នល់ នៃប្រទេសចិនបានប្រកាសវិនិយោគសាងសង់ផ្លូវល្បឿនលឿនភ្នំពេញបាវិត នៃខេត្តស្វាយរៀង នាពេលខាងមុខនេះ ខណៈក្រុមហ៊ុននេះ ក៏ទទួលគំរោងសាងសង់ផ្លូវល្បឿនលឿនភ្នំពេញ ខេត្តព្រះសីហនុ នាពេលឆាប់ៗនេះផងដែរ។
ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងបំពេញទស្សនកិច្ច នៅប្រទេសចិន តំណាងក្រុមហ៊ុនវិនិយោគ សាជីវកម្មស្ពាន និងថ្នល់ចិន (China Road and Bridge Corporation CRBC) បានមានប្រសាសន៍ជំរាបជូនសម្តេច នាព្រឹកថ្ងៃទី២១ មករាកន្លងមកថា ក្រុមហ៊ុនមានគម្រោងសាងសង់ផ្លូវល្បឿនលឿន ពីភ្នំពេញទៅកាន់ព្រំដែនកម្ពុជា វៀតណាមបាវិត ការស្ថាបនាផ្លូវលេខ១៥–៥១ ដែលតភ្ជាប់ខេត្តកោះកុង ពោធិ៍សាត់ និងខេត្តបាត់ដំបង ផងដែរ។
ជាមួយគ្នានេះតំណាងក្រុមហ៊ុន China Road and Bridge Corporation CRBC បានរាយការណ៍ជូនសម្តេចនាយករដ្ឋមន្ត្រី អំពីបច្ចុប្បន្នភាពនៃគម្រោងវិនិយោគរបស់ខ្លួន នៅក្នុងប្រទេសកម្ពុជា និងផែនការសម្រាប់អនុវត្តន៍ នៅពេលខាងមុខ ដែលកន្លងមកក្រុមហ៊ុនវិនិយោគសាជីវកម្មស្ពាន និងថ្នល់ចិន បានរួមចំណែកសាងសង់ផ្លូវ និងស្ពាន ជាច្រើនក្នុងប្រទេសកម្ពុជា។
ក្រុងបាវិតត្រូវបានរដ្ឋាភិបាលដាក់បញ្ចូល ក្នុងផែនការអភិវឌ្ឍន៍ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ដែលបច្ចុប្បន្នទីក្រុងនេះបានទាក់ទាញការវិនិយោគយ៉ាងច្រើន ដោយបច្ចុប្បន្នមានតំបន់សេដ្ឋកិច្ចពិសេសប្រមាណ១០ទីតាំង មានទីក្រុងរណបចំនួនពីរ គឺទីក្រុងរណប Empire World ដែលបាននិងកំពុងសាងសង់យ៉ាងសកម្ម និងទីក្រុងរណបហេង ហេង។
អ្នកជំនាញអចលនទ្រព្យអន្តរជាតិ និងជាអនុប្រធានសមាគមអ្នកជំនាញអចលនទ្រព្យកម្ពុជា លោកសោម កែវម៉ាលីដា ហៅ Andy បានមានប្រសាសន៍ឲ្យដឹងថា ទីក្រុងបាវិតបច្ចុប្បន្នមានស្ថានភាពដូចគ្នា នឹងទីក្រុងព្រះសីហនុកាលពី២ទៅ៣ឆ្នាំមុន ដែលកំពុងទទួលបានការចាប់អារម្មណ៍ និងទាក់ទាញការវិនិយោគពីអ្នកវិនិយោគក្នុងស្រុកបណ្តើរៗ ហើយតម្លៃដីធ្លីក៏នៅមានភាពសមរម្យអាចវិនិយោគបាន ប៉ុន្តែរយៈពេលពីរទៅ៣ឆ្នាំខាងមុខ តម្លៃដីធ្លីនៅក្រុងបាវិតនឹងកើនឡើងខ្ពស់ដូចនៅក្រុងព្រះសីហនុ និងក្រុងប៉ោយប៉ែតនាពេលបច្ចុប្បន្ននេះ។
លោកបន្តថា “តាមរយៈការវិនិយោគរបស់ Empire World ដែលគ្រោងវិនិយោគលើក្រុងរណប១១៥០ហិកតា នឹងធ្វើឲ្យទីក្រុងនេះទាក់ទាញអ្នកវិនិយោគជាតិ អន្តរជាតិចូលទៅវិនិយោគនិងរស់នៅប្រមាណ២៥ ទៅ៣០ម៉ឺននាក់នៅឆ្នាំ២០២៥ខាងមុខនេះ”។ លោកបន្តថា “ទីក្រុងបាវិតមានលក្ខខ័ណ្ឌភូមិសាស្ត្រអំណោយផលដ៏ល្អមួយ ដោយសារវាស្ថិតនៅចំណុចកណ្តាលរវាងក្រុងភ្នំពេញ និងក្រុងហូជីម៉ិញ ប្រទេសវៀតណាម ស្ថិតនៅជាប់ជាមួយនឹងគំរោងផ្លូវខ្សែក្រវ៉ាត់១ ផ្លូវ១របស់ចិន និងជាទីក្រុងស្ថិតក្រោមផែការអភិវឌ្ឍន៍ របស់រដ្ឋាភិបាលជាទីក្រុងពិសេស”។
លោកសោម កែវ ម៉ាលីដា បានបន្តថា ជាមួយនឹងផែនការអភិវឌ្ឍន៍ជាក់លាក់ រដ្ឋាភិបាលបាន និងកំពុងរៀបចំប្លង់គោលអភិវឌ្ឍន៍ទីក្រុងនេះហើយ ដោយមានការបែងចែកផែនការប្រើប្រាស់ដីច្បាស់លាស់ តំបន់ណាជាតំបន់ឧស្សាហកម្ម តំបន់ណាត្រូវរៀបចំជាតំបន់កសិកម្ម លំនៅដ្ឋាន មជ្ឈមណ្ឌលពាណិជ្ជកម្ម សួនសាធារណៈ និងតំបន់សេដ្ឋកិច្ច ពិសេសជាដើម៕
