[Phnom Penh Reporter] - រដ្ឋបាលខណ្ឌទួលគោកកំពុងបើកយុទ្ធនាការជួសជុលជង្ហុក គ្រលុកសម្បុកមាន់លើផ្លូវលេខ១៩២និងអំពាវអោយប្រជាពលរដ្ឋ ផ្តល់ព័ត៌មានពីទីតាំងជង្ហុកដែលបងប្អូនឃើញ
ភ្នំពេញ៖ រដ្ឋបាលរាជធានីភ្នំពេញ នាពេលបច្ចុប្បន្ននេះបាននឹងកំពុងយកចិត្តទុកដាក់លើការងារជួសជុល ថែទាំផ្លូវខណៈដែលយុទ្ធនាការជួសជុលជង្ហុក (គ្រលុកសម្បុកមាន់) តាមដងផ្លូវសាធារណៈបាននឹងកំពុងធ្វើសកម្មភាពយ៉ាងសកម្មនិងបានសម្រេចលទ្ធផលប្រមាណជាង៩០ភាគរយហើយនោះ ។
ជាក់ស្ដែង កាលពីរសៀលថ្ងៃទី២៥ ខែធ្នូ ឆ្នាំ២០១៨ តាមបណ្ដោយ ផ្លូវលេខ១៩២ នៅចន្លោះចាប់ពីផ្លូវលេខ២៤៧ រហូតដល់ផ្លូវលេខ២៦៥ ប្រវែងប្រហែលជាង៨០០ម៉ែត្រ ក្នុងមូលដ្ឋានសង្កាត់ទឹកល្អក់ទី៣ ខណ្ឌទួលគោក ដែលកន្លងមក ទទួលរងការខូចខាត ដោយមានក្រលុកសំបុកមាន់ បង្កឲ្យបងប្អូនប្រជាពលរដ្ឋ ធ្វើដំណើរឆ្លងកាត់ទើប រដ្ឋបាលសាលារាជធានីភ្នំពេញ សម្រេចធ្វើការជួសជុល និងអ៊ុតកៅស៊ូ តែម្តងដើម្បីដាក់ជូនបងប្អូនប្រជាពលរដ្ឋ ងាយស្រួលក្នុងការធ្វើដំណើរ។
ប៉ុន្តែទោះបីជាយ៉ាងណាក្តីអាជ្ញាធរខណ្ឌទួលគោកសូមអំពាវនាវដល់បងប្អូនប្រជាពលរដ្ឋ ដែលរស់នៅសងខាងផ្លូវ១ខ្សែនេះ ចូលរួមសហការកុំ ដាក់តាំងលក់លើចិញ្ជើមផ្លូវលើសពី១ភាគ៣ បន្តទៀត ដើម្បីកាត់បន្ថយការកកស្ទះទៀត និងចូលរួមលើកសោរភណ្ឌភាពរាជធានីរបស់យើង។
គួរបញ្ជាក់ថា កន្លងមកថ្មីៗនេះ ក៏ដូចជាបច្ចុប្បន្នរដ្ឋបាលរាជធានីភ្នំពេញបានធ្វើការអំពាវអោយប្រជាពលរដ្ឋចូលរួមសហការប្រាប់ផ្តល់ព័ត៌មានទីតាំងជង្ហុកដែលបងប្អូនឃើញ ដោយភ្ជាប់ជាមួយរូបភាពបញ្ជាក់នូវទីតាំងភូមិសាស្ត្រ ផ្លូវ សង្កាត់ និងខណ្ឌឱ្យបានច្បាស់លាស់ ដើម្បីក្រុមការងារងាយស្រួលដោះស្រាយជួសជុលផ្លូវខណៈដែលយុទ្ធនាការជួសជុលជង្ហុក (គ្រលុកសម្បុកមាន់) តាមដងផ្លូវសាធារណៈបាននឹងកំពុងចាប់ផ្តើមជាទ្រង់ទ្រាយធំ៕
