កណ្តាល៖ ព្រឹកថ្ងៃទី១៤ ខែធ្នូ ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតី សម្ពោធនូវចំណតកំពង់ផែកុងតឺន័រ LM១៧ ជំហានទី២ នៃគម្រោងពង្រីកហេដ្ឋារចនាសម្ព័ន្ធ របស់កំពង់ផែស្វយ័តភ្នំពេញដាក់ឲ្យប្រើប្រាស់ជាផ្លូវការ ដែស្ថិតនៅភូមិ កណ្តាលលើ ឃុំបណ្តាយដែក ស្រុកកៀនស្វាយ ខេត្តកណ្តាល ។ ពិធីសម្ពោធនោះ មានការចូលរួមពីសំណាក់ លោក ហ៊ឺ បាវី ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពុងផែស្វយ័តភ្នំពេញ និងមានការចូលរួមពីសំណាក់ថ្នាក់ដឹកនាំជាច្រើនរូប រួមទាំងកម្មករ និយោជិត និងប្រជាពលរដ្ឋជាច្រើននាក់ ។ ក្នុងឱកាសនោះលោករដ្ឋមន្ត្រីបានថ្លែងបញ្ជាក់អំពីភាពរីកចម្រើនរបស់កម្ពុជាលើវិស័យផ្លូវទឹក ផ្លូវគោគ និងផ្លូវដែក ដែលផ្តល់លក្ខណៈងាយស្រួលក្នុងការធ្វើដំណើរ និងដឹកជញ្ជូនផ្សេង ដោយថ្មីនេះក្រសួងទើបានសម្ពោធដាក់ឲ្យដំណើរការនូវកម្មវិធីថែទាំផ្លូវ (ROAD CARE mobile app) ។ ទន្ទឹមនឹងនេះលោករដ្ឋមន្ត្រីរំឭកថា ភាពរីកចម្រើនទាំងអស់នេះ ដោយសារប្រទេសមានសន្តិភាព ទើបផ្តល់ឱកាសដល់រាជរដ្ឋាភិបាលធ្វើការអភិវឌ្ឍន៍ប្រទេសឲ្យមានការរីកចម្រើនដូចសព្វថ្ងៃនេះ ។ សូមជម្រាបថា ក្នុងពិធីសម្ពោធនេះ មានពិធីកាត់ខ្សែបូ និងចុចប៊ូតុង​ជានិម្មិតរូប ដើម្បីដាក់ឲ្យដំណើរការ ជាផ្លូវការនូវចំណតកំពង់ផែកុងតឺន័រ LM១៧ ជំហានទី២ នៃគម្រោងពង្រីកហេដ្ឋារចនាសម្ព័ន្ធ របស់កំពង់ផែស្វយ័តភ្នំពេញ និងមានដំណើរទស្សនកិច្ចចំណតកំពង់ផែ កុងតឺន័រ ៕