[Khmer share] - កម្ពុជា ខ្ចីលុយ៧០លានដុល្លារ ពីADB ដើម្បីឲ្យក្រុមហ៊ុនចិន ជួសជុលកែលំអផ្លូវជាតិលេខ១ និងលេខ៦
2018-12-14
Go to the website published Khmer share
ធនាគារ អភិវឌ្ឍន៍អាស៊ី បានផ្តល់កម្ចីសម្បទានចំនួន៧០លានដុល្លារអាមេរិក ដល់រាជរដ្ឋាភិបាលកម្ពុជា សម្រាប់គម្រោងកែលំអផ្លូវជាតិលេខ១ និងផ្លូវជាតិលេខ៦ ដើម្បីសម្រួលដល់ចរាចរណ៍ឲ្យកាន់តែប្រសើរឡើងថែមទៀត។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន កាលពីរសៀលថ្ងៃទី១៣ ខែធ្នូ ឆ្នាំ២០១៨ បានចុះហត្ថាលេខាកិច្ចសន្យាលើកម្រិតជួសជុលថែទាំកំណាត់ផ្លូវជាតិទាំង ២ខ្សែនេះ ឲ្យទៅក្រុមហ៊ុនម៉ៅការសាងសង់របស់ប្រទេសចិន ដើម្បីធ្វើការស្ថាបនាបន្ថែមទៀត ដោយដាក់លូសងខាងផ្លូវសម្រាប់រំដោះទឹកភ្លៀងផងដែរ។
លោក ស៊ុន ចាន់ថុល មានប្រសាសន៍ថា រាជរដ្ឋាភិបាលកម្ពុជា បានទទួលកម្ចីសម្បទានពីធនាគារអភិវឌ្ឍន៍ស៊ីចំនួន៧០លានដុល្លារអាមេរិក ដើម្បីយកមកកែលំអបណ្ដាញផ្លូវជាតិលេខ១ និងផ្លូវជាតិលេខ៦ ដែលបច្ចុប្បន្នជាកម្រាលកៅស៊ូ DBST ទៅជាកម្រាលកៅស៊ូ AC និងជួសជុលផ្លូវជាតិលេខ ៦ បច្ចុប្បន្នដែលកម្រាលកៅស៊ូ AC ស្រាប់ និងស្ថាបនាលូសងខាងផ្លូវ ដើម្បីរំដោះទឹកភ្លៀងចេញ។
លោក ស៊ុន ចាន់ថុល មានប្រសាសន៍បន្តថា ការលើកម្រិត និងថែទាំផ្លូវជាតិលេខ១ នឹងធ្វើឡើងពីកំណាត់គីឡូម៉ែត្រលេខ៦៣ អ្នកលឿង ដល់គីឡូម៉ែត្រ១៥៩ ក្រុងបាវិតព្រំដែនកម្ពុជា វៀតណាម និងផ្លូវជាតិលេខ ៦ ពីកំណាត់គីឡូម៉ែត្រលេខ៣១៧ ក្រុងសៀមរាប ដល់គីឡូម៉ែត្រ៣៦៧ ស្រុកក្រឡាញ។
ក្រៅពីគម្រោងកែលំអផ្លូវថ្នល់នេះ ក៏មានការស្ថាបនាមន្ទីរពិសោធន៍សម្ភារៈ សំណង់ចំនួន៤កន្លែងទៀតនៅខេត្តក្រចេះ កំពត សៀមរាប និងខេត្តពោធិ៍សាត់ ដើម្បីបង្កលក្ខណៈងាយស្រួលឲ្យក្រសួងសាធារណការ និងដឹកជញ្ជូន ធ្វើការត្រួតពិនិត្យបច្ចេកទេសការស្ថាបនាផ្លូវថ្នល់ ឲ្យកាន់តែមានគុណភាពរឹងមាំល្អ។
ដោយឡែកការស្ថាបនា និងថែទាំកំណាត់ផ្លូវទាំងពីរនេះ ដែលផ្តល់កិច្ចសន្យាឲ្យទៅក្រុមហ៊ុនចិននោះ នឹងប្រើប្រាស់រយៈពេលសរុប៥៤ខែ ដោយចាប់ផ្ដើមបើកការដ្ឋានសាងសង់ពីខែមករា ឆ្នាំ២០១៩ រហូតដល់ខែមិថុនា ឆ្នាំ២០៣០៕
