ក្រសួងសាធារណការ និងក្រសួងរ៉ែ និងថាមពល ចុះ MoU ជំរុញកិច្ចសហប្រតិបត្តិការក្នុងការដំឡើងភ្លើងបំភ្លឺដោយប្រើថាមពលពន្លឺព្រះអាទិត្យតាមបណ្តាញផ្លូវសាធារណៈ ភ្នំពេញ៖ ក្រសួងសាធារណការ និងដឹកជញ្ជូន ចុះអនុស្សរណៈនៃការយោគយល់គ្នា ជាមួយក្រសួងរ៉ែ និងថាមពល ជំរុញកិច្ចសហប្រតិបត្តិការក្នុងការដំឡើងភ្លើងបំភ្លឺដោយប្រើថាមពលពន្លឺព្រះអាទិត្យតាមបណ្តាញផ្លូវសាធារណៈ និងផ្លូវថ្នល់នានា ដើម្បីជួយលើកកម្ពស់សុវត្ថិភាពចរាចរណ៍ និងសន្តិសុខតាមបណ្តាញផ្លូវសាធារណៈ ជាពិសេសរួមចំណែកកាត់បន្ថយគ្រោះថា្នក់ពេលយប់ តាមបណ្តាញផ្លូវថ្នល់។ ការចុះអនុស្សរណៈនៃការយោគយល់គ្នាខាងលើត្រូវបានធ្វើឡើងនាព្រឹកថ្ងៃអង្គារ ទី១៤ ខែកក្កដា ឆ្នាំ២០២៦ នេះ ក្រោមការអញ្ជើញជាអធិបតីដោយ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល។ ពិធីនេះក៏មានការអញ្ជើញចូលរួមដោយ ឯកឧត្តម ប្រាំង ជលសា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជា ឯកឧត្តម លោកជំទាវ ថ្នាក់ដឹកនាំក្រសួងទាំង២ អភិបាលអភិបាលរង នៃគណៈអភិបាលរាជធានី-ខេត្ត និងមន្រ្តីជំនាញពាក់ព័ន្ធ។ បើតាមគណនីហ្វេសប៊ុក ឯកឧត្តម កែវ រតនៈ បានឱ្យដឹងថាប្រព័ន្ធអំពូលបំភ្លឺផ្លូវថាមពលពន្លឺព្រះអាទិត្យនេះមានតម្លៃប្រមាណ៥ លានដុល្លារនឹងត្រូវដាក់ពង្រាយនៅខេត្តចំនួន ១៣ ក្នុងរយៈមិនលើសពី ២ឆ្នាំ ដើម្បីបន្ថយហានិភ័យគ្រោះថ្នាក់ចរាចរណ៍ លើកសោភ័ណភាពនិងពង្រឹងសន្តិសុខសាធារណៈ។ នេះជាការរុញផ្លែផ្កានៃការអភិវឌ្ឍផ្នែកអគ្គិសនីបន្ថែមទៅប្រជាពលរដ្ឋក្រោមការសហការរបស់ក្រសួងរ៉ែនិងថាមពល ក្រសួងសាធារណការនិងដឹកជញ្ជូន និងរដ្ឋបាលរាជធានីភ្នំពេញនិងខេត្ត៕