ភ្នំពេញ៖ សម្តេចនាយករដ្ឋមន្ត្រី ហ៊ុន ម៉ាណែត ឱ្យលក្រសួងសាធារណការ និងក្រសួងអភិវឌ្ឍន៍ជនបទអនុវត្តស្តង់ដារួមនៃការដឹកជញ្ជូនដែលធានាដល់គុណភាពផ្លូវ។ សម្តេច បានថ្លែងបែបនេះក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ ពីរង្វង់មូលស្គន់-ដល់រង្វង់មូលស្ពានគីហ្សូណា ខេត្តកំពង់ចាម នាពឹ្រកថ្ងៃទី៧ ខែកក្កដា។ដើម្បីការប្រកួតប្រជែងស្មើភាពគ្នាផង និងធានាគុណភាពផ្លូវផង រាល់ការដឹកជញ្ជូនតាមផ្លូវថ្នល់ត្រូវអនុវត្តតាមគោលការណ៍ ឬស្តង់ដារួមនៃក្រុមហ៊ុនទាំងអស់។ ការណ៍នេះ សម្តេច ហ៊ុន ម៉ាណែត បានលើកឡើងឱ្យមានស្តង់ដាររួមនៃការដឹកជញ្ជូនរវាងក្រសួងសាធារណការ និងដឹកជញ្ជូន។ « ត្រូវតែមានស្តង់ដារួមមួយ គោលការណ៍យ៉ាងម៉េចឱ្យរួម! កុំឱ្យក្រសួងសាធារណការអនុញ្ញាតឱ្យដឹកជញ្ជូនប៉ុននេះ ដល់ក្រសួងអភិវឌ្ឍន៍ជនបទអនុវត្តប៉ុននោះ។ ឧទាហរណ៍៖ ក្រសួងអភិវឌ្ឍន៍ជនបទឲ្យដឹក៦០តោន ដល់ក្រសួងសាធារណការ ឱ្យដឹក៥៥តោន។ ចឹងបានន័យថា ដឹកពីចម្ការមកបាន៦០តោន តែមកដល់មាត់ផ្លូវក្រសួងសាធារការត្រូវរើស១០តោនចេញ។»។ ប្រមុខរដ្ឋាភិបាលមានប្រសាសន៍យ៉ាងដូច្នេះ ដែលទាមទារឱ្យក្រសួងទាំងពីរ មានការឯកភាពគ្នាតែមួយនៃ បរិមាណ ឬទម្ងន់ដឹកជញ្ជូនទំនិញនៅលើផ្លូវថ្នល់។ សម្តេច ហ៊ុន ម៉ាណែត បានបញ្ជាក់បន្ថែមថា ៖ « នេះគឺជាការសហការគ្នារវាងក្រសួង-ស្ថាប័នច្រើន ដែលត្រូវមានគោលការណ៍ស្តង់ដារួម កុំឱ្យជាន់គ្នា កុំឱ្យខ្ទាស់គ្នា ហើយអនុវត្តស្រួលដល់អ្នកដឹកជញ្ជូន ដល់កសិកររបស់យើង ប៉ុន្តែត្រូវគិតគូរ ធានាស្តង់ដា និងគុណភាពផ្លូវកុំឱ្យខូច។»៕