ពិធីចុះហត្ថលេខាលើកំណត់ហេតុនៃកិច្ចប្រជុំក្រោមគម្រោងអភិវឌ្ឍន៍សមត្ថភាពក្នុងការផលិត ការធ្វើបច្ចុប្បន្នភាព និងការចែកចាយផែនទីនាវាចរណ៍អេឡិចត្រូនិកសម្រាប់ធានា និងបង្កើនសុវត្ថិភាពការធ្វើនាវាចរណ៍ នៅក្នុងព្រះរាជាណាចក្រកម្ពុជា ទីស្តីការក្រសួង៖ នាថ្ងៃព្រហស្បតិ៍ ទី២ ខែកក្កដា ឆ្នាំ២០២៦ ឯកឧត្តម អៀង វ៉េងស៊ុន រដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញជាអធិបតីពិធីចុះហត្ថលេខាលើកំណត់ហេតុនៃកិច្ចប្រជុំក្រោមគម្រោងអភិវឌ្ឍន៍សមត្ថភាពក្នុងការផលិត ការធ្វើបច្ចុប្បន្នភាព និងការចែកចាយផែនទីនាវាចរណ៍អេឡិចត្រូនិកសម្រាប់ធានា និងបង្កើនសុវត្ថិភាពការធ្វើនាវាចរណ៍នៅក្នុងព្រះរាជាណាចក្រកម្ពុជា ជាមួយលោកស្រី MIURA Yoshiko តំណាងជាន់ខ្ពស់ នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA ប្រចាំនៅកម្ពុជា។ ពិធីនេះមានការអញ្ជើញចូលរួមពីសំណាក់ថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ មន្រ្តីបច្ចេកទេសពាក់ព័ន្ធ ព្រមទាំងក្រុមអ្នកជំនាញការទីភ្នាក់ងារសហប្រតិបត្តិការអន្តរជាតិជប៉ុន JICA ផងដែរ។ សូមបញ្ជាក់ផងដែរថា គម្រោងខាងលើនេះស្ថិតក្រោមកិច្ចសហប្រតិបត្តិការ និងជំនួយហិរញ្ញប្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA ក្នុងគោលបំណងអភិវឌ្ឍការដឹកជញ្ជូនតាមផ្លូវសមុទ្រ សម្របសម្រួលសុវត្ថិភាពនាវាចរណ៍ និងបង្កើនទំនុកចិត្តក្នុងការប្រើប្រាស់ផ្លូវទឹកកម្ពុជា ជាពិសេសនៅតំបន់កំពង់ផែស្វយ័តក្រុងព្រះសីហនុ និងតំបន់ជុំវិញ។ គម្រោងនេះនឹងត្រូវអនុវត្តរយៈពេល៤ឆ្នាំ ចាប់ពីឆ្នាំ២០២៧ ដល់ឆ្នាំ២០៣០ បន្ទាប់ពីកម្ពុជាទទួលបាននាវាវាស់ស្ទង់ជលធារសាស្រ្ត នៅចុងឆ្នាំ២០២៦នេះ៕