កិច្ចប្រជុំពិភាក្សាស្តីពីការភ្ជាប់ប្រព័ន្ធចែករំលែកទិន្នន័យ រវាងក្រសួងសាធារណការ និងដឹកជញ្ជូន និងក្រសួងមហាផ្ទៃ ទីស្ដីការក្រសួង៖ នាថ្ងៃពុធ ទី១ ខែកក្កដា ឆ្នាំ២០២៦ ឯកឧត្តម ពៅ ម៉ាលី រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំក្រុមការងារជំនាញជួបពិភាក្សាស្តីពីការភ្ជាប់ប្រព័ន្ធចែករំលែកទិន្នន័យជាមួយនឹងក្រុមការងារជំនាញក្រសួងមហាផ្ទៃ ដឹកនាំដោយ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ។ ក្រុមការងារជំនាញនៃក្រសួងទាំង២ រួមមានអគ្គនាយកដ្ឋានដឹកជញ្ជូនផ្លូវគោក អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ អគ្គនាយកដ្ឋានអត្តសញ្ញាណកម្ម អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ នៃក្រសួងមហាផ្ទៃ តំណាងក្រសួងសេដ្ឋកិច្ច និងហិរញ្ញវត្ថុ និងមន្ត្រីជំនាញពាក់ព័ន្ធផងដែរ។ កិច្ចប្រជុំនេះ រៀបចំឡើងក្នុងគោលបំណងជជែកពិភាក្សា និងជំរុញការរៀបចំអនុស្សរណៈនៃការយោគយល់រវាងក្រសួងសាធារណការ និងដឹកជញ្ជូន និងក្រសួងមហាផ្ទៃ ដើម្បីឈានទៅរកការធ្វើសន្ធានកម្មទិន្នន័យរវាងក្រសួងទាំងពីរ តាមរយៈថ្នាលផ្លាស់ប្តូរទិន្នន័យ CamDX ក្នុងគោលបំណងធ្វើឱ្យមានភាពប្រសើរឡើងនៃគុណភាពសេវាសាធារណៈ សំដៅជំរុញបរិវត្តកម្មឌីជីថល៕