ភ្នំពេញ៖ ក្រសួងសាធារណការ និងដឹកជញ្ជូន ប្រកាសផ្អាកចរាចរណ៍បណ្ដោះអាសន្ន ត្រង់កំណាត់ផ្លូវជាតិលេខ១ ត្រង់ចំណុចគីឡូម៉ែត្រលេខ២៤+៦០០ និងមហាវិថី ស៊ី ជីនពីង ត្រង់ចំណុចគីឡូម៉ែត្រលេខ២+៨០០ រួមទាំងផ្លូវរណបមួយចំនួននៅឃុំដីឥដ្ឋ ស្រុកកៀន ស្វាយខេត្តកណ្តាល។ នេះបើតាមសេចក្ដីជូនដំណឹងរបស់ក្រសួងសាធារណការ ដែលបញ្ជាក់ថា ការផ្អាកចរាចរណ៍នេះ ដោយសារគម្រោងសាងសង់ស្ពានឆ្លងកាត់ ទន្លេមេគង្គ (ដីឥដ្ឋ-ថ្មគរ)។ក្រសួងសាធារណការ នឹងផ្អាកចរាចរណ៍ផ្លូវខាងលើ ចាប់ពីម៉ោង៧ព្រឹក ថ្ងៃទី១ ខែកក្កដា ឆ្នាំ២០២៦ រហូតដល់ការដ្ឋានគម្រោងត្រូវបានបញ្ចប់។ ក្រសួងក៏បានរៀបចំបង្វែរទិសចរាចរណ៍ជាបណ្តោះអាសន្នជូនពលរដ្ឋ ដើម្បីបញ្ចៀសចរាចរណ៍។ គួររំលឹកថា គម្រោងសាងសង់ស្ពានឆ្លងទន្លេមេគង្គ (ដីឥដ្ឋ-ថ្មគរ) មានប្រវែងសរុប ៣,៧ គីឡូម៉ែត្រ រួមមានស្ពានដែលឆ្លងទន្លេ និងស្ពានអាកាសតភ្ជាប់ផ្លូវ លូ និងការងារវិស្វកម្មបន្ទាប់បន្សំ។ ស្ពានឆ្លងទន្លេមេគង្គ មានប្រវែងសរុប ១ ៦០០ម៉ែត្រ និងទទឹង ២៦ម៉ែត្រ ដោយមានគន្លងផ្លូវរថយន្ត ផ្លូវទោចក្រយានយន្ត និងផ្លូវថ្មើរជើង ព្រមទាំងមានគន្លងនាវាចរណ៍ចំនួន ៣គន្លង ដែលគន្លងនីមួយៗមានចន្លោះសុវត្ថិភាព ទទឹង ១១០ម៉ែត្រ និងកម្ពស់ ១៥ម៉ែត្រ។ គម្រោងនេះ មានទីតាំងស្ថិតនៅខេត្តកណ្ដាល ឆ្លងកាត់តាមទន្លេមេគង្គ ផ្លូវនៅត្រើយខាងលិច ស្ថិតក្នុងឃុំដីឥដ្ឋ តភ្ជាប់នឹងមហាវិថី ស៊ី ជីនពីង (ផ្លូវក្រវាត់ក្រុងទី ៣) និងផ្លូវជាតិលេខ១ ផ្លូវនៅត្រើយខាងកើតស្ថិត ក្នុងឃុំថ្មគរ តភ្ជាប់នឹងផ្លូវល្បឿនលឿនភ្នំពេញ-បាវិត ដែលគ្រោងនឹងសាងសង់៕