លោក ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទ នាព្រឹកថ្ងៃទី១៦ ខែមិថុនា ឆ្នាំ២០២៦ បានអញ្ជើញជាអធិបតីក្នុងពិធីបើកការដ្ឋានលើកកម្រិតគុណភាពស្ពានបេតុងចំនួន ១ ក​ន្លែង ដែលជាគម្រោងពហុឆ្នាំ ស្ថិតក្នុងភូមិសាស្ត្រ ឃុំថ្មអណ្តើក ស្រុកចិត្របុរី ខេត្តក្រចេះ។ ស្ពានបេតុងស្ថាបនានេះមានប្រវែង ៩០ ម៉ែត្រ និងទទឹង ៩​ ម៉ែត្រ សាងសង់​ឆ្លងកាត់ព្រែកតេ តភ្ជាប់​ពីភូមិ​ជួរក្រូច ទៅភូមិស្រែដូង ឃុំថ្មអណ្តើក ស្រុកចិត្របុរី ខេត្តក្រចេះ ជាប្រភេទសំណង់​លើកកម្រិតគុណភាពលក្ខណៈពហុឆ្នាំ ដើម្បីឆ្លើយតបទៅនឹងតម្រូវការប្រើប្រាស់ និងកំណើននៃការដឹកជញ្ជូនរបស់ប្រជាពលរដ្ឋ។ទីតាំងស្ពាននេះ តភ្ជាប់ពីផ្លូវជាតិលេខ៧ តាមរយៈផ្លូវកៅស៊ូ ប្រភេទ DBST ប្រវែង ៦.៨០ គីឡូម៉ែត្រ របស់ក្រសួងអភិវឌ្ឍន៍ជនបទទៅកាន់ភាគខាងត្បូងនៃព្រែកតេ ក្នុងស្រុកចិត្របុរី ស្រុកឆ្លូង និងស្រុកស្នួល ។ លោក ជី ស៊ីថា បានបញ្ជាក់ថា ការកសាងនិងលើកកម្រិតគុណភាពស្ពានបេតុងនាពេលនេះ គឺជាសមិទ្ធផលថ្មីមួយទៀត ក្រោមការយកចិត្តទុកដាក់ខ្ពស់របស់រាជរដ្ឋាភិបាល តាមរយៈក្រសួងអភិវឌ្ឍន៍ជនបទ ដើម្បីជួយសម្រួលដល់ការធ្វើដំណើរ ការដឹកជញ្ជូនកសិផល និងការតភ្ជាប់ទំនាក់ទំនងរវាងមូលដ្ឋានទៅកាន់ទីផ្សារ ឱ្យកាន់តែមានភាពងាយស្រួល និងឆាប់រហ័សជាងមុន។