គណៈប្រតិភូក្រសួងសាធារណការ និងដឹកជញ្ជូន ចូលរួមដំណើរទស្សនកិច្ចសិក្សារយៈពេល ៣ថ្ងៃ នៅប្រទេសជប៉ុន ដើម្បីដកស្រង់បទពិសោធន៍សម្រាប់ការរៀបចំយុទ្ធសាស្ត្រកែទម្រង់ការគ្រប់គ្រងហេដ្ឋារចនាសម្ព័ន្ធ ក្រុងតូក្យូ ប្រទេសជប៉ុន៖ យោងតាមផែនការសកម្មភាពលម្អិតឆ្នាំ២០២៦ នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFM) ចាប់ពីថ្ងៃទី១ ដល់ថ្ងៃទី៣ ខែមិថុនា ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធានប្រចាំការនៃគណៈកម្មការអន្តរក្រសួងដឹកនាំ សម្របសម្រួល គ្រប់គ្រងគម្រោងវិនិយោគសាធារណៈ និងកម្មវិធីថែទាំហេដ្ឋារចនាសម្ព័ន្ធហិរញ្ញប្បទានដោយថវិកាថ្នាក់ជាតិ បានដឹកនាំគណៈប្រតិភូជំនាញរបស់ក្រសួង រួមមាន លោក ណៃ ចំណង់ អគ្គនាយករងនៃអគ្គនាយកដ្ឋានសាធារណការ និងលោក ឈឹម ផល្លា ប្រធាននាយកដ្ឋានផ្លូវថ្នល់នៃអគ្គនាយកដ្ឋានបច្ចេកទេស ព្រមទាំងមន្ត្រីជំនាញមកពីអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ចូលរួមក្នុងដំណើរទស្សនកិច្ចសិក្សារយៈពេល ៣ថ្ងៃ នៅប្រទេសជប៉ុន។ ដំណើរទស្សនកិច្ចសិក្សាកម្រិតខ្ពស់នេះ ត្រូវបានរៀបចំឡើងដោយក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងដកស្រង់បទពិសោធន៍ និងប្រមូលធាតុចូលសំខាន់ៗពីឧត្តមានុវត្តន៍អន្តរជាតិ សម្រាប់យកមកបំពេញបន្ថែមលើការរៀបចំ «យុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រងការថែទាំហេដ្ឋារចនាសម្ព័ន្ធផ្លូវថ្នល់ និងប្រព័ន្ធធារាសាស្ត្រ» ឱ្យកាន់តែមានភាពគ្រប់ជ្រុងជ្រោយ និងមានគុណភាពខ្ពស់ ដែលគ្រោងនឹងអនុម័ត និងដាក់ឱ្យប្រើប្រាស់នៅដំណាច់ឆ្នាំ២០២៦ ខាងមុខនេះ។ ដំណើរទស្សនកិច្ចសិក្សានេះ ក៏មានការចូលរួមពីតំណាងគណៈប្រតិភូមកពីក្រសួង-ស្ថាប័នពាក់ព័ន្ធរបស់កម្ពុជា រួមមាន៖ ក្រសួងសេដ្ឋកិច្ច និងហិរញ្ញវត្ថុ, ក្រសួងអភិវឌ្ឍន៍ជនបទ, និងក្រសួងធនធានទឹក និងឧតុនិយម ដែលមានសមាសភាពសរុបចំនួន ២០ រូប។ ក្នុងអំឡុងពេល ៣ថ្ងៃនេះ គណៈប្រតិភូកម្ពុជាបានចូលជួបប្រជុំពិភាក្សា និងធ្វើទស្សនកិច្ចសិក្សាជាមួយតំណាងក្រសួង ស្ថាប័នរដ្ឋ និងក្រុមហ៊ុនឯកជនធំៗរបស់ជប៉ុន រួមមាន៖ (១). ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន (MLIT)៖ សិក្សាស្វែងយល់អំពីប្រព័ន្ធថែទាំផ្លូវថ្នល់ (Road Maintenance) និងគំនិតផ្តួចផ្តើមលើការអនុវត្តភាពជាដៃគូរវាងរដ្ឋ និងឯកជន (PPP/PFI) (២). ក្រសួងកសិកម្ម រុក្ខាប្រមាញ់ និងនេសាទជប៉ុន (MAFF)៖ ពិភាក្សាលើគោលនយោបាយ និងបច្ចេកវិទ្យាថែទាំប្រព័ន្ធធារាសាស្ត្រ និងការគ្រប់គ្រងប្រព័ន្ធចែកចាយទឹកខ្នាតធំ (៣). ការិយាល័យគ្រប់គ្រងផ្លូវថ្នល់តូក្យូ (Kanto Regional Development Bureau, Tokyo National Highway Office) និងការិយាល័យសាខា Shinagawa និង (៤.) ស្ថានីយបូមទឹក Sogo West (គម្រោង Inbanuma Phase 2) និង ការិយាល័យគ្រប់គ្រង Tone Chuo (Kasai Irrigation District)៖ ស្វែងយល់ពីការប្រតិបត្តិការ និងការថែទាំ (O&M) ប្រព័ន្ធធារាសាស្ត្រដោយប្រើម៉ាស៊ីនបូមទឹក ការបែងចែកការចំណាយ និងការសម្របសម្រួលជាមួយសមាគមប្រើប្រាស់ទឹក និង (៥.) ក្រុមហ៊ុនឯកជនជប៉ុន៖ រួមមានក្រុមហ៊ុន Sakai Heavy Industries (ការិយាល័យ Kuki) ដើម្បីពិនិត្យការបង្ហាញបច្ចេកវិទ្យាម៉ាស៊ីនឈូសកិនពង្រាប (Milling Machine and Stabilizer) និងវិទ្យាស្ថានស្រាវជ្រាវបច្ចេកវិទ្យាផ្លូវថ្នល់ TOA Road Technical Research Institute (Tsukuba) សិក្សាអំពីការបណ្តុះបណ្តាលត្រួតពិនិត្យគុណភាព (QC) និងការពិសោធន៍ជាក់ស្តែង។ កិច្ចពិភាក្សា និងទស្សនកិច្ចនៅតាមទីតាំងជាក់ស្តែងទាំងនេះ បានជួយឱ្យគណៈប្រតិភូកម្ពុជាយល់ដឹងកាន់តែស៊ីជម្រៅលើ៖ ការរៀបចំគម្រោងថវិកា និងការកំណត់អាទិភាពសម្រាប់ការថែទាំ និងជួសជុលហេដ្ឋារចនាសម្ព័ន្ធផ្លូវថ្នល់ និងប្រព័ន្ធធារាសាស្ត្រ បទដ្ឋានបច្ចេកទេស និងការប្រើប្រាស់បច្ចេកវិទ្យាទំនើបៗក្នុងការថែទាំ ការអនុវត្តជាក់ស្តែងក្នុងប្រព័ន្ធគ្រប់គ្រង និងការប្រតិបត្តិការប្រកបដោយចីរភាព។ លទ្ធផលដ៏ផ្លែផ្កានៃដំណើរទស្សនកិច្ចសិក្សានេះ នឹងក្លាយជាទុន និងជាធាតុចូលដ៏មានតម្លៃមិនអាចខ្វះបាន សម្រាប់ក្រសួងសាធារណការ និងដឹកជញ្ជូន ក៏ដូចជាគណៈកម្មការអន្តរក្រសួង ក្នុងការយកទៅកែច្នៃ និងរៀបចំប្រព័ន្ធគ្រប់គ្រងការថែទាំហេដ្ឋារចនាសម្ព័ន្ធផ្លូវថ្នល់នៅកម្ពុជាឱ្យកាន់តែរឹងមាំ ប្រកបដោយប្រសិទ្ធភាពសេដ្ឋកិច្ច និងចីរភាពយូរអង្វែង៕