គិតត្រឹមដំណាច់ខែឧសភា ឆ្នាំ២០២៦ គម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបានវឌ្ឍនភាពការងារបានប្រមាណ ៧៣% បន្ទាប់ពីសម្ពោធបើកការដ្ឋានសាងសង់កាលពីថ្ងៃទី ១៩ ខែកុម្ភៈ ឆ្នាំ២០២៤។លោក សួង ហេង រដ្ឋលេខាធិការ និងជានាយកគម្រោង កាលពីថ្ងៃទី១ ខែមិថុនា ម្សិលមិញនេះបានដឹកនាំមន្រ្តីជំនាញចុះពិនិត្យតាមដានការអនុវត្តគម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា)។មន្រ្តីក្រសួងសាធាណការ និងដឹកជញ្ចូន បានបង្ហាញពីវឌ្ឍនភាពការសាងសង់ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ដែលសម្រេចបានលទ្ធផលរួមមាន ៖ ១). ផ្នែកគ្រឹះស្ពានសម្រេច ១០០% ២). រចនាសម្ព័ន្ធក្រោមស្ពានសម្រេចបាន ១០០ % ៣). រចនាសម្ព័ន្ធលើនៃស្ពានតភ្ជាប់សម្រេចបាន១០០% ៤). រចនាសម្ព័ន្ធលើនៃស្ពានមេសម្រេចបាន ៦៧,៣០% (ធ្នឹមប្រអប់ខាងស្តាំដៃចំនួន ៤៩ កង់ សម្រេចបាន ៣៦ កង់ និង ធ្នឹមប្រអប់ខាងឆ្វេងដៃចំនួន ៤៩ កង់ សម្រេចបាន ៣០ កង់) និង ៥).បណ្តាញផ្លូវសម្រេចបាន ៤៨,៤ % (តភ្ជាប់ប្រវែង ៨០៤,៣០ម. សម្រេចបាន ៥០% និងផ្លូវបង្វែរទិស ( Ram) ប្រវែង ១,៥៤ម. សម្រេចបាន ៤៦%)។មន្រ្តីក្រសួងសាធារណការ និងដឹកជញ្ជូនបានបញ្ជាក់ថា ការដឹកធ្នឹមស្ពានពីត្រើយខាងលិចទៅត្រើយខាងកើតចំនួន ៩៦ ដើមបានបញ្ចប់ និងកំពុងចាក់បេតុងតភ្ជាប់មុខតំណ។ក្នុងឱកាសចុះពិនិត្យការដ្ឋានសាងសង់ មន្រ្តីក្រុមការងារបច្ចេកទេសក្រសួងសាធារណការ និងដឹកជញ្ជូន បានវាយតម្លៃខ្ពង់ចំពោះក្រុមហ៊ុនសំណង់សៀងហៃ ដែលបានអនុវត្តការងារបញ្ចប់ និងកំពុងដំណើរការដោយគោរពតាមបទដ្ឋានបច្ចេកទេស និងកិច្ចសន្យាបច្ចេកទេសត្រឹមត្រូវ។ ជាមួយគ្នានេះ មន្រ្តីគ្រប់គ្រងគម្រោងក៏បានណែនាំឲ្យក្រុមបច្ចេកទេសបន្តពង្រឹងសុវត្ថិភាពការងារ ដោយហេតុថារដូវវស្សាទឹកទន្លេចាប់ផ្តើមឡើង ដោយបន្តថែទាំនិងបំពាក់បន្ថែមពោងសុវត្ថិភាពលើទឹក ដើម្បីសុវត្ថិភាពអ្នកប្រើប្រាស់មធ្យោបាយដឹកជញ្ជូនតាមផ្លូវទឹក។ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ជាស្ពានទី ៧ តាមដងទន្លេបាសាក់ បន្ទាប់ពីស្ពានដែលបានសាងសង់រួចទាំង ៦ រួមមាន៖ ស្ពានឆ្លងកោះពេជ្រកោះនរា ស្ពានព្រះមុនីវង្សទាំង ២ ស្ពានសំរោង ស្ពានកោះអន្លង់ចិន និងស្ពានកោះធំ។ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) មានប្រវែងសរុប ១.៦៥០ ម៉ែត្រ ដែលក្នុងនោះការស្ថាបនាស្ពានមានប្រវែង ៨៤៥,៧០ ម៉ែត្រ ទទឹងផ្លូវ ២៧ ម៉ែត្រ និងផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ ទទឹងផ្លូវ ២៧ ម៉ែត្រ។ ស្ពានចាក់អង្រែក្រោម-ព្រែកប្រា សាងសង់ឡើងដោយចាយថវិកាប្រមាណ ៦០ លានដុល្លារអាមេរិក និងប្រើរយៈពេលសាងសង់ ៤២ ខែ ដោយឥណទានសម្បទានពីប្រទេសចិន។ លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ថា ក្រោយស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ស្ថាបនារួចរាល់ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្សដែលឆ្លងកាត់ទន្លេបាសាក់ភ្ជាប់ទៅផ្លូវជាតិលេខ ១ រួមទាំងជួយលើកកម្ពស់ធ្វើឱ្យប្រសើរឡើងដល់ការដឹកជញ្ជូន និងពន្លឿនការអភិវឌ្ឍតំបន់នោះផងដែរ។ នៅក្នុងក្របខ័ណ្ឌនៃស្ថានភាពភូមិសាស្ត្រ ការតភ្ជាប់ស្ពានចាក់អង្រែក្រោម-ព្រែកប្រា គឺមានភាពប្រទាក់ក្រឡាគ្នាជាមួយបណ្តាញផ្លូវជាតិនិងខ្សែផ្លូវសំខាន់ៗដូចជា នៅត្រើយខាងលិចភ្ជាប់ជាមួយមហាវិថីឈុន គង់ ដែលកំពុងសាងសង់បន្តភ្ជាប់ទៅមហាវិថីសម្តេច ហ៊ុន សែន (ផ្លូវ ៦០ ម៉ែត្រ) ដោយរត់កាត់ពីលើនិងតភ្ជាប់ជាមួយផ្លូវជាតិលេខ ២។ នៅត្រើយខាងកើតតភ្ជាប់ទៅផ្លូវជាតិលេខ ១ ដោយរត់កាត់ពីលើ និងតភ្ជាប់ជាមួយផ្លូវលេខ ១១០ ក្នុងទិសដៅចូលមករាជធានីភ្នំពេញ ឬចេញទៅខេត្តកណ្តាល ឆ្ពោះទៅកាន់តំបន់ភូមិសាស្ត្រពាក់ព័ន្ធផ្សេងទៀត៕