ផ្លូវលេខ ២៦០បេ៧អា តភ្ជាប់ពីកំពង់ផែពហុបំណងស្ថិតនៅស្រុកព្រែកប្រសព្វទៅរោងចក្រស៊ីម៉ង់ត៍នៅស្រុកសំបូរ នៅស្រុកសំបូរខេត្តក្រចេះបានបើកការដ្ឋានសាងសង់លើកកម្រិតគុណភាពជាប្រភេទផ្លូវក្រាលកៅស៊ូ DBST។ ផ្លូវលេខ ២៦០បេ៧អា ដែលបើកការដ្ឋានសាងសង់នៅព្រឹកមិញនេះ មានប្រវែងសរុបចំនួន ៩៤ គីឡូម៉ែត្រ ទទឹង ៦ ម៉ែត្រ និងចិញ្ចើម ១ ម៉ែត្រសងខាងចាប់ផ្ដើមពីរោងចក្រស៊ីម៉ង់ត៍នៅស្រុកសំបូរ តភ្ជាប់ទៅកាន់កំពង់ផែពហុបំណង ស្ថិតនៅឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។ យោងតាមរបាយការណ៍ក្រុមហ៊ុន ខេ ភី បានឲ្យដឹងថា ផ្លូវលេខ ២៦០បេ៧អា ប្រវែងសរុបចំនួន ៩៤ គីឡូម៉ែត្រ បែងចែកជា ២ កំណាត់ ដោយក្នុងនោះផ្លូវកំណាត់ទី ១ តភ្ជាប់ពីចំណុចគីឡូ ៣២ ស្ថិតនៅភូមិសីទាន ឃុំសោប ស្រុកព្រែកប្រសព្វ ភ្ជាប់ទៅក្រុមហ៊ុនរោងចក្រស៊ីម៉ង់ត៍នៅស្រុកសំបូរ និងកំណាត់ផ្លូវទី២ តភ្ជាប់ពីចំនុចគីឡូ ៣២ ស្ថិតនៅភូមិសីទាន ឃុំសោប ភ្ជាប់ទៅកំពង់ផែពហុបំណងស្ថិតនៅឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។ បច្ចុប្បន្នផ្លូវលេខ ២៦០បេ៧អា បានសម្រេចការត្រាសសេផ្លូវលើកទី ១ និងបញ្ចប់ការត្រាសសេរផ្លូវជាលើកទី ២ នៅក្នុងខែមិថុនា ហើយក្រុមការងារនឹងចាប់ផ្ដើមចាក់កៅស៊ូប្រភេទ DBST នៅក្នុងខែធ្នូ ឆ្នាំ២០២៦ ហើយនឹងបើកឲ្យដំណើរការធម្មតា។ លោក នូ សុវត្ថិ រដ្ឋលេខាធិការក្រសួងសាធារណការនិងដឹកជញ្ជូនបានឲ្យដឹងថា ការស្ថាបនាផ្លូវមួយខ្សែនេះ មានស្ថាប័នចំនួន ៣ ទទួលខុសត្រូវក្នុងនោះមានក្រសួងសាធារណការ និងដឹកជញ្ជូន ក្រសួងអភិវឌ្ឍជនបទ និងរដ្ឋបាលថ្នាក់ក្រោមជាតិ។ លោកថា មុននឹងចាប់ផ្ដើមដំណើការស្ថាបនាផ្លូវមួយខ្សែនេះ ក្រុមការងារអន្តរក្រសួងបានចុះមកពិនិត្យទីតាំងផ្ទាល់ និងមានកិច្ចប្រជុំចំនួន ៤ លើកនៅក្រសួងហិរញ្ញវត្ថុ ដឹកនាំដោយក្រុមការងារជម្រុញការវិនិយោគនៅភូមិភាកឦសាន ទម្រាំសម្រេចលិចចេញជារូបរាងដូចបានឃើញនាពេលនេះ។ ពាក់ព័ន្ធការស្ថាបនាផ្លូវលេខ ២៦០បេ៧អា លោក នូ សុវត្ថិ បានបញ្ជាក់ថា ក្រសួងសាធារណការនិងដឹកជញ្ជូនមិនបណ្តែតបណ្តោយ ដោយបានអញ្ជើញខាងក្រុមហ៊ុនមកធ្វើបទបង្ហាញចំនួន ៤ ដង ហើយការធ្វើបទបង្ហាញនេះគឺសំដៅចង់បាននូវអ្វីដែលក្រុមការងារចង់ដឹងអំពីបច្ចេកទេស។ ក្រសួងសាធារណការនិងដឹកជញ្ជូន គឺជាក្រសួងដែលគ្រប់គ្រង និងរៀបចំលិខិតបទដ្ឋានបច្ចេកទេស ដូច្នេះបើផ្លូវថ្នល់ពុំមានការគិតគូរពីបទដ្ឋានបច្ចេកទេសទេនោះ អាចធ្វើឲ្យមានការព្រួយបារម្ភនៅពេលដែលធ្វើរួចរាល់ហើយនោះ។ លោកបន្តថា ក្រសួងនឹងបង្កើតក្រុមការងារត្រួតពិនិត្យបច្ចេកទេស ចុះត្រួតពិនិត្យឲ្យបានទៀងទាត់ពីគុណភាពផ្លូវ ជាប្រចាំខែដើម្បីឲ្យច្បាស់ប្រាកដថា ថ្នល់ធ្វើហើយប្រើប្រាស់បានយូរ រឹងមាំ ដោយមិនមានការស្ដីបន្តោសពីមហាជនថាធ្វើមុខខូចចក្រោយ ធ្វើក្រោយ ខូចកណ្ដាល តទៅទៀតនោះទេ។ បើតាមលោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានឲ្យកម្ពុជាថ្មីដឹងថា ផ្លូវដែលបើកការដ្ឋានស្ថាបនានេះ តាមផែនការគ្រោងបញ្ចប់នៅខែធ្នូឆ្នាំ ២០២៦។ ពិធីបើកការដ្ឋានសាងសង់លើកកម្រិតគុណភាពផ្លូវលេខ ២៦០បេ ៧អា ដែលមានប្រវែង ៩៤ គីឡូម៉ែត្រ និងទទឹង ៦ ម៉ែត្រ ពីផ្លូវលំទៅជាប្រភេទផ្លូវក្រាលកៅស៊ូ DBST គឺជាសមិទ្ធផលថ្មីមួយបន្ថែមទៀត សម្រាប់ប្រជាជននៅស្រុកសំបូរ និងស្រុកព្រែកប្រសព្វ នៅខេត្តក្រចេះ ដែលក្រៅពីជួយសម្រួលការធ្វើដំណើរឆ្លងកាត់កាន់តែងាយស្រួល និងមានភាពឆាប់រហ័ស ជាពិសេសក៏បម្រើដល់ការតភ្ជាប់ការដឹកជញ្ជូនផលិតផលផ្សេងៗរបស់ប្រជាពលរដ្ឋ និងផលិតផលពីរោងចក្រ ស៊ីម៉ង់ត៍ ស្ថិតនៅឃុំបឹងចារ ស្រុកសំបូរ ទៅទីតាំងកំពង់ផែពហុបំណង ស្ថិតនៅឃុំព្រែកប្រសព្វ ស្រុកព្រែកប្រសព្វ ខេត្តក្រចេះ៕