គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្ត្រីដឹកជញ្ជូនអាស៊ាន លើកទី៦១ និងកិច្ចសន្ទនាឧត្តមមន្ត្រីដឹកជញ្ជូនអាស៊ាន និងសហរដ្ឋអាម៉េរិក លើកទី៥ តាមរយៈប្រព័ន្ធវីដេអូពីចម្ងាយ ទីស្តីការក្រសួង៖ ដោយទទួលបានការឯកភាពដ៏ខ្ពង់ខ្ពស់ពី ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងតបតាមការអញ្ជើញពីនាយកដ្ឋានដឹកជញ្ជូន នៃសាធារណរដ្ឋហ្វីលីពីន ឯកឧត្តម ឈៀង ពេជ្រ អនុរដ្ឋលេខាធិការ និងជាប្រធានឧត្តមមន្ត្រីដឹកជញ្ជូនកម្ពុជា បានដឹកនាំគណៈប្រតិភូនៃព្រះរាជាណាចក្រកម្ពុជា រួមមានទីស្ដីការគណៈរដ្ឋមន្រ្តី ក្រសួងការបរទេស និងសហប្រតិបត្តិការអន្តរជាតិ រដ្ឋលេខាធិការដ្ឋានអាកាសចរណ៍ស៊ីវិល តំណាងអង្គភាពពាក់ព័ន្ធក្រោមឱវាទក្រសួងសាធារណការ និងដឹកជញ្ជូន ចូលរួមកិច្ចប្រជុំឧត្តមមន្ត្រីដឹកជញ្ជូនអាស៊ានលើកទី៦១ (61st ASEAN Senior Transport Officials Meeting - STOM) និងកិច្ចសន្ទនាឧត្តមមន្ត្រីដឹកជញ្ជូនអាស៊ាន និងសហរដ្ឋអាម៉េរិក លើកទី៥ (5th ASEAN-U.S. Senior Transport Officials Dialogue - STOD) តាមរយៈប្រព័ន្ធវីដេអូពីចម្ងាយ ចាប់ពីថ្ងៃទី១៩ ដល់ថ្ងៃទី២១ ខែឧសភា ឆ្នាំ២០២៦។ កិច្ចប្រជុំនេះត្រូវបានរៀបចំឡើងក្នុងគោលបំណង៖ (១) ពិនិត្យ និងតាមដានពីកិច្ចប្រជុំកំពូលអាស៊ាន និងកិច្ចប្រជុំរដ្ឋមន្ត្រីអាស៊ានពាក់ព័ន្ធ (២) ពិនិត្យលើការសិក្សា និងការវាយតម្លៃផែនការវិស័យដឹកជញ្ជូនអាស៊ាន ATSP (ASEAN Transport Sectoral Plan) ឆ្នាំ២០២៦-២០៣០ (៣) ពិនិត្យផែនការការងារ សម្រាប់ឆ្នាំ២០២៦-២០២៧ (៤) ពិនិត្យ និងអនុម័តលើរបាយការណ៍ និងផែនការថ្មីៗរបស់ក្រុមការងារបច្ចេកទេស រួមមាន (i) ក្រុមការងារដឹកជញ្ជូនផ្លូវអាកាស (ii) ក្រុមការងារដឹកជញ្ជូនផ្លូវគោក (iii) ក្រុមការងារដឹកជញ្ជូនផ្លូវសមុទ្រ និង (iv) ក្រុមការងារសម្របសម្រួលការដឹកជញ្ជូន និង (៥) ពិនិត្យឯកសារពាក់ព័ន្ធនានា សម្រាប់កិច្ចប្រជុំថ្នាក់រដ្ឋមន្រ្តីដឹកជញ្ជូនអាស៊ានលើកទី៣២។ ជាមួយគ្នានេះ គណៈប្រតិភូឧត្តមមន្ត្រីដឹកជញ្ជូនអាស៊ាន នឹងជួបពិភាក្សាជាមួយដៃគូសន្ទនាសំខាន់ៗរបស់អាស៊ាន ដើម្បីពង្រឹងកិច្ចសហប្រតិបត្តិការក្នុងវិស័យដឹកជញ្ជូន និងភស្តុភារកម្ម ព្រមទាំងផ្លាស់ប្តូរទស្សនៈលើទិសដៅនៃកិច្ចសហប្រតិបត្តិការនាពេលខាងមុខ។ លទ្ធផលនៃកិច្ចប្រជុំឧត្តមមន្ត្រីដឹកជញ្ជូនអាស៊ានលើកទី៦១នេះ នឹងត្រូវរៀបចំជារបាយការណ៍ និងអនុសាសន៍ពាក់ព័ន្ធ ដើម្បីត្រៀមដាក់ជូនពិនិត្យក្នុងកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន នាខែវិច្ឆិកាខាងមុខ៕