គម្រោងស្ថាបនាផ្លូវបេតុងអារ ម៉េមួយខ្សែប្រវែង ១ ១០៩ម៉ែត្រ ស្ថិតក្នុងភូមិតាត្រាវ ឃុំកន្ទ្រាំងស្រុកប្រាសាទបាគង ខេត្តសៀមរាបបានបញ្ចប់ជាស្ថាពរ ដោយប្រើកញ្ចប់ថវិកាមូលនិធិឃុំ និងមូលនិធិអន្តរស្រុក ដើម្បីដោះស្រាយបញ្ហាប្រឈមក្នុងការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋ ខណៈពលរដ្ឋក្នុងមូលដ្ឋានបង្ហាញការសាទរជាមួយនឹងសមិទ្ធផលថ្មីមួយខ្សែនេះ ដែលបានចូលរួមយ៉ាងសំខាន់ក្នុងការរស់នៅប្រចាំថ្ងៃរបស់ពលរដ្ឋក្នុងមូលដ្ឋាន។ បើតាមប្រជាពលរដ្ឋក្នុងភូមិតាត្រាវ ឃុំកន្ទ្រាំងបានរៀបរាប់ពីស្ថានភាពផ្លូវកាលពីមុនថា ផ្លូវនេះមានភាពលំបាកខ្លាំងក្នុងការធ្វើដំណើរ ហុយខ្លាំង ជាពិសេសសិស្សធ្វើដំណើរទៅសាលា ហើយនៅរដូវភ្លៀងវិញ គឺមានភាពលំបាកធ្វើដំណើរ។ ប៉ុន្តែបច្ចុប្បន្ន ផ្លូវថ្មីនេះបានជួយឱ្យការធ្វើដំណើររបស់សិស្សានុសិស្សទៅសាលារៀនមានភាពងាយស្រួល មិនមានរលាក់ ជង្ហុក ឬភក់ជ្រាំដូចមុនឡើយ។ ក្រៅពីសិស្សធ្វើដំណើរ និងពលរដ្ឋស្រួលដឹកកសិផល ផ្លូវថ្មីនេះក៏បានក្លាយជាកន្លែងដ៏ពេញនិយមសម្រាប់មនុស្សចាស់នៅក្នុងភូមិ ដើរហាត់ប្រាណផងដែរ។ លោក ឃាម ឆាង មេឃុំកន្ទ្រាំងបានឱ្យដឹងថា គម្រោងស្ថាបនាផ្លូវមួយខ្សែប្រវែង ១ ១០៩ម៉ែត្រ មានទទឹងផ្លូវ ៥ម៉ែត្រ និងកម្រាស់ ១ទឹកកន្លះ ក្រោមការសហការគ្នារវាងកញ្ចប់ថវិកាមូលនិធិឃុំ ឆ្នាំ២០២៥ និងមូលនិធិអន្តរស្រុក។ ផ្លូវមួយខ្សែនេះជាខ្សែផ្លូវយុទ្ធសាស្ត្រដ៏សំខាន់ ដែលតភ្ជាប់ចាប់ពីផ្លូវជាតិលេខ៦ រហូតដល់ផ្លូវកៅស៊ូថ្មីរបស់មន្ទីរអភិវឌ្ឍន៍ជនបទ៕