(ភ្នំពេញ)៖ បើតាមការបញ្ជាក់របស់លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី៨ ខែឧសភា ឆ្នាំ២០២៦នេះ បានឱ្យដឹងថា គម្រោងអភិវឌ្ឍន៍ធំៗនីមួយៗដែលកំពុងអនុវត្តនាពេលបច្ចុប្បន្ន គឺបានបង្ហាញយ៉ាងច្បាស់ពីការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តាមរយៈក្រសួងសាធារណការ និងដឹកជញ្ជូន ក្នុងនាមជាសេនាធិការ ក្នុងការជំរុញការអភិវឌ្ឍហេដ្ឋារចនាសម្ព័ន្ធសាធារណៈឱ្យកាន់តែប្រសើរ។ ជាក់ស្តែង គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្នុងក្រុងតាខ្មៅ ខេត្តកណ្តាល ត្រូវបានចាត់ទុកថា ជាគម្រោងដ៏សំខាន់មួយ ដែលមានគោលដៅបម្រើផលប្រយោជន៍ជូនប្រជាពលរដ្ឋ និងឆ្លើយតបទៅនឹងតម្រូវការជាក់ស្តែង ក្នុងការដោះស្រាយបញ្ហាទឹកជំនន់ ការគ្រប់គ្រងកាកសំណល់រាវ និងការលើកកម្ពស់បរិស្ថានរស់នៅឱ្យកាន់តែប្រសើរ។ លោក រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ បានដឹកនាំក្រុមការងារចុះពិនិត្យវឌ្ឍនភាពការងារជាប្រចាំ ដើម្បីធានាថាការអនុវត្តគម្រោងប្រព្រឹត្តទៅតាមផែនការ និងមានប្រសិទ្ធភាពខ្ពស់។ ក្រសួងបានបញ្ជាក់ថា ក្នុងដំណើរការអនុវត្តគម្រោងធំៗបែបនេះ ផលប៉ះពាល់ខ្លះៗជៀសមិនផុតឡើយ ប៉ុន្តែក្រុមការងារបានខិតខំកាត់បន្ថយផលប៉ះពាល់ទាំងនោះឱ្យនៅកម្រិតទាបបំផុត ដើម្បីរក្សាផលប្រយោជន៍រួមរបស់ប្រជាពលរដ្ឋ។ គម្រោងនេះត្រូវបានបែងចែកជា២ផ្នែកសំខាន់ៗ រួមមាន៖ *ទី១- ការសាងសង់ស្ថានីយប្រព្រឹត្តកម្មទឹកកខ្វក់ តាមវិធីសាស្ត្រអាងចម្រោះបែបធម្មជាតិ (Waste Stabilization Pond) ការសាងសង់ស្ថានីយបូមទឹកកខ្វក់ចំនួន៧កន្លែង និងបណ្តាញលូទឹកកខ្វក់ប្រវែងសរុប១២៥,៣គីឡូម៉ែត្រ ព្រមទាំងការតភ្ជាប់តាមខ្នងផ្ទះ ដើម្បីបង្ហូរទឹកកខ្វក់ចូលប្រព័ន្ធចម្រោះ។ *ទី២- ការសាងសង់ប្រព័ន្ធរំដោះទឹកជំនន់ ដែលរួមមានបណ្តាញលូរំដោះទឹកភ្លៀងតាមបណ្តោយផ្លូវជាតិលេខ២១ ចាប់ពីរង្វង់មូលតាខ្មៅ ប្រវែង៥គីឡូម៉ែត្រ និងការសាងសង់ ព្រមទាំងស្ដារស្ថានីយបូមទឹក និងបណ្តាញលូរំដោះទឹកភ្លៀងក្នុងក្រុងតាខ្មៅ។ គួរបញ្ជាក់ថា គិតត្រឹមដំណាច់ខែមេសា ឆ្នាំ២០២៦ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ សម្រេចបានលទ្ធផលជារួមប្រមាណ៣៣% ហើយ ដោយគ្រោងនឹងបញ្ចប់ទាំងស្រុងនៅអំឡុងឆ្នាំ២០២៨ខាងមុខ។ អាជ្ញាធរ និងក្រសួងពាក់ព័ន្ធ ក៏បានថ្លែងអំណរគុណដល់ប្រជាពលរដ្ឋទាំងអស់ ចំពោះការយោគយល់ អធ្យាស្រ័យ និងការចូលរួមគាំទ្រចំពោះដំណើរការអនុវត្តគម្រោង ដែលជាផ្នែកមួយសំខាន់ក្នុងការអភិវឌ្ឍទីក្រុងតាខ្មៅឱ្យកាន់តែទំនើប និងមានបរិស្ថានល្អប្រសើរនាពេលអនាគត៕