កិច្ចប្រជុំស្តីពីវឌ្ឍនភាពការងារប្រចាំត្រីមាសទី១ របស់អគ្គនាយកដ្ឋានភស្តុភារកម្ម ទីស្តីការក្រសួង៖ នាថ្ងៃពុធ ទី៨ ខែមេសា ឆ្នាំ២០២៦ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីវឌ្ឍនភាពការងារប្រចាំត្រីមាសទី១ របស់អគ្គនាយកដ្ឋានភស្តុភារកម្ម ដោយមានការអញ្ជើញចូលរួមពី លោកជំទាវអនុរដ្ឋលេខាធិការ លោកជំទាវអគ្គនាយក លោកអគ្គនាយករង លោកប្រធាននាយកដ្ឋាន និងមន្ត្រីក្រោមឱវាទអគ្គនាយកដ្ឋានទាំងអស់ផងដែរ។ កិច្ចប្រជុំនេះត្រូវបានរៀបចំឡើង ដើម្បីពិនិត្យនូវផែនការសកម្មភាពការងារដែលអគ្គនាយកដ្ឋានបានអនុវត្តក្នុងត្រីមាសទី១ ឆ្នាំ២០២៦ កន្លងមក និងទិសដៅការងារបន្ទាប់ត្រូវបន្តអនុវត្ត ជាមួយនឹងការពិនិត្យលើលទ្ធផលការងារដែលសម្រេចបានក្នុងត្រីមាសទី១ ឆ្នាំ២០២៦ របស់អគ្គនាយកដ្ឋាន។ ជាចុងបញ្ចប់ ឯកឧត្តមរដ្ឋលេខាធិការ និងជាប្រធានអង្គប្រជុំ ក៏បានចែកជូននូវបណ្ណសរសើរជូនដល់មន្ត្រីឆ្នើម ប្រចាំឆ្នាំ២០២៥ របស់អគ្គនាយកដ្ឋានភស្តុភារកម្ម ដែលបានខិតខំប្រឹងប្រែង និងសកម្មក្នុងការអនុវត្តការងារកន្លងមកផងដែរ៕