សិក្ខាសាលាផ្សព្វផ្សាយ ស្តីពីលទ្ធផលនៃការអនុវត្តកម្មវិធីការអភិវឌ្ឍសមត្ថភាព នៃគម្រោងផ្គត់ផ្គង់ទឹកស្អាត និងអនាម័យខេត្ត រាជធានីភ្នំពេញ៖នាថ្ងៃពុធ ទី០១ ខែមេសា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាផ្សព្វផ្សាយ ស្តីពីលទ្ធផលនៃការអនុវត្តកម្មវិធីការអភិវឌ្ឍសមត្ថភាព នៃគម្រោងផ្គត់ផ្គង់ទឹកស្អាត និងអនាម័យខេត្ត(The Results of the Implementation of Capacity Development Programme Provincial Water Supply and Sanitation Project- PWSSP) ដែលរៀបចំសហការដោយអង្គការ GRET និងGGGI។ សិក្ខាសាលានេះក៏មានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយករង ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងរៀបចំដែនដី នគរូបនីយកម្ម និងសំណង់ ក្រសួងបរិស្ថាន ក្រសួងផែនការ ក្រសួងកសិកម្ម រុក្ខាប្រមាញ់ និងនេសាទ ក្រសួងមហាផ្ទៃ ក្រសួងអភិវឌ្ឍន៍ជនបទ តំណាងអង្គការGRET និងGGGI រដ្ឋបាលរាជធានី-ខេត្ត មន្ទីរសាធារណការ និងដឹកជញ្ជូនរាជធានី-ខេត្តគោលដៅ ដៃគូអភិវឌ្ឍន៍នានា និងអង្គភាពពាក់ព័ន្ធផ្សេងៗទៀត។ ឯកឧត្តមក៏បានបញ្ជាក់បន្ថែមផងដែរថា រាជរដ្ឋាភិបាលកម្ពុជា បានផ្តល់អាទិភាពខ្ពស់ ដល់ការកែលម្អសេវាអនាម័យទីប្រជុំជន ដោយចាត់ទុកថាជាផ្នែកដ៏សំខាន់នៃការអភិវឌ្ឍទីប្រជុំជនប្រកបដោយចីរភាព ការពារបរិស្ថាន និងការលើកកម្ពស់សុខុមាលភាពសាធារណៈ។ ស្របតាមទិសដៅនេះកម្មវិធី "ការអភិវឌ្ឍសមត្ថភាព នៃគម្រោងផ្គត់ផ្គង់ទឹកស្អាត និងអនាម័យខេត្ត (PWSSP)" ក្រោមជំនួយហិរញ្ញប្បទានពីទីភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប (EU) បានចូលរួមយ៉ាងសំខាន់ក្នុងការពង្រឹងសមត្ថភាពស្ថាប័ន បច្ចេកទេស និងក្របខណ្ឌបទប្បញ្ញត្តិនានាក្នុងវិស័យអនាម័យ ឬប្រព័ន្ធទឹកកខ្វក់។ អង្គការហ្រ្គេត (GRET) ជាជំនួយការបច្ចេកទេស បានអនុវត្តកម្មវិធី “ការអភិវឌ្ឍសមត្ថភាព នៃគម្រោងផ្គត់ផ្គង់ទឹកស្អាត និងអនាម័យខេត្ត“ នេះតាំងពីដើមដល់ចប់ ក្រោមកិច្ចសហប្រតិបត្តិការ និងដឹកនាំរបស់ក្រសួងសាធារណការ និងដឹកជញ្ជូន៕