(ភ្នំពេញ)៖ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន នាថ្ងៃចន្ទ ទី១៦ ខែមីនា ឆ្នាំ២០២៦នេះ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី «ប្រព័ន្ធគ្រប់គ្រងហេដ្ឋារចនាសម្ព័ន្ធឆ្លាតវៃ» ដែលរៀបចំឡើងដោយអគ្គនាយកដ្ឋានបច្ចេកទេស សហការជាមួយសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន ក្រោមកម្មវិធីលើកកម្ពស់យុទ្ធសាស្ត្រនវានុវត្ត (SIP) របស់ប្រទេសជប៉ុន។ វគ្គបណ្តុះបណ្តាលនេះមានការចូលរួមពីថ្នាក់ដឹកនាំក្រសួង គ្រូបង្គោលមកពីសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន មន្ត្រីបច្ចេកទេសនៃអគ្គនាយកដ្ឋានពាក់ព័ន្ធ និងសិក្ខាកាមមកពីមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សរុបប្រមាណ១០០នាក់។ ក្នុងឱកាសនោះ ឯកឧត្តម ហ៊ាង វុត្ថា បានលើកឡើងថា ការប្រើប្រាស់បច្ចេកវិទ្យាឆ្លាតវៃក្នុងការគ្រប់គ្រង និងថែទាំហេដ្ឋារចនាសម្ព័ន្ធ គឺជាជំហានសំខាន់មួយក្នុងការកែលម្អគុណភាពផ្លូវថ្នល់ និងបង្កើនប្រសិទ្ធភាពនៃការគ្រប់គ្រងទ្រព្យសម្បត្តិសាធារណៈ ឲ្យស្របតាមការអភិវឌ្ឍបច្ចេកវិទ្យាសម័យថ្មី។ វគ្គបណ្តុះបណ្តាលនេះប្រព្រឹត្តទៅរយៈពេល២ថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែមីនា ឆ្នាំ២០២៦ ដោយថ្ងៃទី១ ផ្តោតលើការសិក្សាទ្រឹស្តី និងថ្ងៃទី២ ចុះអនុវត្តផ្ទាល់នៅទីតាំងការដ្ឋាន។ តាមរយៈវគ្គបណ្តុះបណ្តាលនេះ សិក្ខាកាមនឹងបានស្វែងយល់ពីបទពិសោធន៍របស់ប្រទេសជប៉ុនក្នុងការថែទាំហេដ្ឋារចនាសម្ព័ន្ធផ្លូវថ្នល់ ដូចជា ប្រព័ន្ធត្រួតពិនិត្យស្ថានភាពស្ពានតាមរយៈ iPad និង Tablet ប្រព័ន្ធឌីជីថលសម្រាប់គ្រប់គ្រងទ្រព្យសម្បត្តិ និងការបណ្តុះបណ្តាលវិស្វករ ដើម្បីជួយពង្រឹងសមត្ថភាពមន្ត្រីបច្ចេកទេសកម្ពុជា ឲ្យកាន់តែមានប្រសិទ្ធភាពក្នុងការគ្រប់គ្រង និងថែទាំហេដ្ឋារចនាសម្ព័ន្ធផ្លូវថ្នល់នាពេលអនាគត៕