ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាលបច្ចេកទេសស្តីពី ប្រព័ន្ធគ្រប់គ្រងហេដ្ឋារចនាសម្ព័ន្ធឆ្លាតវៃ ទីស្តីការក្រសួង៖ នាថ្ងៃចន្ទ ទី១៦ ខែមីនា ឆ្នាំ២០២៦ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីបើកវគ្គបណ្តុះបណ្តាលស្តីពី ប្រព័ន្ធគ្រប់គ្រងហេដ្ឋារចនាសម្ព័ន្ធឆ្លាតវៃ ដែលរៀបចំឡើងដោយអគ្គនាយកដ្ឋានបច្ចេកទេស សហការជាមួយសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន ក្រោមកម្មវិធីការលើកកម្ពស់យុទ្ធសាស្ត្រនវានុវត្ត (SIP) នៃប្រទេសជប៉ុន ដោយមានការអញ្ជើញចូលរួមពីថ្នាក់ដឹកនាំក្រសួង គ្រូបង្គោលមកពីសាកលវិទ្យាល័យ និងវិទ្យាស្ថានបច្ចេកវិទ្យានៃប្រទេសជប៉ុន ព្រមទាំងមន្ត្រីបច្ចេកទេសនៃនាយកដ្ឋានក្រោមចំណុះអគ្គនាយកដ្ឋានបច្ចេកទេស អគ្គនាយកដ្ឋានសាធារណការ អគ្គនាយកប្រព័ន្ធចម្រុះទឹកកខ្វក់ និងសិក្ខាកាមមកពីមន្ទីរសាធារណការ និងដឹកជញ្ចូនទាំង ២៥ខេត្ត-ក្រុង សរុបប្រមាណ១០០នាក់។ វគ្គបណ្តុះបណ្តាលនេះប្រព្រឹត្តទៅមានរយ:ពេល២ថ្ងៃ នាថ្ងៃចន្ទ-អង្គារ ទី១៦-១៧ ឆ្នាំ២០២៦ ដែលថ្ងៃទី១ ជាថ្ងៃស្វែងយល់អំពីទ្រឹស្តី និងថ្ងៃទី២ ចុះអនុវត្តនៅទីតាំងការដ្ឋានផ្ទាល់។ វគ្គបណ្តុះបណ្តាលនេះត្រូវបានរៀបចំឡើង ក្នុងគោលបំណងដើម្បីផ្តល់ដើម្បីសិក្សាស្វែងយល់ពីយន្តការអនុវត្ត និងបទពិសោធន៍របស់ប្រទេសជប៉ុនក្នុងការថែទាំហេដ្ឋារចនាសម្ព័ន្ធផ្លូវថ្នល់ រួមមាន ប្រព័ន្ធត្រួតពិនិត្យតាមរយៈ iPad, Tablet ក្នុងការវាយតម្លៃស្ថានភាពស្ពាន ប្រព័ន្ធឌីជីថលសម្រាប់គ្រប់គ្រងទ្រព្យសម្បត្តិ និងប្រព័ន្ធបណ្តុះបណ្តាលវិស្វករ៕