អាជ្ញាធរសង្កត់ចោមចៅទី ៣ ដឹកនាំដោយ លោក វ៉ា សាវឿន ចៅសង្កាត់ និង លោក សុទ្ធ សុជាតិ ចៅសង្កាត់រងទី ១ នៅព្រឹកថ្ងៃទី ៩ ខែមីនា ឆ្នាំ ២០២៦ នេះ បានដាក់គ្រឿងចក្រកាយរៀបចំប្រព័ន្ធលូថ្មី ១ ខ្សែ ជូនប្រជាពលរដ្ឋ ស្ថិតនៅតាមបណ្តោយផ្លូវលខ ១៣៧S ក្នុងភូមិជម្ពូវ័ន ២ សង្កាត់ចោមចៅទី៣ ខណ្ឌពោធិ៍សែនជ័យ ដើម្បីរំដោះការជន់លិចដោយទឹកភ្លៀងនារដូវវស្សា។អាជ្ញាធរ បានឲ្យដឹងថា កន្លងមក ទីតាំងខាងលើកង្វះនូវប្រព័ន្ធលូ ធ្វើឲ្យភ្លៀងមកម្តងៗ ឬ ខែវស្សា ទឹកហូរយឺត មិនទាន់ ងាយនឹងជន់លិចដោយទឹកភ្លៀង ទើបរដ្ឋបាលសង្កាត់ចោមចៅទី ៣ ចាត់តាំងជំនាញចុះពិនិត្យមើលជាក់ស្ដែង និងយកគ្រឿងចក្រកាយរៀបចំដាក់ប្រព័ន្ធលូថ្មីជូនប្រជាពលរដ្ឋតែម្ដង ដើម្បីរំដោះទឹកកុំឲ្យជន់លិចតទៅទៀត។អាជ្ញាធរ ក៏បានអំពាវនាវដល់ប្រជាពលរដ្ឋទាំងអស់ សូមមេត្តាជួយថែរក្សាអនាម័យបរិស្ថាន និងទុកដាក់វេចខ្ចប់សំរាមឲ្យបានត្រឹមត្រូវ ចៀសវាងបោះចោលគ្មានសណ្ដាប់ធ្នាប់ បង្កការកកស្ទះប្រព័ន្ធលូ៕