ក្រុមការងារក្រសួងចុះផ្សព្វផ្សាយច្បាប់ និងលិខិតបទដ្ឋានគតិយុត្តពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ដល់មូលដ្ឋានក្នុងខេត្តភូមិភាគឦសាន មណ្ឌលគិរី ៖ នាថ្ងៃអង្គារ ទី១០ ខែមីនា ឆ្នាំ២០២៦ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ អមដំណើរដោយឯកឧត្តមអនុរដ្ឋលេខាធិការទទួលបន្ទុក លោកប្រធានលេខាធិការដ្ឋាននៃគណៈកម្មាធិការសម្របសម្រួលអចិន្រ្តៃយ៍ បានអញ្ជើញជាអធិបតីដឹកនាំកិច្ចប្រជុំផ្សព្វផ្សាយការងារទប់ស្កាត់ការដឹកជញ្ជូនលើសទម្ងន់កម្រិតកំណត់ដល់ម្ចាស់ការដ្ឋានអាជីវកម្មថ្ម ដេប៉ូខ្សាច់-ក្រួស ម្ចាស់ការដ្ឋានជីកយកអាចម៍ដី ដេប៉ូគ្រឿងសំណង់ និងម្ចាស់អាជីវកម្មដ្ឋានទំនិញផ្សេងៗក្នុងខេត្តមណ្ឌលគិរី ដោយមានការអញ្ជើញចូលរួមជាសហប្រធានដឹកនាំដោយ ឯកឧត្តម ឌឹម នី អភិបាលរងនៃគណៈអភិបាលខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកអភិបាល/អភិបាលរងនៃគណៈអភិបាលក្រុង-ស្រុក មន្ទីរ-អង្គភាព និងមន្រ្តីជំនាញពាក់ព័ន្ធ ព្រមទាំងម្ចាស់ការដ្ឋានអាជីវកម្មថ្ម ដេប៉ូខ្សាច់-ក្រួស ម្ចាស់ការដ្ឋានជីកយកអាចម៍ដី ដេប៉ូគ្រឿងសំណង់ និងម្ចាស់អាជីវកម្មដ្ឋានទំនិញផ្សេងៗក្នុងខេត្តមណ្ឌលគិរី សរុបចំនួន ៤៦នាក់។ កិច្ចប្រជុំនេះរៀបចំឡើងក្នុងគោលបំណង ដើម្បីផ្សព្វផ្សាយអំពីច្បាប់ បទដ្ឋានគតិយុត្ត និងបច្ចេកទេសពាក់ព័ន្ធនឹងការងារដឹកជញ្ជូនលើសទម្ងន់កម្រិតកំណត់ដែលរួមមានច្បាប់ស្តីពីផ្លូវថ្នល់ មាត្រា២៦ មាត្រា៦០ រចនាសម្ព័ន្ធគ្រប់គ្រង សេចក្តីជូនដំណឹងលេខ០១០ សក.សជណ.គតលទ ចុះថ្ងៃទី១៨ ខែមីនា ឆ្នាំ២០២៥ ស្តីពីការដោះលែង និងរឹតបន្តឹងការអនុវត្តច្បាប់លើយានយន្តដឹកជញ្ជូនលើសទម្ងន់កម្រិតកំណត់ សេចក្តីជូនដំណឹងលេខ០៥២ សក.សជណ.គតលទ ចុះថ្ងៃទី១៨ ខែកក្កដា ឆ្នាំ២០២៥ ស្តីពីការចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ អំពីទម្ងន់អនុញ្ញាតផ្ទុកតាមប្រភេទយានយន្ត និងភ្លៅនីមួយៗ និងទណ្ឌកម្មពិន័យចំពោះយានយន្តដឹកលើសទម្ងន់ ដល់ម្ចាស់ការដ្ឋានអាជីវកម្មថ្ម ដេប៉ូខ្សាច់ ម្ចាស់អាជីវកម្មដ្ឋានពាក់ព័ន្ធនឹងការដឹកទំនិញលើសទម្ងន់ និងគ្រប់ភាគីពាក់ព័ន្ធទាំងអស់ បានយល់ដឹង ហើយចូលរួមគោរព និងអនុវត្តឱ្យបានត្រឹមត្រូវតាមច្បាប់កំណត់ជាធរមាន។ គួររម្លឹកដែរថា ខេត្តមណ្ឌលគិរីនេះជាខេត្តទី១៦ហើយ ដែលក្រុមការងារក្រសួង បានចុះផ្សព្វផ្សាយ និងបន្តធ្វើកិច្ចការទាំងនេះឱ្យបានទូទាំងប្រទេស។ ថ្លែងក្នុងកិច្ចប្រជុំ ឯកឧត្តមរដ្ឋលេខាធិការប្រធានអង្គប្រជុំ បានសម្តែងនូវការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងចូលរួមទប់ស្កាត់ការដឹកជញ្ជូនលើសទម្ងន់ពីសំណាក់អាជ្ញាធរដែនដីគ្រប់លំដាប់ថ្នាក់ និងសមត្ថកិច្ចពាក់ព័ន្ធទាំងអស់ និងសូមបន្តចូលរួមផ្សព្វផ្សាយ អប់រំ ណែនាំដល់អាជីវករ និងម្ចាស់អាជីវកម្មដ្ឋានពាក់ព័ន្ធនឹងការដឹកជញ្ជូនទំនិញក្នុងដែនសមត្ថកិច្ចរបស់ខ្លួន ឱ្យបានទូលំទូលាយបន្ថែមទៀត។ ជាមួយគ្នានេះ មុននឹងបញ្ចប់ ឯកឧត្តមប្រធាន បានណែនាំដល់ម្ចាស់ការដ្ឋានអាជីវកម្មថ្ម ដេប៉ូខ្សាច់ និងម្ចាស់អាជីវកម្មដ្ឋាននានា សូមចូលរួមគោរព និងអនុវត្តតាមច្បាប់ឱ្យបានត្រឹមត្រូវ កុំដឹកជញ្ជូនលើសទម្ងន់អនុញ្ញាតនៃច្បាប់ ដែលនាំឱ្យខូចខាតដល់ផ្លូវជាតិរបស់យើងទាំងអស់គ្នាមុនអាយុកាលកំណត់៕