កិច្ចប្រជុំលើកទី១ របស់ក្រុមលេខាធិការដ្ឋានគណៈកម្មាធិការលើកកម្ពស់អភិបាលកិច្ច នៃក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃសុក្រ ទី៦ ខែមីនា ឆ្នាំ២០២៦ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ និងជាប្រធានក្រុមលេខាធិការដ្ឋាន បានអញ្ជើញដឹកនាំកិច្ចប្រជុំលើកទី១ របស់ក្រុមការងារ ដោយមានការចូលរួមពី លោក លោកស្រីជាអនុប្រធាន និងសមាជិកក្រុមការងារ ដើម្បីពិនិត្យនិងពិភាក្សាលើកិច្ចការសំខាន់ៗពាក់ព័ន្ធនឹងការអនុវត្តការងារគាំទ្រដល់គណៈកម្មាធិការលើកកម្ពស់អភិបាលកិច្ចនៃក្រសួងសាធារណការ និងដឹកជញ្ជូន។ ថ្លែងនៅក្នុងកិច្ចប្រជុំនេះ ឯកឧត្តមប្រធានក្រុមការងារ បានជម្រាបជូនអំពីសមាសភាពក្រុមការងារបង្គោល ការអនុវត្តតួនាទីភារកិច្ចស្នូល និងរបៀបរបបការងារ និងយន្តការការងារសំខាន់ៗដែលបានដាក់ចេញដោយក្រសួងមុខងារសាធារណៈ ក្នុងគោលបំណងជំរុញការអនុវត្តការងារលើកកម្ពស់អភិបាលកិច្ច ដោយផ្តោតលើកិច្ចការជាអាទិភាព រួមមាន កិច្ចការកែទម្រង់រដ្ឋបាលសាធារណៈ កិច្ចការកែទម្រង់ការគ្រប់គ្រងហិរញ្ញវត្ថុសាធារណៈ កិច្ចការកែទម្រង់វិមជ្ឈការ និងវិសហមជ្ឈការ និងកិច្ចការកែទម្រង់ច្បាប់ ដើម្បីជំរុញការអនុវត្តកម្មវិធីកែទម្រង់របស់រាជរដ្ឋាភិបាលប្រកបដោយសង្គតិភាព និងសុខដុមនីយកម្ម ព្រមទាំងផ្សារភ្ជាប់នឹងគោលនយោបាយ និងស្របតាមយន្តការណែនាំរួមរបស់រាជរដ្ឋាភិបាល។ សូមជម្រាបជូនថា រាជរដ្ឋាភិបាល បានដាក់ចេញអនុក្រឹត្យស្តីពីការបង្កើតគណៈកម្មាធិការលើកកម្ពស់អភិបាលកិច្ចក្រសួង ស្ថាប័ន ចំណុះអង្គការនីតិប្រតិបត្តិ ក្នុងន័យជំរុញការបង្កើតឱ្យមានគណៈកម្មាធិការ និងក្រុមការងារសំខាន់ៗ នៅតាមបណ្តាក្រសួង ស្ថាប័ន ដើម្បីអនុវត្តការងារនៅតាមវិស័យឱ្យទទួលបានវឌ្ឍនភាពស្របតាមផែនការសកម្មភាពរបស់ក្រសួង និងរាជរដ្ឋាភិបាល៕