ខេត្តព្រះសីហនុ ជាខេត្តទី១៥ ដែលក្រុមការងារក្រសួងសាធារណការ និងដឹកជញ្ជូន ចុះផ្សព្វផ្សាយច្បាប់ និងលិខិតបទដ្ឋានគតិយុត្ត ពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ ព្រះសីហនុ៖ នាព្រឹកថ្ងៃទី២៤ ខែកុម្ភៈ ឆ្នាំ២០២៦ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ អមដំណើរដោយឯកឧត្តមអនុរដ្ឋលេខាធិការទទួលបន្ទុក និងលោកប្រធានលេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ បានអញ្ជើញជាអធិបតីដឹកនាំកិច្ចប្រជុំផ្សព្វផ្សាយ ស្តីពីការទប់ស្កាត់ការដឹកជញ្ជូនលើសទម្ងន់កម្រិតកំណត់ ដល់ម្ចាស់ការដ្ឋានអាជីវកម្មថ្ម ដេប៉ូខ្សាច់-ក្រួស ម្ចាស់ការដ្ឋានជីកយកអាចម៍ដី ដេប៉ូគ្រឿងសំណង់ និងម្ចាស់អាជីវកម្មដ្ឋានទំនិញផ្សេងៗ ក្នុងខេត្តព្រះសីហនុ។ កិច្ចប្រជុំនេះ មានការចូលរួមជាសហប្រធានដឹកនាំដោយ ឯកឧត្តម អ៉ី សុខឡេង អភិបាលរង នៃគណៈអភិបាលខេត្ត ព្រមទាំងលោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកអភិបាល/អភិបាលរង នៃគណៈអភិបាលក្រុង-ស្រុក មន្ទីរ-អង្គភាព និងមន្ត្រីជំនាញពាក់ព័ន្ធ រួមជាមួយម្ចាស់អាជីវកម្មដ្ឋាននានា សរុបចំនួន ៥០ នាក់។ កិច្ចប្រជុំត្រូវបានរៀបចំឡើងក្នុងគោលបំណងផ្សព្វផ្សាយ និងពន្យល់អំពីច្បាប់ បទដ្ឋានគតិយុត្ត និងបទប្បញ្ញត្តិបច្ចេកទេសពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ រួមមាន ច្បាប់ស្តីពីផ្លូវថ្នល់ (មាត្រា ២៦ និងមាត្រា ៦០) រចនាសម្ព័ន្ធគ្រប់គ្រង ព្រមទាំងសេចក្តីជូនដំណឹងពាក់ព័ន្ធនានា ស្តីពីការរឹតបន្តឹងការអនុវត្តច្បាប់លើយានយន្តដឹកជញ្ជូនលើសទម្ងន់ ការចូលរួមទប់ស្កាត់ការដឹកជញ្ជូនលើសទម្ងន់ ការកំណត់ទម្ងន់អនុញ្ញាតផ្ទុកតាមប្រភេទយានយន្ត និងភ្លៅនីមួយៗ និងទណ្ឌកម្មពិន័យចំពោះការបំពាន។ គោលដៅសំខាន់ គឺធានាឱ្យម្ចាស់អាជីវកម្ម និងភាគីពាក់ព័ន្ធទាំងអស់ បានយល់ដឹងច្បាស់ អំពីកាតព្វកិច្ច និងការទទួលខុសត្រូវរបស់ខ្លួន ដើម្បីចូលរួមគោរព និងអនុវត្តច្បាប់ឱ្យបានត្រឹមត្រូវ ស្របតាមបទប្បញ្ញត្តិជាធរមាន។ គួរបញ្ជាក់ថា ខេត្តព្រះសីហនុ គឺជាខេត្តទី១៥ ហើយ ដែលក្រុមការងារក្រសួងសាធារណការ និងដឹកជញ្ជូន បានចុះផ្សព្វផ្សាយការងារនេះ ហើយនឹងបន្តអនុវត្តឱ្យបានទូលំទូលាយទូទាំងប្រទេស។ ថ្លែងក្នុងកិច្ចប្រជុំ ឯកឧត្តមរដ្ឋលេខាធិការ ប្រធានអង្គប្រជុំ បានសម្តែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់អាជ្ញាធរដែនដីគ្រប់លំដាប់ថ្នាក់ និងសមត្ថកិច្ចពាក់ព័ន្ធ ក្នុងការចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ ព្រមទាំងបានជំរុញឱ្យបន្តផ្សព្វផ្សាយ អប់រំ និងណែនាំដល់អាជីវករ និងម្ចាស់អាជីវកម្មដ្ឋានក្នុងដែនសមត្ថកិច្ចរបស់ខ្លួន ឱ្យបានទូលំទូលាយបន្ថែមទៀត។ ជាមួយគ្នានេះ ឯកឧត្តមប្រធាន បានណែនាំដល់ម្ចាស់ការដ្ឋានអាជីវកម្ម និងម្ចាស់អាជីវកម្មដ្ឋានទាំងអស់ សូមចូលរួមគោរព និងអនុវត្តតាមច្បាប់ឱ្យបានត្រឹមត្រូវ មិនដឹកជញ្ជូនលើសទម្ងន់អនុញ្ញាត ដើម្បីការពារសុវត្ថិភាពចរាចរណ៍ និងបង្ការការខូចខាតផ្លូវជាតិ មុនអាយុកាលកំណត់ ដែលជាសម្បត្តិសាធារណៈរបស់ជាតិ៕