កិច្ចប្រជុំក្រុមការងារបច្ចេកទេសលើកកម្ពស់សុវត្ថិភាពចរាចរណ៍ផ្លូវគោកនៅតំបន់សាលារៀន (TWG-SSZI) ទីស្តីការក្រសួង៖ នាថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីក្នុងកិច្ចប្រជុំក្រុមការងារបច្ចេកទេសលើកកម្ពស់សុវត្ថិភាពចរាចរណ៍ផ្លូវគោកនៅតំបន់សាលារៀន (TWG-SSZI) លើកទី៣ និងដោយមានការចូលរួមពី ឯកឧត្តម លោកជំទាវ ថា្នក់ដឹកនាំ តំណាងអគ្គស្នងការដ្ឋាននគរបាលជាតិនៃក្រសួងមហាផ្ទៃ តំណាងអគ្គនាយកដ្ឋានដឹកជញ្ជូនផ្លូវគោក អគ្គនាយកដ្ឋានបច្ចេកទេសនៃក្រសួងសាធារណការ និងដឹកជញ្ជូន តំណាងក្រសួងអប់រំ យុវជន និងកីឡា តំណាងក្រសួងអភិវឌ្ឍន៍ជនបទ តំណាងអង្គការកាកបាទក្រហមកម្ពុជា តំណាងអង្គការបង្ការរបួសអាស៊ី អង្គការយូនីសេហ្វ អង្គការខេមសេហ្វ ក្រុមហ៊ុន Daon Daol សមាជិក សមាជិកានៃក្រុមការងារ TWG-SSZI រួមទាំងដៃគូអភិវឌ្ឍន៍ និងវិស័យឯកជនពាក់ព័ន្ធជាច្រើនរូបផងដែរ។ គោលបំណងនៃកិច្ចប្រជុំនេះ គឺដើម្បី (១). ពិនិត្យឆ្លងលើសេចក្តីព្រាងរបាយការណ៍សង្ខេបនៃកិច្ចប្រជុំលើកទី២ របស់ក្រុមការងារ TWG-SSZI សារអប់រំសម្រាប់ប្រើប្រាស់ក្នុងសកម្មភាពលើកកម្ពស់សុវត្ថិភាពចរាចរណ៍នៅតំបន់សាលារៀន និងផែនការងារសកម្មភាពរបស់ក្រុមការងារ TWG-SSZI សម្រាប់ឆ្នាំ២០២៦ (២). បង្ហាញអំពីផែនការសកម្មភាពរបស់ដៃគូពាក់ព័ន្ធក្នុងការលើកកម្ពស់សុវត្ថិភាពចរាចរណ៍នៅតំបន់សាលារៀន (៣). ពិភាក្សាអំពីការបង្កើតអនុក្រុមការងារចំណុះឱ្យក្រុមការងារ TWG-SSZI និងការបង្កើតក្រុមការងារបច្ចេកទេសថា្នក់ខេត្តលើកកម្ពស់សុវត្ថិភាពចរាចរណ៍នៅតំបន់សាលារៀន៕