ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នាព្រឹកថ្ងៃទី០៥ ខែកុម្ភៈ ឆ្នាំ២០២៦នេះ បានបញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ ក្រសួងសាធារណការ និងដឹកជញ្ជូន និងមានការចូលរួមពីលោក លោកស្រី ជាថ្នាក់ដឹកនាំ មន្ត្រីរាជការ និងបុគ្គលិករបស់ក្រសួងប្រមាណ ៥០០នាក់។ ថ្លែងនាឱកាសនោះឯកឧត្តម ប៉េង ពោធិ៍នា បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការទាំងអស់ ដែលបានរួមចំណែកយ៉ាងសកម្ម លះបង់ទាំងកម្លាំងកាយ និង កម្លាំងចិត្ត ចំណាយទាំងបញ្ញា និងស្មារតី ខិតខំប្រឹងប្រែងបំពេញការងារមិនខ្លាចនឿយហត់ ប្រកបដោយស្មារតីទទួលខុសត្រូវខ្ពស់ រហូតឈានទៅសម្រេចបាននូវសមិទ្ធផលសំខាន់ៗ ជាច្រើនជូនក្រសួង ក៏ដូចជាសង្គមជាតិ ក្នុងរយៈពេលពេញមួយឆ្នាំកន្លងមកនេះ។ ឯកឧត្តម ប៉េង ពោធិ៍នា បានបន្ថែមថា ការរៀបចំសន្និបាតប្រចាំឆ្នាំនេះ គឺជាឱកាសដ៏វិសេសវិសាលមួយ ដើម្បីធ្វើការពិភាក្សា ពិនិត្យវាយតម្លៃឡើងវិញរួមគ្នា លើវឌ្ឍនភាពការងាររបស់វិស័យសាធារណការ និងដឹកជញ្ជូន ដែលក្រសួង សម្រេចបានក្នុងរយៈពេលមួយឆ្នាំកន្លងទៅ ក៏ដូចជាពិភាក្សាពីបញ្ហាប្រឈមនានា ដើម្បីស្វែងរកដំណោះស្រាយ និងលើកទិសដៅការងារសម្រាប់ឆ្នាំបន្ទាប់ ក្នុងស្មារតីចូលរួមអនុវត្ត យុទ្ធសាស្ត្របញ្ចកោណ-ដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ និងគោល នយោបាយនានារបស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីចូលរួមអភិវឌ្ឍ សង្គម-សេដ្ឋកិច្ច ឱ្យកាន់តែរីកចម្រើនប្រកបដោយចីរភាព និងបរិយាបន្ន។ ឯកឧត្តម ប៉េង ពោធិ៍នា បានបញ្ជាក់ដែរថា សម្រាប់សន្និបាតឆ្នាំនេះមានរយៈពេល ២ថ្ងៃ ប្រព្រឹត្តទៅចាប់ពីថ្ងៃនេះទី៥ រហូតដល់ ថ្ងៃស្អែកទី៦ ខែកុម្ភៈ ឆ្នាំ២០២៦ ដែលគណៈកម្មការសន្និបាតបានរៀបចំជាទម្រង់កិច្ចពិភាក្សា (Panel Discussion) បែងចែកជាបីផ្នែករួមមាន៖ (១)ស្តីពីបញ្ហាប្រឈម និងយុទ្ធសាស្ត្រនៃការអភិវឌ្ឍវិស័យសាធារណការ និងដឹកជញ្ជូន, (២) ស្តីពីការគ្រប់គ្រង និង តាមដានការអនុវត្តគម្រោងហេដ្ឋារចនាសម្ព័ន្ធក្រោមហិរញ្ញប្បទានពីដៃគូរអភិវឌ្ឍន៍ និង (៣) ស្តីពីការពង្រឹងប្រសិទ្ធភាពសេវាសាធារណៈ និងការអនុវត្តគម្រោងហេដ្ឋារចនាសម្ព័ន្ធ ប្រើប្រាស់ ថវិកាជាតិ ដែលជាផ្នែកមួយក្នុងការផ្តល់ឱកាសជូនថ្នាក់ដឹកនាំ និងមន្ត្រីរាជការគ្រប់ជាន់ថ្នាក់ អាចចូលរួមស្តាប់នូវកិច្ចពិភាក្សាផ្លាស់ប្តូរមតិយោបល់ ការចែករំលែកបទពិសោធន៍ ចំណេះដឹង និងធាតុចូលនានាសម្រាប់គ្រប់គ្រង រៀបចំ និងអនុវត្តទិសដៅការងារបន្តឱ្យកាន់តែមាន ប្រសិទ្ធភាព ប្រកបដោយស្មារតីបុរេសកម្ម សកម្ម និងអន្តរសកម្ម លើការទទួលខុសត្រូវខ្ពស់។ ក្នុងគោលបំណងសម្រេចឱ្យបាននូវចក្ខុវិស័យកម្ពុជាឆ្នាំ២០៥០ ដោយប្រែក្លាយកម្ពុជា ទៅជាប្រទេសមានចំណូលខ្ពស់, រាជរដ្ឋាភិបាលនៅក្នុងអាណត្តិទី៧នេះ ក្រោមការដឹកនាំប្រកបដោយគតិបណ្ឌិត ភាពឈ្លាសវៃ និងស្វាហាប់របស់ សម្តេចធិបតី នាយករដ្ឋមន្ត្រី បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ដោយកំណត់អាទិភាពគន្លឹះចំនួន៥ គឺ មនុស្ស ផ្លូវ ទឹក ភ្លើង និង បច្ចេកវិទ្យា ក្នុងនោះវិស័យសាធារណការ និងដឹកជញ្ជូន ក៏ជាផ្នែកមួយនៃអាទិភាពគន្លឹះនៅក្នុងយុទ្ធសាស្ត្របញ្ចកោណ ដែលបាននិងកំពុងដើរតួនាទីយ៉ាងសំខាន់ក្នុងការរួមចំណែកដល់ ការអភិវឌ្ឍប្រទេសជាតិ និងលើកកម្ពស់កំណើនសេដ្ឋកិច្ច តាមរយៈការតភ្ជាប់ឱ្យមានភាព ប្រទាក់ក្រឡា និងសមាហរណកម្មផ្ទៃក្នុង និងតំបន់ ដើម្បីធានាប្រសិទ្ធភាពនៃការដឹកជញ្ជូន និងការរីកចម្រើននៃប្រព័ន្ធឡូជីស្លឹក។ ជាមួយគ្នានោះ ឯកឧត្តមរដ្ឋមន្ត្រី ប៉េង ពោធិ៍នា បានបន្ថែមទៀតថា ក្នុងស្មារតីគោរពយ៉ាងម៉ឺងម៉ាត់លើការអនុវត្តយុទ្ធសាស្ត្របញ្ចកោណ-ដំណាក់កាល ទី១ ឱ្យមានប្រសិទ្ធភាព និងសម្រេចបានជោគជ័យ ក្រសួងសាធារណការ និងដឹកជញ្ជូន បានកំណត់នូវចក្ខុវិស័យសំខាន់ៗចំនួនពីរ រួមមាន ទី១៖ ការលើកកម្ពស់សេវាដឹកជញ្ជូនគ្រប់ប្រភេទ តាមរយៈការអភិវឌ្ឍ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុងការ គ្រប់គ្រង និងការផ្តល់សេវាឱ្យបាន លឿន រហ័ស តម្លាភាព ប្រសិទ្ធភាព ងាយស្រួល និងជឿ ទុកចិត្ត និង ទី២៖ ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្លឹក និង ការអភិវឌ្ឍហេដ្ឋារចនាសម្ព័ន្ធដឹកជញ្ជូនឱ្យមានគុណភាព សុវត្ថិភាព ចីរភាព ភាពធន់ និង បរិយាបន្ន៕