ផ្លូវជាតិលេខ៦១តភ្ជាប់ចាប់ពីសាលាក្រុង ទៅផ្សារសាមគ្គីស្ទឹងត្រែង ក្រុមបច្ចេកទេសនៃមន្ទីរសាធារណការ បានធ្វើការជួសជុលដោយចាក់កៅស៊ូឡើងវិញ ដើម្បីបង្កភាពងាយស្រួលដល់ការធ្វើចរាចរណ៍ទៅមក របស់ប្រជាពលរដ្ឋ សិស្សានុសិស្ស និងបានលើកកម្ពស់សោភណភាពក្នុងក្រុងទៀតផង។ ក្នុងសកម្មភាពជួសជុលផ្លូវនៅក្នុងសង្កាត់ ក្រុង ខេត្តស្ទឹងត្រែង នាថ្ងៃទី ២ ខែកុម្ភៈ ឆ្នាំ២០២៦នេះ លោក សរ គឹមណាត ប្រធានមន្ទីរសាធារណការនិងដឹកជញ្ជូនខេត្ត បានបញ្ជាក់ថា៖ ក្រុមការងារនឹង ពន្លឿនការជួសជុលផ្លូវនេះឱ្យហើយ នៅដើមខែកុម្ភៈ ដើម្បីអនុវត្តន៍ផែនការលើកកម្ពស់ទីក្រុងស្អាត តាមបទបញ្ជារបស់ឯកឧត្តម អភិបាលខេត្ត ក្នុងពេលដែលរដ្ឋបាលខេត្ត កំពុងអភិវឌ្ឍន៍សួនតេជោសន្តិភាពនៅជិតនេះ ។ លោកបន្តថា៖ ផ្លូវលេខ៦១នេះ ជាផ្លូវខ្សែទី២ មានអាទិភាពតភ្ជាប់ទៅផ្លូវបំបែក កែងរង្វង់មូលធំ និងឆ្ពោះទៅផ្សារសាមគ្គី ហើយជាមួយគ្នានេះ បងប្អូនប្រជាពលរដ្ឋ ត្រូវចូលរួមសម្អាតបរិស្ថាន នៅតាមមុខផ្ទះទៅតាមការណែនាំរបស់អាជ្ញាធរ និងទុកជាប្រយោជន៍ បានជួយថែរក្សាផ្លូវនេះផង។ លោកសុខចាន់សំអឿន តំណាងឱ្យប្រជាពលរដ្ឋនៅក្រុងស្ទឹងត្រែង បានចាត់ទុកថា៖ នេះជាសារមួយទៀត សម្រាប់ប្រជាពលរដ្ឋយើងរួមគ្នាអនុវត្តន៍ ក្នុងពេលដែលរដ្ឋបាលខេត្ត កំពុងរៀបចំអភិវឌ្ឍន៍ ទីក្រុងស្អាត ស្របតាមគោលនយោបាយរបស់រាជរដ្ឋាភិបាល ។ លោកបន្តថា៖ នៅពេលមានផ្លូវល្អបងប្អូនយើង ស្រឡាញ់ពេញចិត្ត ហើយនាំគ្នាជួយថែរក្សាសម្អាតបរិស្ថាន នៅតាមមូលដ្ឋានរស់នៅឱ្យបានស្អាត និងងាយស្រួលធ្វើដំណើរទៅ ទទួលយកសេវាសាធារណៈនៅសាលាក្រុង បានឆាប់រហ័សផងដែរ ។ សូមបញ្ជាក់ថា៖ផ្លូវលេខ៦១នេះកន្លងមករងការខូចខាតដោយសារតែក្រុមការងារអភិវឌ្ឍន៍ រៀបចំប្រព័ន្ធទឹកស្អាត និងប្រព័ន្ធដោះទឹកកខ្វក់ ចេញពីក្រុង បម្រើឱ្យសេវាសាធារណៈ ហើយអភិបាលខេត្ត បានដាក់បទបញ្ជាឱ្យក្រុមហ៊ុនសហការជាមួយមន្ត្រីជំនាញ ធ្វើការជួសជុលឱ្យរួចរាល់គ្រប់ទីកន្លែង នៅខែមិថុនាឆ្នាំ២០២៦ខាងមុខ ៕