កម្ពុជាកំពុងសិក្សាស្ពានឆ្លងទន្លេមេគង្គថ្មី តភ្ជាប់កោះនរា ទៅក្រុងអរិយក្សត្រ ភ្នំពេញ៖ នាព្រឹកថ្ងៃទី២៨ ខែមករា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំកិច្ចប្រជុំសំខាន់មួយ ដើម្បីពិនិត្យ និងពិភាក្សាលើគម្រោងសិក្សា និងសាងសង់ស្ពានឆ្លងកាត់ទន្លេមេគង្គ ដែលនឹងតភ្ជាប់ពីតំបន់អភិវឌ្ឍន៍កោះនរា (រាជធានីភ្នំពេញ) ឆ្ពោះទៅកាន់ក្រុងរណបមេគង្គឃី (Mekong Quay) នៃក្រុងអរិយក្សត្រ ខេត្តកណ្តាល។ យោងតាមសេចក្ដីរាយការណ៍ពីក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំនេះមានការចូលរួមពីថ្នាក់ដឹកនាំក្រសួង តំណាងរដ្ឋបាលរាជធានីភ្នំពេញ រដ្ឋបាលខេត្តកណ្តាល ព្រមទាំងតំណាងក្រុមហ៊ុនឯកជនធំៗរួមមាន ក្រុមហ៊ុន OCIC និងក្រុមហ៊ុនធីភីម៉ូរ៉ាល់គ្រុប (TP Moral Group)។ ក្រសួងបានញ្ជាក់ថា គម្រោងស្ពានថ្មីនេះ ត្រូវបានរំពឹងថានឹងក្លាយជាសរសៃឈាមសេដ្ឋកិច្ចដ៏សំខាន់ ក្នុងការជួយសម្រួលដល់ការធ្វើដំណើរ កាត់បន្ថយការកកស្ទះចរាចរណ៍ និងជំរុញការអភិវឌ្ឍវិស័យអចលនទ្រព្យនៅតំបន់ត្រើយម្ខាងទន្លេឱ្យកាន់តែមានសន្ទុះខ្លាំងឡើង។ តាមរយៈការសិក្សានេះ ក្រសួងសាធារណការ និងភាគីពាក់ព័ន្ធ កំពុងផ្ដោតលើការរៀបចំប្លង់បច្ចេកទេស និងផលប៉ះពាល់នានា ដើម្បីធានាឱ្យបាននូវសំណង់ដែលមានគុណភាព និងសោភ័ណភាព ស្របតាមចក្ខុវិស័យពង្រីកទីក្រុងភ្នំពេញទៅកាន់ទិសខាងកើត។