សិក្ខាសាលាពិគ្រោះយោបល់ និងប្រមូលធាតុចូល លើកទី៥ លើសេចក្ដីព្រាងច្បាប់ស្ដីពីភស្តុភារកម្ម រាជធានីភ្នំពេញ៖ នាថ្ងៃអង្គារ ទី០៩ ខែធ្នូ ឆ្នាំ២០២៥ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញជាគណៈអធិបតីក្នុងពិធីបើកសិក្ខាសាលាពិគ្រោះយោបល់ និងប្រមូលធាតុចូល លើកទី០៥ លើសេចក្ដីព្រាងច្បាប់ស្ដីពីភស្តុភារកម្ម កម្រិតអន្តរក្រសួង ស្ថាប័ន ដោយមានការអញ្ជើញចូលរួមពីថ្នាក់ដឹកនាំក្រសួង តំណាងមកពីក្រសួង ស្ថាប័ន តំណាងគណៈនៃគណៈអភិបាលរាជធានី-ខេត្តទាំង២៥ តំណាងមកពីអគ្គនាយកដ្ឋានពាក់ព័ន្ធ ក្រោមឱវាទក្រសួង និងមន្ត្រីជំនាញនៃអគ្គនាយកដ្ឋានភស្តុភារកម្ម ដោយមានសិក្ខាកាមសរុបចំនួន ១៤០រូប។ សិក្ខាសាលាពិគ្រោះយោបល់នេះ រៀបចំឡើងក្នុងគោលបំណងដាក់ឆ្លងសេចក្ដីព្រាងច្បាប់ស្ដីពី “ភស្តុភារកម្ម” អន្តរក្រសួង ស្ថាប័នទាំងអស់ ដើម្បី (១) ធ្វើការពិនិត្យ និងពិភាក្សា (២) មតិយោបល់ ឬប្រមូលធាតុចូលនានា លើសេចក្តីព្រាងច្បាប់ស្តីពី “ភស្តុភារកម្ម” ឱ្យបានកាន់តែល្អប្រសើរ ពេញលេញ គ្រប់ជ្រុងជ្រោយ ដើម្បីពង្រឹងការគ្រប់គ្រង និងអភិវឌ្ឍន៍ក្នុងវិស័យភស្ដុភារកម្ម ឱ្យមានភាពធន់ ស្តង់ដាររួម កាត់បន្ថយចំណាយភស្តុភារកម្ម (Cost) បង្កើនប្រសិទ្ធភាពទាំងពេលវេលា និងទំនុកចិត្ត (Time & Reliable) ការលើកម្ពស់ឧត្តមានុវត្តល្អៗ និងបង្កើនភាពប្រកួតប្រជែងអាជីវកម្មភស្តុភារកម្ម នៅព្រះរាជាណាចក្រកម្ពុជា។ សូមជម្រាបផងដែរថា សេចក្ដីព្រាងច្បាប់ខាងលើ ជាឯកសារគតិយុត្តដ៏មានសារៈសំខាន់ និងជាកម្លាំងចលករ ដែលមិនអាចខ្វះបានក្នុងការជួយជំរុញនូវខឿនសេដ្ឋកិច្ចជាតិឱ្យកាន់តែរីកចម្រើនបន្ថែមទៀត ទន្ទឹមនេះ អគ្គនាយកដ្ឋានភស្ដុភារកម្ម នឹងបន្តធ្វើការកែសម្រួល ឬបច្ចុប្បន្នភាពលើសេចក្ដីព្រាងច្បាប់ស្ដីពី “ភស្តុភារកម្ម” បន្ទាប់ពីបានមតិយោបល់ពីបណ្ដាសិក្ខាកាមចូលរួម មុនដាក់ឆ្លងនូវសេចក្ដីព្រាងច្បាប់នេះទៅកាន់ទីស្ដីការ គណៈរដ្ឋមន្រ្តី ធ្វើការពិនិត្យ និងផ្ដល់យោបល់បន្តទៀត។ ថ្លែងនាឱកាសនោះ ឯកឧត្តមរដ្ឋលេខាធិការបានធ្វើការវាយតម្លៃខ្ពស់ថា ”សិក្ខាសាលាពិគ្រោះយោបល់ និងប្រមូលធាតុចូល” លើកទី០៥ លើសេចក្ដីព្រាងច្បាប់ស្ដីពី "ភស្តុភារកម្ម" នេះ ពិតជាទទួលផ្លែផ្លាជាទីមោទនៈ តាមរយៈការចូលរួមផ្ដល់ជាមតិយោបល់ ឬប្រមូលធាតុចូលយ៉ាងផុសផុល មកពីបណ្ដាសិក្ខាកាមមកពីក្រសួង ស្ថាប័ន និងគណៈនៃគណៈអភិបាលរាជធានី-ខេត្ត ផងដែរ៕