កិច្ចប្រជុំចង្អៀត ដើម្បីពិនិត្យ និងពិភាក្សាបន្តលើសេចក្ដីព្រាងអនុក្រឹត្យស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ទីស្តីការគណៈរដ្ឋមន្ត្រី៖ នៅថ្ងៃទី៨ ខែធ្នូ ឆ្នាំ២០២៥ ថ្នាក់ដឹកនាំ និងមន្ត្រីជំនាញដែលជាប្រតិភូនៃក្រសួងសាធារណការ និងដឹកជញ្ជូន ដឹកនាំដោយ ឯកឧត្តម រស់ វណ្ណា រដ្ឋលេខាធិការ បានចូលរួមកិច្ចប្រជុំចង្អៀត ដើម្បីពិនិត្យ និងពិភាក្សាបន្តលើសេចក្ដីព្រាងអនុក្រឹត្យស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ក្រោមអធិបតីភាព ឯកឧត្តម លីវ សុវណ្ណា អនុប្រធាន និងជាប្រធានក្រុមការងារទី៤នៃក្រុមប្រឹក្សាអ្នកច្បាប់ និងឯកឧត្តម នៅ បោនន័រ អនុប្រធាន និងជាប្រធានក្រុមការងារទី១នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងមានការអញ្ជើញចូលរួមពីឯកឧត្តម លោកជំទាវ តំណាងក្រសួងពាក់ព័ន្ធ សមាជិកក្រុមប្រឹក្សាអ្នកច្បាប់ សមាជិកក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងគណៈកម្មការភាសាវិទ្យាខ្មែរ ព្រមទាំងថ្នាក់ដឹកនាំ និងមន្ត្រីជំនាញនៃទីស្ដីការគណៈរដ្ឋមន្ត្រី។ បន្ទាប់ពីបានពិនិត្យ និងពិភាក្សាយ៉ាងយកចិត្តទុកដាក់លើគ្រប់ទិដ្ឋភាពនៃសេចក្តីព្រាងអនុក្រឹត្យនេះរួចមក កិច្ចប្រជុំចង្អៀតបានសម្រេចលទ្ធផលដូចខាងក្រោម៖ ១). បានពិភាក្សាផ្លាស់ប្តូរយោបល់លើទិដ្ឋភាពនយោបាយ ទិដ្ឋភាពច្បាប់ និងទិដ្ឋភាពទូទៅពាក់ព័ន្ធនឹងសេចក្តីព្រាងអនុក្រឹត្យខាងលើ ២). ត្រូវបានកែសម្រួលលើពាក្យពេចន៍ និងខ្លឹមសារមួយចំនួន ដើម្បីឱ្យមានសង្គតិភាព និងសមស្របសម្រាប់ការអនុវត្ត ៣). ឯកភាពបន្តពិនិត្យ និងពិភាក្សាលើសេចក្តីព្រាងអនុក្រឹត្យខាងលើនៅក្នុងកិច្ចប្រជុំចង្អៀតបន្តទៀត ដែលនឹងជូនដំណឹងនាពេលក្រោយ៕