ផ្លូវតភ្ជាប់ក្នុងក្រុងក្រចេះ ស្ថិតក្នុងសង្កាត់ចំនួន២ គឺសង្កាត់រកាកណ្ដាល និងសង្កាត់ក្រចេះ បាននឹងកំពុងដំណើរការចាក់ក្រាលថ្មម៉ិច និងចាក់ក្រាលកៅស៊ូ ប្រភេទ AC ដើម្បីលើកកម្ពស់កំរិតគុណភាពផ្លូវ។ផ្លូវនៅក្នុងសង្កាត់រកាកណ្ដាល ចាប់ពីគល់ស្ពានព្រែកតេ រហូតដល់វិមានឯករាជ ក្នុងសង្កាត់ក្រចេះ ពលរដ្ឋបានលើកឡើងថា មានការចាក់ក្រាលថ្មម៉ិចក្រាសកំរ៉ាសប្រហែលជា ២០សង់ទីម៉ែត្រ ក្រាស់ជាងពេលធ្វើសព្វដង កំពុងដំណើរការចាក់ក្រាលម៉ិចបានម្ខាង។លោក ឈិន លាងយី ចៅសង្កាត់ក្រចេះបានឱ្យដឹងថា នៅក្នុងសង្កាត់ក្រចេះ គឺមានកំណាត់ផ្លូវជាច្រើនខ្សែ ដែលស្ថិតក្នុងគម្រោងចាក់កៅស៊ូ ទី១ គឺកំណាត់ផ្លូវចាប់ពីវិមានឯករាជ្យ មុខសាលាសង្កាត់ រហូតដល់ផ្លូវបំបែកកែងវត្តប៉ាឆា-តារាបាល់ទាត់ខេត្ត។ ទី២ គឺកំណាត់ផ្លូវចាប់ពីរង្វង់មូលព្រាបស មកដល់ធនាគារអេស៊ីលីដា ដោយតភ្ជាប់នឹងផ្លូវកែងវត្តប៉ាឆា។ ទី៣ គឺផ្លូវចាប់ពីរង្វង់មូលព្រាបសតាមមុខសាលាខេត្ត តភ្ជាប់ផ្លូវក្នុងសង្កាត់រកាកណ្ដាល ត្រង់ចំំណុចដាយមិនស៊ីធី គឺអត់ចាក់ក្រាលថ្មម៉ិចទេ ដោយគ្រាន់តែអ៊ុតកៅស៊ូដំណាក់កាលចុងក្រោយ។ក្រៅពីកំណាត់ផ្លូវ ដែលលោកចៅសង្កាត់ក្រចេះបានលើកឡើងខាងលើនោះដែរ ក៏មានកំណាត់ផ្លូវពីរខ្សែទៀតផងដែរ ដែលត្រូវសាងសង់ជាផ្លូវបេតុងស្ថិតក្នុងភូមិដូនជ្រាំ សង្កាត់ក្រចេះ ដែលជាជំនួយពី ADB និងគម្រោងអភិវឌ្ឍន៍មូលនិធិឃុំ/សង្កាត់៕