ផ្លូវមួយខ្សែប្រវែង ២គីឡូម៉ែត្រ ស្ថិតនៅសង្កាត់ជ្រាវ ក្រុងសៀមរាប ខេត្តសៀមរាប ដែលរងការខូចខាតស្ទើរទាំងស្រុង ត្រូវបានចាប់ផ្ដើមជួសជុលឡើងវិញ ដោយសាងសង់ជាផ្លូវកៅស៊ូ ដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋ និងការដឹកជញ្ជូនភ្ញៀវទេសចរ ដែលផ្លូវនេះត្រូវបានចាត់ទុកថាមានសារៈសំខាន់បំផុតសម្រាប់មូលដ្ឋាន។មន្ត្រីសង្កាត់ជ្រាវ បានឱ្យដឹងនៅថ្ងៃទី៤ ខែធ្នូ ឆ្នាំ២០២៥នេះថា ផ្លូវដែលកំពុងជួសជុលនេះ មានប្រវែង២គីឡូម៉ែត្រ ទទឹង ៨ម៉ែត្រ និងជើងទេផ្លូវប្រវែង ៩ម៉ែត្រ។ កន្លងមកផ្លូវមួយខ្សែនេះមានការលំបាកខ្លាំងពេលធ្វើដំណើរ ហើយអាជ្ញាធរធ្លាប់បានរៀបចំជួសជុលម្ដងហើយ ប៉ុន្តែដោយសាររដូវភ្លៀងខ្លាំងមិនអាចអនុវត្តបាន ទើបចាប់ផ្ដើមជួសជុលនាពេលបច្ចុប្បន្ននេះ។លោកបានឱ្យដឹងថា ការជួសជុលផ្លូវចាក់កៅស៊ូនេះ មានការចូលរួមគាំទ្រថវិកាពីអ្នកឧកញ៉ា សៀង ណាំ អ្នកតំណាង រាស្ត្រខេត្តសៀមរាប លោក ប្រាក់ សោភ័ណ អភិបាលខេត្ត និងសាលាក្រុង។ ផ្លូវមួយខ្សែនេះ តភ្ជាប់ពីវិថីសម្ដេចជា ស៊ីម ឆ្ពោះទៅកាន់ ផ្លូវក្រវាត់ក្រុងទី២ និងទី៣ នៃសង្កាត់ជ្រាវ ក្រុងសៀមរាប។ពលរដ្ឋក្នុងមូលដ្ឋាន បានបង្ហាញក្ដីរំភើប ចំពោះការយកចិត្តទុកដាក់របស់រាជរដ្ឋាភិបាល លើការអភិវឌ្ឍន៍ផ្លូវថ្នល់ឱ្យមានភាពល្អប្រសើរ នៅក្នុងសង្កាត់ជ្រាវ ក៏ដូចជានៅកន្លែងផ្សេងៗទៀត។ នេះបង្ហាញពីការខិតខំប្រឹងប្រែងរបស់ថ្នាក់ដឹកនាំដែលធ្វើឱ្យមានភាពងាយស្រួលក្នុងការធ្វើចរាចរណ៍របស់ប្រជាពលរដ្ឋគ្រប់ស្រទាប់វណ្ណៈ៕