លោកជំទាវ កុយ សុដានី រដ្ឋលេខាធិការប្រចាំការក្រសួងសាធារណការ និងដឹកជញ្ជូន ដឹកនាំគណៈប្រតិភូក្រសួងទៅបំពេញទស្សនកិច្ចនៅទីក្រុងហុងកុង សាធារណរដ្ឋប្រជាមានិតចិន និងចូលរួមកម្មវិធីសន្និសីទប្រចាំឆ្នាំ២០២៥ របស់ក្រុមប្រឹក្សាសុវត្ថិភាពផ្លូវដែកអន្តរជាតិ (International Railway Safety Council) ទីក្រុងហុងកុង សាធារណរដ្ឋប្រជាមានិតចិន៖ ចាប់ពីថ្ងៃទី២៥ ដល់ថ្ងៃទី២៩ ខែវិច្ឆិកា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តមរដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងទៅបំពេញទស្សនកិច្ចនៅទីក្រុងហុងកុង សាធារណរដ្ឋប្រជាមានិតចិន និងចូលរួមកម្មវិធីសន្និសីទប្រចាំឆ្នាំ២០២៥ របស់ក្រុមប្រឹក្សាសុវត្ថិភាពផ្លូវដែកអន្តរជាតិ (International Railway Safety Council) ដែលជាវេទិកាអន្តរជាតិប្រចាំឆ្នាំ រៀបចំឡើងក្នុងគោលបំណងដើម្បីចែករំលែកចំណេះដឹង ផ្លាស់ប្តូរបទពិសោធន៍ល្អៗ និងណែនាំពីយន្តការថ្មីៗពាក់ព័ន្ធនឹងសុវត្ថិភាពផ្លូវដែក តាមរយៈការចូលរួមធ្វើបទបង្ហាញ និងជជែកពិភាក្សា ពីនិយ័តករ ថ្នាក់ដឹកនាំ-មន្រ្តីទទួលបន្ទុករៀបចំគោលនយោបាយ ប្រតិបត្តិករ និងអ្នកជំនាញផ្លូវដែកមកពីបណ្តាប្រទេសជាច្រើននៅលើពិភពលោក។ ថ្លែងក្នុងកម្មវិធីសន្និសីទនេះ លោកជំទាវរដ្ឋលេខាធិការប្រចាំការ ប្រធានគណៈប្រតិភូកម្ពុជា បានបញ្ជាក់ពីចក្ខុវិស័យ និងភាពចាំបាច់ក្នុងការអភិវឌ្ឍផ្លូវដែកនៅកម្ពុជា ដែលជាការងារអាទិភាពមួយ ស្របតាមការកំណត់ក្នុងយុទ្ធសាស្ត្របញ្ចកោណ-ដំណាក់កាលទី១ ដែលបានដាក់ចេញដោយរាជរដ្ឋាភិបាលកម្ពុជា នីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ លោកជំទាវបានគូសរំលេចបន្ថែមជូនអង្គសន្និសីទអំពី ការងារអាទិភាព និងកាលានុវត្តភាពនៃការអភិវឌ្ឍវិស័យផ្លូវដែកនៅកម្ពុជាតាមរយៈផែនការរយៈពេលមធ្យម និងរយៈពេលវែង បញ្ហាប្រឈម និងតម្រូវការចាំបាច់ក្នុងការកែលម្អ និងធ្វើទំនើបកម្មខ្សែរថភ្លើងដែលមានស្រាប់ទាំង២ខ្សែ និង ការរៀបចំនូវផែនការមេ និងយុទ្ធសាស្រ្តសំខាន់ៗ ដើម្បីជំរុញ និងទាក់ទាញនូវការវិនិយោគ និងការគ្រប់គ្រងប្រតិបត្តិការផ្លូវដែកនៅកម្ពុជា ឆ្លើយតបនឹងការរីកចម្រើនយ៉ាងឆាប់រហ័សនៃសង្គម-សេដ្ឋកិច្ចកម្ពុជា និងនៅក្នុងតំបន់។ ឆ្លៀតក្នុងឱកាសនោះផងដែរ គណៈប្រតិភូកម្ពុជាក៏បានទទួលជួបពិភាក្សាការងារជាមួយដៃគូសំខាន់ៗ នៅទីក្រុងហុងកុងផងដែរ ដើម្បីពិនិត្យ ពិភាក្សាអំពីការពង្រីកនិងពង្រឹងកិច្ចសហប្រតិបត្តិការលើការរៀបចំក្របខណ្ឌច្បាប់ គោលនយោបាយ ការងារបច្ចេកទេស ការអនុវត្តវិធានការសុវត្ថិភាព និងការអភិវឌ្ឍធនធានមនុស្សលើវិស័យផ្លូវដែក ព្រមទាំងកិច្ចសហប្រតិបត្តិការផ្សេងៗ បន្ថែមទៀតនាពេលអនាគត ដែលរួមមានដូចជាលោកជំទាវរដ្ឋលេខាធិការទទួលបន្ទុកកិច្ចការដឹកជញ្ជូន និងភស្តុភារកម្ម និងអគ្គនាយកនៃអគ្គនាយកដ្ឋានសេវាអគ្គិសនី និងមេកានិចនៃរដ្ឋាភិបាលតំបន់រដ្ឋបាលពិសេសទីក្រុងហុងកុង, ព្រមទាំងរដ្ឋបាលផ្លូវដែកជាតិនៃសាធារណរដ្ឋប្រជាមានិតចិន និងក្រុមហ៊ុន China Railway Rolling Stock Corporation (CRRC)។ បន្ថែមពីការចូលរួមកិច្ចប្រជុំខាងលើ គណៈប្រតិភូកម្ពុជាក៏បានធ្វើដំណើរទស្សនកិច្ចទៅកាន់ទីតាំងសំខាន់ៗ មួយចំនួនផងដែរ ដែលក្នុងនោះរួមមាន មជ្ឈមណ្ឌលគ្រប់គ្រងប្រតិបត្តិការរថភ្លើងសាធារណៈ Tsing Yi នៃទីក្រុងហុងកុង, មជ្ឈមណ្ឌលត្រួតពិនិត្យ និងថែទាំរថភ្លើង Wong Chuk Hang ហេដ្ឋារចនាសម្ព័ន្ធស្ថានីយ៍ឆ្លងកាត់ព្រំដែនហុងកុង- ម៉ាកាវ- ជូហៃនិង មជ្ឈមណ្ឌលគ្រប់គ្រងរថភ្លើងល្បឿនលឿន Shek Kong៕