ពិធីបិទវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ - ផ្នែកផ្លូវប្រសព្វ កំពត៖ នាថ្ងៃសុក្រ ទី២៨ ខែវិច្ឆិកា ឆ្នាំ២០២៥ ឯកឧត្ដម នូ វឌ្ឍនៈ អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបិទវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ - ផ្នែកផ្លូវប្រសព្វ រៀបចំដោយអគ្គនាយកដ្ឋានបច្ចេកទេស ដោយមានការចូលរួមពីថ្នាក់ដឹកនាំទទួលបន្ទុកការងារបច្ចេកទេស ទីប្រឹក្សាក្រសួង អគ្គនាយករងមកពីអគ្គនាយកដ្ឋានពាក់ព័ន្ធ សិក្ខាកាមពីនាយកដ្ឋានអនុវត្តគម្រោងថ្នាក់កណ្ដាលរបស់ក្រសួង ក្រសួងសេដ្ឋកិច្ច និងហិរញ្ញវត្ថុ មន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងគ្រប់អង្គភាពវិស្វកម្ម ដែលអនុវត្តគម្រោងស្ថិតក្រោមអាណាប័កក្រសួងសាធារណការ និងដឹកជញ្ជូន។ តាមរយៈវគ្គបណ្ដុះបណ្ដាលនេះ សិក្ខាកាមទាំងអស់ទទួលបាននូវការពន្យល់លម្អិតពីគោលការណ៍រួមក្នុងការសិក្សា និងឌីហ្សាញផ្លូវប្រសព្វ ដោយក្នុងនោះរួមមាន៖ លក្ខខណ្ឌទូទៅនៃផ្លូវប្រសព្វ, អញ្ញាត្របច្ចេកទេសក្នុងការសិក្សា និងឌីហ្សាញផ្លូវប្រសព្វ, ការជ្រើសរើសផ្លូវប្រសព្វ ផ្លូវឆ្លងកាត់នៃផ្លូវថ្មើរជើង ផ្លូវជិះកង់ និងផ្លូវរថភ្លើង, ផ្លូវប្រសព្វដែលគ្មានភ្លើងសញ្ញា, ផ្លូវប្រសព្វដែលមានភ្លើងសញ្ញា, រង្វង់មូល, និងផ្លូវប្រសព្វប្តូរទិស ព្រមទាំងការយល់ដឹងអំពីគោលការណ៍ដំឡើងបង្គោលនាំផ្លូវសម្រាប់សំណង់សិល្បការ្យ និងការងារបំពាក់បរិក្ខារចរាចរណ៍។ ថ្លែងក្នុងកម្មវិធីបិទវគ្គបណ្តុះបណ្តាល ឯកឧត្តមអនុរដ្ឋលេខាធិការ បានវាយតម្លៃខ្ពស់ចំពោះការរៀបចំ និងវត្តមានប្រតិបត្តិករ លោក-លោកស្រី ជាវិស្វករ និងមន្ត្រីបច្ចេកទេស ដែលបានចូលរួមក្នុងវគ្គបណ្តុះបណ្តាលបច្ចេកទេសនាពេលនេះ ព្រមទាំងការធ្វើបទបង្ហាញដោយមន្ត្រីបច្ចេកទេសដែលជាគ្រូបង្គោល អមដោយការពន្យល់បន្ថែមរបស់ថ្នាក់ដឹកនាំ និងមន្ត្រីជំនាញនៃក្រសួងសាធារណការ និងដឹកជញ្ជូន រួមទាំងកិច្ចពិភាក្សា និងសំណួរចម្លើយពាក់ព័ន្ធទៅនឹងការឌីហ្សាញធរណីមាត្រផ្លូវដែលបានធ្វើបច្ចុប្បន្នភាព ក៏ដូចជាបទពិសោធន៍ផ្ទាល់របស់មន្ត្រីបច្ចេកទេសក្រសួងសាធារណការ និងដឹកជញ្ជូន និងអង្គភាពអនុវត្តគម្រោងធ្លាប់បានអនុវត្តកន្លងមកឱ្យទទួលបាននូវការស្វែងយល់កាន់តែច្បាស់ពីគោលការណ៍សំខាន់ៗ និងនីតិវិធីនៃការឌីហ្សាញធរណីមាត្រផ្លូវ ប្រកបដោយប្រសិទ្ធភាព សុវត្ថិភាព ជាពិសេសផ្តល់នូវផាសុខភាពដល់អ្នកប្រើប្រាស់ផ្លូវថ្នល់។ បន្ថែមលើនេះ ឯកឧត្តមរដ្ឋលេខាធិការ បានលើកឡើងពីសមិទ្ធផលសំខាន់ៗដែលក្រសួងសម្រេចបាន នាពេលកន្លងមក និងគម្រោងនានាដែលបាន និងកំពុងអនុវត្ត និងបានផ្ដល់អនុសាសន៍ណែនាំដល់ថ្នាក់ដឹកនាំ សមាជិកទាំងអស់ត្រូវធ្វើការតាមដានត្រួតពិនិត្យការងារទាំងអស់ពាក់ព័ន្ធគម្រោង ត្រូវយកចិត្តទុកដាក់ និងផ្ដល់ព័ត៌មានឱ្យគ្នាទៅវិញទៅមកឱ្យបានទាន់ពេលវេលាគ្រប់ជ្រុងជ្រោយ សំដៅធ្វើយ៉ាងណាឱ្យការអនុវត្តគម្រោងនេះសម្រេចបានលទ្ធផលល្អ ប្រកបដោយប្រសិទ្ធភាពខ្ពស់តាមការប្រគល់ជូនរបស់ថ្នាក់ដឹកនាំ៕