កិច្ចប្រជុំពិនិត្យវឌ្ឍនភាពការងារប្រចាំឆ្នាំ២០២៥ និងលើកទិសដៅការងារប្រចាំឆ្នាំ២០២៦ របស់គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន ទីស្ដីការក្រសួង៖ នាថ្ងៃពុធ ទី២៦ ខែវិច្ឆិកា ឆ្នាំ២០២៥ ឯកឧត្ដម សួន រចនា រដ្ឋលេខាធិការ និងជាអនុប្រធានប្រចាំការនៃគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការនៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា រដ្ឋមន្ត្រី និងជាប្រធានគណៈកម្មាធិការដឹកនាំកំណែទម្រង់វិមជ្ឈការ និងវិសហមជ្ឈការក្រសួង បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារប្រចាំឆ្នាំ២០២៥ និងលើកទិសដៅការងារប្រចាំឆ្នាំ២០២៦ របស់គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន ដោយមានការអញ្ជើញចូលរួមឯកឧត្តមអនុរដ្ឋលេខាធិការ លោក លោកស្រីតំណាងអគ្គនាយកដ្ឋានជំនាញពាក់ព័ន្ធ ព្រមទាំងមន្រ្តីជំនាញជាច្រើនរូបផងដែរ។ កិច្ចប្រជុំនេះត្រូវបានរៀបចំឡើង ដើម្បីពិនិត្យ ពិភាក្សា និងតាមដានតាមរបៀបវារៈមួយចំនួនរួមមាន៖ ១.) របាយការណ៍ស្តីពីវឌ្ឍនភាពការងាររបស់គណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន ប្រចាំឆ្នាំ២០២៥ និងទិសដៅការងារឆ្នាំ២០២៦ ២.) ពិនិត្យលើរបាយការណ៍បច្ចុប្បន្នភាព នៃតារាងដំណោះស្រាយ បញ្ហាប្រឈមនានា និងសំណូមពរ ដែលស្នើឡើងពីរដ្ឋបាលថ្នាក់ក្រោមជាតិ លើបញ្ហាប្រឈមក្នុងការអនុវត្តមុខងារដែលបានផ្ទេរ និងធ្វើប្រតិភូកម្ម ពាក់ព័ន្ធនឹងវិស័យដឹកជញ្ជូនតាមផ្លូវគោក វិស័យដឹកជញ្ជូន ផ្លូវទឹក ផ្លូវសមុទ្រ និងកំពង់ផែ ៣.) ពិនិត្យ និងពិភាក្សាលើផែនការសកម្មភាពអាទិភាពប្រចាំឆ្នាំ២០២៦ និងបញ្ហាផ្សេងៗមួយចំនួនទៀត។ ឯកឧត្តមរដ្ឋលេខាធិការ ថ្លែងអំណរគុណ និងកោតសរសើរ វាយតម្លៃខ្ពស់លើកិច្ចការខិតខំប្រឹងប្រែងរបស់អគ្គនាយកដ្ឋានជំនាញពាក់ព័ន្ធ និងក្រុមការងារលេខាធិការដ្ឋាននៃគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ នៃក្រសួងដែលបានប្រឹងប្រែងអនុវត្តការងារឱ្យសម្រេចបានលទ្ធផលបានល្អប្រសើតាមការគ្រោងទុក និងបានជំរុញ លើកទឹកចិត្តដល់អគ្គនាយកដ្ឋានជំនាញពាក់ព័ន្ធ និងក្រុមការងារឱ្យខិតខំរកដំណោះស្រាយអំពីបញ្ហាប្រឈមនានាក្នុងការអនុវត្តមុខងារដែលនៅមានសេសសល់។ គូសបញ្ជាក់បន្ថែមថា ក្រសួងសាធារណការ និងដឹកជញ្ជូន បានចូលរួមអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២រយៈពេល១០ឆ្នាំ (២០២១-២០៣០) សម្រេចបានសមិទ្ធផលតាមការគ្រោងទុក និងចូលរួមយ៉ាងសកម្មលើមុខងារបានផ្ទេរនិងប្រតិភូកម្មឱ្យទៅរដ្ឋបាលថ្នាក់ក្រោមជាតិ (រាជធានី ខេត្ត ក្រុង ស្រុក ខណ្ឌ) ស្របតាមគោលនយោបាយ និងកម្មវិធីរបស់រាជរដ្ឋាភិបាលកម្ពុជា៕